12
Bun Mai Siyawng Ting
1 Yaox mhai pa ting ka raoma tix ceu pa mawh bun tix kaux pa ceep ka singaix mai khix koe ka greem caong nawh mai koe mhok khri pa koe simuing kao ra mu ka piang kaing nawh heue.Ref 12:1 Jah 37:9.
2 Bun an koe kaux mai riag kheu pa kha rhawm pa saux yha mai pa keh heue.Ref 12:2 Mi 4:10.
3 Yaox mhai pa tang tix ceu ka raoma mai jhak heue, koe siyawng ting pa raoh, pa koe kaing aliah mu mai rung kao muRef 12:3 Dan 7:7. mai ka piang kaing nawh khankix koe mhok khri aliah mu heue.
4 Sidax nawh reu ka simuing raoma loe son tix son mai taing kix ka piang haktiex heue.Ref 12:4 Dan 8:10. Siyawng an cung sivoe bun pa dex sang keh an, yuh ka mawx yam keh nawh kawn, nawh tak pon ti ih ka kawn pa keh bun an heue.
5 Nawh keh kawn simex mhaing,Ref 12:5 Isa 66:7. pa mawh kaw pa tak sang giex kaing ka ceu pui khawmuik ka khaox gix rhiemRef 12:5 Yaog 2:9. mai kliien kawn kiex haok hu ka Siyiex mai ka dang ngeung Nawh Cao heue.
6 Bun an to hu daux tiagtu, ka dee hoik cox Siyiex son kiex, yuh ka mawx sonsang kia ngien kiex tan been tix rheng mai ra yieh mai tigliah singaix heue.
7 Lih koe naing ka daux meung raoma. MikkhelaxRef 12:7 Dan 10:13, 21; 12:1; Yu 9. mai kawncau Siyiex nawh khankix hu yuh naing ka siyawng an mai siyawng an mai kawncau nawh khankix yuh naing,
8 mai ang kix pex mai ang lai baox koe dee ot dee koe kix ka daux meung raoma heue.
9 Taing lih ka siyawng ting an, pa mawh siuing prim dix,Ref 12:9 Jah 3:1. kaw pa kok mawh phicaox mai satan, pa mawh cao pa pie lhen ka beu haktiex khawmuik heue. Hoik taing nawh lih ka piang haktiexRef 12:9 Luk 10:18. mai kawncau nawh khankix kawx hoik taing lih tau mai nawh heue.
10 Aux mhong lox pa ting pa sinum ka daux meung raoma, pa ah nin, “Yam in uik hoek krax taoh mai sibrawm mai meung Siyiex ex mai sibrawm Khrit cie Nawh heue. Grawh grawng nawh, cao pa deuh phimap ka puxaik ex khankix,Ref 12:10 Job 1:9-11; Zak 3:1. ka sivoe Siyiex ex ku ngaix, hoik taing lih heue.
11 Kix hoik pex ka nawh kheu nham kawn yung mai kheu lox pa kham sakse kix heue. Kix ang lhawk ka ju tix, viang sidah yaox ti yum kawx heue.
12 Mawh kheu nan, raoma khankix eue, gaux rhawm heue. Haktiex mai rawm sigrit sigra koe krax kha rhawm, mawh kheu phicaox hoik viex krax pa ting song rhawm song rhi mai lih hu ka pex, kheu hoik tawng nawh grawng koe tix bawg yam ceeix khaing heue.
13 Yam yaox siyawng an grawng hoik taing nawh lih ka haktiex, nawh tuktiak tukte ka bun pa hoik keh kawn simex an heue.
14 Teei ti tawx pruik klang krih ting an ra khawn ka bun an, sonsang po hu kiex ka daux tiagtu, ka dee ot kiex, dee sang kia ngien ka kiex been tix bawg yam mai ra bawg yam mai tix plak bawg yam,Ref 12:14 Dan 7:25; 12:7. khaing plakngai siyawng an heue.
15 Siyawng an prauk rawm lih khaing daux jheeh nawh, hawt khaix bun an, awm rawm klawng ting, yuh ka mawx sonsang kieh nawh rawm an sibloe kiex hu heue.
16 Haktiex teem ka bun an mai ang jheeh tix mai bleet ka rawm klawng ting an pa hoik prauk siyawng an lih khaing daux jheeh tix heue.
17 Siyawng an song rhawm song rhi ka bun an mai lih hu ti sang yuh naing ka ru bun an pa kawn deuk khankix, pa kawn priex ti hawt ka lox tawm jhawm krai Siyiex mai pa giex ka mhai ruk Yesux.