11
Pui Kham Sakse Ra Kaux
1 Teei ti tawx gawng priem tix gawng, pa awm khaox grix ka aux mai ah lox yuh nin, “Kaoh mai tiag ti yaox ka nyiex bwan Siyiex Ref 11:1 Yez 40:3mai ka khu dee tan mai ka kix pa krub ka daux dee an.
2 Viang mawh nan brawk pa koe plak praix nyiex bwan, grham kah, mai paw tiag heue. Grawh grawng nawh hoik tawx nawh ka pui tang ceu mai kix tak dig veng pa singax singeh greem caong tixRef 11:2 Luk 21:24 tixpon ra khix heue.”
3 Aux tak tawx sibrawm ka cao pa kham sakse Aux ra kaux mai kiex tak ceep kraung man pa taing ka hauk mai krai lox jhai been tix rheng mai ra yieh mai tigliah ngaix heue.
4 In kiex mawh khaox Sanlun ra gawng mai jawk ten ra mu, pa jung sivoe Simiang Cao haktiex heue.Ref 11:4 Zak 4:3, 11-14
5 Phan pui tix kaux kaux simie ti chuh ti yuh kiex saux ngu lih khaing daux jheeh kiex mai gleeing ka pui pa koeng ka kiex heue. Phan pui tix kaux kaux simie tix chuh ti yuh kiex saux, nawh tak lai yaox tix yum ka pa yuh nan heue.
6 In kiex koe sibrawm ti nyeep ka raoma son ang lhiex sang lih ka daux been glang singaix yam krai kiex lox jhai heue.Ref 11:6 1Sim 17:1 Kiex koe sibrawm ka piang rawm khankix ti sang loh tix kieh kix mawh nham Ref 11:6 Lih 7:17-19mai sonsang kieh preng kuceu hoek ka haktiex awm pa simie kiex miex bawg ang ah heue.
7 Khaix hoik sidah kham kiex sakse, totiag tix mu pa lih hoek khaing daux daux pa ang koe dee die, Ref 11:7 Dan 7:3; Jhi 13:5-7; 17:8tak yuh naing ka kiex mai pex kiexRef 11:7 Dan 7:21 mai teei kiex yum heue.
8 Tokaux yum kiex tak noi ka daux krax veng ting an pa kok hawt khwan mawh SawdomRef 11:8 Isa 1:9-10 mai Ejiptux pa mawh dee hoik teei Simiang kiex yum ka piang khaox lhak heue.
9 Pui khaing ka daux pui kuceu mai ceu pui kuceu mai pui pa tang lox sikah kuceu mai pui meung kuceu, jhak ka tokaux pa yum kiex been loe singaix plak mai ang cu ti kieh sipaung tokaux yum kiex ka daux simeeig heue.
10 Kix pa ot ka piang haktiex gaux rhawm ka grawng kiex mai yuh krax gaux rhawm mai kix ralai sipaox totaix ka paox tix, mawh kheu cao jhai in ra kaux hoik laklheut ka kix pa ot ka piang haktiex heue.
11 Khaix loe singaix plak an, bhawm pa im ju pa kaoh khaing Siyiex laig ka daux kiex mai kiex cung ka caong tix heue.Ref 11:11 Yez 37:10 Kix pa yaox ka kiex khankix kied lhat kied graung ka heue.
12 Kix mhong lox pa ting pa sinum khaing raoma pa ah nin ka kiex, “Haok tin heue,” kiex haok hu ka daux meung raoma, ka daux paiawmRef 11:12 2Sim 2:11 mai pui pa koeng ka kiex khankix kawx yaox kiex heue.
13 Ka daux bawg yam nari an tok kla reem ting Ref 11:13 Jhi 6:12; 16:18mai veng kao son tix son grhup ka heue. Mai pa tok kla reem an pui yum aliah rheng mai pui pa deuk khankix kied lhat ka sigrien sigre mai yaogyaw ka Siyiex meung raoma heue.
14 Ceu pa kha rhawm ra ceu tix ceu hoik luan heue. Jhak heue, ceu pa kha rhawm loe ceu tix ceu tak khran hoek heue.
Teettawng Aliah Mu, Meung Leeingju Cie Khrit
15 Kawncau Siyiex aliah kaux tix kaux phlu teettawng mai lih koe lox pa ting pa sinum ka daux raoma, pa ah nin,Ref 11:15 Dan 7:14, 27 “Meung haktiex in hoik lih mawh meung Simiang ex, mai meung Khrit cie Nawh Cao, mai Nawh Cao tak sang giex kaing ku ju leeing ju leeing phan heue.”
16 Kuad song tixnga pon kaux pa ngawm ka piang dang ngeung kix ka sivoe Siyiex, goh gup mai krub ka Siyiex,
17 ah nin, “Siyiex Cao pa ting sibrawm piang khawmuik, pa mawh yam in mai pa hoik mawh eue, ex yaogyaw bwanson Maix, mawh kheu hoik teei Maix siawp sibrawm pa ting Maix mai hoik giex kaing heue.
18 Ceu pui khankix hoik song rhawm song rhi mai krax song rhawm song rhi Maix hoik hoek heue. Mai bawg yam pa sang prawng sang ciyang ka pui pa hoik yum mai bawg yam pa sang tawx bwanson totaix ka siliex Maix cao jhai khankix mai ka pui pa singax singeh khankix mai ka kix pa lhat ka ceu kaux Maix, khawm pa iak pa ting khankixRef 11:18 Yaog 115:13 mai sonsang yuh laux ka kix, pa yuh laux ka haktiex khankix heue.”
19 Paoh ka nyiex bwan Siyiex pa koe ka daux meung raoma mai pon ti yaox ka khui sijax mukheu Nawh Cao, ka daux nyiex bwan Nawh heue. Khaix an lih mawh pa tuh sah mai lox sikah mai lox pa sinum praix mai pa tok kla reemRef 11:19 Jhi 8:5; 16:18 mai lih pre ting heue.Ref 11:19 Jhi 16:21