13
Grawng Totiag Ra Mu
1 Nawh cung ka piang pak mhaik rawm sigrit sigra heue. Ref 13:1 Dan 7:3.Mai aux yaox totiag tix mu lih khaing daux rawm sigrit sigra pa koe kaing aliah mu mai rung kao mu mai ka piang rung nawh khankix koe mhok khri kao mu mai ka piang kaing nawh khankix koe ceu kaux ceu pa salao ka Siyiex khankix heue.Ref 13:1 Jhi 17:3, 7-12.
2 Totiag pa yaox aux an awm sivai simuing mai caong nawh awm caong krih mai jheeh nawh awm jheeh sivai sangsi heue.Ref 13:2 Dan 7:4-6. Siyawng an tawx sibrawm tix mai dang ngeung tix mai sibrawm giex kaing tix ka totiag an heue.
3 Aux yaox kaing nawh tix mu pa awm pa hoik pah yum ka mai hoik kieh rhoi khaix dee hoik pah nawh an moi heue. Pui haktiex khawmuik daox deng kah mai hawt khaix totiag an heue.
4 Kix krub ka siyawng an, mawh kheu hoik tawx nawh sibrawm giex kaing tix ka totiag an heue. Kix krub ka totiag an ah nin, “Mawh mawx pa awm ka totiag in? Mawh mawx pa chix yuh naing ka nawh?”
5 Hoik tawx jheeh ka nawh, pa ah ceu pa ting lhaong mai lox salao ka Siyiex khankix heue. Hoik tawx sibrawm tix giex kaing ka nawh been tixpon ra khix heue.
6 Nawh ang jheeh tix sonsang ah lox salao ka Siyiex,Ref 13:5-6 Dan 7:8, 25; 11:36.ti sang salao ka ceu kaux Nawh Cao mai ka nyiex gox bwan man Nawh Cao, pa mawh kix pa ot ka daux meung raoma heue.
7 Tawx akhwang ka nawh ti sang yuh naing ka pui pa singax singeh khankix mai ti sang pex kix heue.Ref 13:7 Dan 7:21. Hoik tawx sibrawm tix giex kaing ka piang ceu pui kuceu mai pui kuceu mai pui pa tang lox sikah kuceu mai pui meung ku meung, ka nawh heue.
8 Can pui pa ot ka piang haktiex khawmuik tak sang krub ka nawh, pa mawh can pa ang lai tiiem ti deuh ka ceu kaux kix tom yam jah ti kaw haktiex ka daux phuk lai pa im ju,Ref 13:8 Yaog 69:28. cie kawn yung pa hoik pah yum heue.
9 Phan pui tix kaux kaux koe yhaok kieh nawh mhong heue.
10 Phan pui tix kaux kaux mawh pa hoik laung ka pui, nawh tak laig ka daux pa laung heue.Ref 13:10 Ye 15:2.Phan pui tix kaux kaux teei pui yum ka vaig tak lai teei nawh yum ka vaig heue. Mawh ka grawng in heue, pa pui pa singax singeh khankix gun yeung mai koe krax yum rhawm.
11 Aux yaox totiag tang mu pa lih hoek khaing daux haktiex mai nawh koe rung ra mu pa awm rung kawn yung mai lox sikah nawh awm siyawng heue.
12 Nawh shiao ka sibrawm pa giex kaing totiag phao ka an tix mu khawmuik, ka sivoe ngai nawh. Nawh yuh ti kieh haktiex mai kix pa ot ka daux haktiex khankix, krub ka totiag phao ka an tix mu, pa hoik kieh rhoi khaix dee hoik pah nawh moi heue.
13 Nawh yuh mhai pa daox am pa kied ting khankix tom sidah kieh nawh ngu lih khaing raoma ka piang haktiex ka sivoe ngai kawn pui heue.
14 Nawh pie lhen ka kix pa ot ka piang haktiex ka mhai pa daox am, pa hoik tawx tix kieh nawh yuh sivoe ngai totiag phao ka an mai nawh nhie kix pa ot ka piang haktiex khankix yuh riang grang totiag pa koe rhoi khaix dee hoik mug ka vaig mai pa im an heue.
15 Hoik tawx sibrawm ka nawh ti tawx ju ka riang grang totiag an, sonsang chix sikah riang grang totiag an mai kieh teei yum ka can kix pa ang krub ka riang grang totiag tix heue.
16 Ka khawmuik, can pa iak mai pa ting mai pa mi pa koe mai pa hot pa sibhawm mai pa ploi mai pa mawh siliex khankix, nawh kieh sau mhai ka taix khawn dawm kix, phan ang mawh nan ka dong re kix,
17 mai yuh ka mawx son ang pui tix kaux kawx sang pon teei ti tawx, phan ang mawh nan sang pon ti coh, lheu khaing kaw pa hoik koe mhai an, pa mawh ceu kaux totiag an, phan ang mawh nan nambad ceu kaux nawh heue.
18 Koe pingnya cuyi ka in heue. kaw pa koe krax tawng yung, kieh nawh simin ti yaox ka nambad totiag an awx. Grawh grawng nawh nambad an mawh nambad pui tix kaux heue. Nambad an mawh liah yieh mai tigliah liah (666) mu heue.