14
Kawn Yung Mai Pui Nawh
1 Aux jhak mai yaox kawn Yung cung ka gawng Zion tau mai Nawh Cao koe pui pa hoik tiem ceu kaux Nawh mai ceu kaux Keeing Nawh Cao, piang dong re kix heue.Ref 14:1 Yez 9:4; Jhi 7:3
2 Aux mhong lox khaing raoma, pa awm lox rawm tom nie mai awm lox sinum praix pa ting heue. Lox mhong aux an awm lox cao pa tah ting vawk khankix, yam tah kix ting vawk heue.
3 Kix rhax lai rhax pa khraox sivoe dang ngeung sivoe totiag pa im ju pon mu mai kuad song khankix mai pui tix kaux kawx ang chix pon gau lox rhax an lheu khaing kaux pa hoik liag khaing haktiex heue.
4 In mawh kix pa ang sax kieh tokaux tix seeing brai mai bun. Grawh grawng nawh kix singax awm bunkrih heue. In mawh kix pa hawt khaix kawn Yung ka can dee sang hu Nawh heue. In mawh kix pa hoik liag khaing daux kawn pui, sonsang mawh plix liang ka son Siyiex mai ka son kawn Yung an heue.
5 Ka daux jheeh kix ang lai yaox lox pie lhen, kix mawh pa loig pa ang koe dee ne heue.Ref 14:5 Ze 3:13
Kawncau Siyiex Loe Kaux
6 Aux yaox kawncau Siyiex tang kaux tix kaux, pa pu ka sigreung raoma mai pa koe lox bwan gaux rhawm leeing ju, sonsang sidiex gau ka kix pa ot ka piang haktiex mai ka pui meung ku meung mai ka ceu pui kuceu mai ka pui pa tang lox sikah kuceu mai ka pui kuceu heue.
7 Nawh ah nin ka lox pa ting pa sinum, “Lhat graung ka Siyiex mai yaogyaw ka Nawh Cao, mawh kheu bawg yam nari pa prawng pa ciyang Nawh hoik hoek heue. Krub ka Nawh Cao pa hoik yuh raoma mai haktiex mai rawm sigrit sigra mai rawm keut khankix heue.”
8 Kawncau Siyiex tang kaux ra kaux tix kaux hawt khaix ah nin, “Veng Babulon pa ting hoik grhup, hoik grhup heue. Veng Babulon pa hoik kieh ceu pui khawmuik nyaux ka rawm plix siiet pa song rhawm ceu pa lud vao nawh heue.”Ref 14:8 Isa 21:9; Ye 51:8; Jhi 18:2
9 Kawncau Siyiex tang kaux loe kaux tix kaux hawt khaix kawncau Siyiex an kiex mai ah nin ka lox pa ting pa sinum, “Phan pui tix kaux kaux krub ka totiag an mai ka riang grang nawh mai rieb ti teei mhai ka dong re tix, phan ang mawh nan ka taix tix,
10 nawh tak yaox ti nyaux ka khawm rawm plix siiet ceu pa song rhawm song rhi Siyiex, pa ang klao tidtix ka daux kawk pa song rhawm song rhi Nawh Cao heue. Tak sang yuh tix kieh nawh kha rhawm ka ngu mai mhat, ka sivoe kawncau Siyiex pa singax singeh khankix mai ka sivoe kawn Yung an heue.Ref 14:10 Isa 51:17; Jah 19:24; Yez 38:22
11 Taox ngu ceu pa kha rhawm kix haok hu ku ju leeing ju. Kix pa krub ka totiag an mai ka riang grang nawh mai can pa hoik rieb ti teei ka mhai ceu kaux nawh khankix, pon ang lai yaox ti laux lee ku ngaix heue.Ref 14:11 Isa 34:10
12 Mawh ka grawng in, pui pa singax singeh khankix gun yeung, pa mawh kix pa priex tix hawt ka lox tawm jhawm krai Siyiex mai ka krax yum rhawm Yesux heue.
13 Aux mhong lox khaing raoma pa ah nin, “Tiiem yuh nin, Jah tom yam in, kix pa yum ka daux Simiang ting bwanson heue. Mawh heue, Khwan Cao ah nan, yuh ka mawx sonsang pon kix ti laux lee khaing pa nyhap pa mao kix mai kaing ceu pa yuh kix hawt tau mai kix heue.”
Vawg Ka Haktiex
14 Aux jhak mai yaox, paiawm pa paing tix mu ka piang paiawm an, aux yaox pa ngawm tix kaux, pa awm Kawn kawn pui mai koe mhok khri ka piang kaing Nawh mai ka daux taix Nawh koe sivawg pa lawm tix mag heue.Ref 14:14 Dan 7:13
15 Kawncau Siyiex tang kaux tix kaux lih hoek khaing daux nyiex bwan mai kok yo lox pa ting sinum ka Kaw pa ngawm ka piang paiawm an ah nin, “Ploi sivawg Maix mai vawg heue. Mawh kheu bawg yam nari pa vawg hoik hoek, mawh kheu hoik kaux plix ka piang haktiex heue.”Ref 14:15 Yol 3:13
16 Kaw pa ngawm ka piang paiawm an taing sivawg tix ka piang haktiex mai vawg nghox ka haktiex heue.
17 Kawncau Siyiex tang kaux tix kaux lih hoek khaing daux nyiex bwan pa koe ka daux meung raoma an, nawh kawx koe sivawg pa lawm tix mag heue.
18 Kawncau Siyiex tang kaux tix kaux lih hoek khaing khu dee tan pa mawh kaw pa koe sibrawm ka piang ngu mai nawh kok yo lox pa ting pa sinum ah nin ka nawh, “Ploi sivawg pa lawm maix mai khrawm ka sigleem nhu plix siiet ka haktiex, grawh grawng nawh plix siiet nawh khankix hoik sidaing teem heue.”
19 Kawncau Siyiex an taing sivawg nawh ka haktiex mai khrawm ka plix siiet, ka haktiex mai taing sau ka daux dee biiet ti teei rawm plix siiet, pa mawh dee biiet pa ting, krax song rhawm song rhi Siyiex heue.
20 Dig ka dee biiet ti teei rawm plix siiet an, ka plak praix veng mai nham lih khaing dee biiet ti teei rawm plix siiet an, tom hoek ka maox keu brung khankix, pa hoek been glang ra yieh lag heue.Ref 14:20 Isa 63:3; Lam 1:15; Jhi 19:15