4
Abraham Hoik Pon Pa Rahsee
1 Phan mawh nan ex sang ah ka mawh grawng Abraham pa mawh tax du ex hawt plak nex nham, hoik pon nawh bwanson patix?
2 Grawh grawng nawh phan Abraham hoik pon krax rahsee kheu krax twah klaung pa yuh tix, nawh koe grawh grawng dee yaw tix, viang mawh nan ang mawh plak sivoe Siyiex heue.
3 Grawh grawng nawh Phuk lai sigang khri ah ka mawx? “Abraham hoik yum rhawm ka Siyiex mai hoik sawn mawh pa rahsee son nawh heue.”Ref 4:3 Jah 15:6; Ka 3:6.
4 Ngawh riang pa tawx ka kaw pa yuh kaing, ang lai chix sawn mawh pa yuh bwanson, hoik mawh ceuk heue.
5 Viang mawh nan kaw pa ang yuh kaing mai yum rhawm ka Kaw pa kieh pui caox pa ang nab yam mai pa yuh pa ang khaw ka Siyiex rahsee, pa yum rhawm nawh an hoik sawn mawh pa rahsee heue.
6 Awm khawm pa hoik krai Davit grawh grawng pa ting bwanson, pui pa hoik sawn Siyiex mawh pa rahsee, ka pa ang dex mai krax twah pa yuh tix,
7 pa ah nin, “Kix pa pon pa pluat ploi phimap tix mai pa hoik kheem phimap ting bwanson heue.
8 Pui pa luan khaing pa mhai deuh Siyiex phimap nawh ting bwan son heues.”Ref 4:7-8 Yaog 32:1-2.
9 Phan mawh nan bwanson in mawh son pui pa pat hak khaing lie? Phan ang mawh nan mawh khawm son pui pa ang pat hak lie? Grawh grawng nawh ex ah, krax yum rhawm Abraham hoik sawn mawh pa rahsee heue.
10 Phan mawh nan hoik sawn mawh khaix hoik pat hak nawh lie? Ka sang pat hak lie? Ang lai mawh khaix hoik pat hak, viang mawh nan hoik mawh tom ka sang pat hak heue.
11 Nawh pon mhai pa pat hak, Ref 4:11 Jah 17:10.pa mawh cum pa rahsee, pa dex mai krax yum rhawm, pa hoik koe nawh tom ka sang pat hak, sonsang mawh nawh keeing kix can pa yum rhawm khawmuik, viang kix ang pat hak kawx, sonsang pon sawn kix mawh pa rahsee,
12 sonsang mawh keeing pa pat hak mai ang joeng mawh ngie keeing kix pa pat hak khaing, viang mawh nan mawh son khawm kix pa hawt hu daux khaix caong krax yum rhawm keeing ex Abraham, pa hoik koe nawh ka sang pat hak heue.
Lox Sijax Mukheu Siyiex
13 Grawh grawng nawh lox mukheu pa hoik tawx ka Abraham.Ref 4:13 Jah 17:4-6; Ka 3:29. Phan ang mawh nan ka ru nawh, grawng sang mawh nawh cao sin haktiex khawmuik, ang lai mawh kheu lox lai beenli, mawh kheu pa rahsee pa dex mai krax yum rhawm heue.
14 Grawh grawng nawh phan kix pa dex mai lox lai beenli mawh cao sin, hoik yuh krax yum rhawm mawh pa giex going mai lox mukheu an kawx hoik yuh mawh pa ang koe bwanson heue.Ref 4:14 Ka 3:18.
15 Grawh grawng nawh lox lai beenli mawh pa yuh song rhawm, viang mawh nan phan ang koe lox lai beenli, dee lheu lud kawx ang koe heue.
16 Mawh kheu grawng in, pa rahsee tak mawh kheu krax yum rhawm, sonsang mawh kheu bwanson mai sonsang kaux lox mukheu ka ru khawmuik khawm leeing. Ang joeng mawh ngie ka ru pa dex mai lox lai beenli, mawh ka khawm ru pa dex mai krax yum rhawm Abraham, pa mawh keeing ex khawmuik.Ref 4:16 Ka 3:7.
17 Awm pa hoik tiiem ah nin, “Aux hoik ciak ti kieh maix mawh keeing ceu pui tom nie heue.”Ref 4:17 Jah 17:5. ka sivoe Siyiex pa yum rhawm nawh kah, pa mawh Kaw pa kieh pui yum deeh im mai pa grux krai grawng ceu pa ang nyang bax mawh, awm pa hoik mawh heue.
18 Viang Abraham ang koe dee keud pot jun pot, grawng sang mawh nawh keeing ceu pui tom nie, nawh ca keud pot jun pot mai yum rhawm grawng sang mawh awm pa hoik grux krai ah nin, “Doeh ru maix tak mawh nan heue.”Ref 4:18 Jah 15:5.
19 Krax yum rhawm nawh ang lai iak, viang nawh keud grawng tokaux nawh awm pa hoik yum, Ref 4:19 Jah 17:17.kheu nawh hoik dex koe tix yieh num mai grawng pa hoik neh hoik yum vaig Sara,
20 Viang mawh nan nawh ang keud jee keud blaong ka grawng lox mukheu Siyiex, kheu krax ang yum rhawm, viang mawh nan nawh pon sibrawm kheu krax yum rhawm tix mai yaog yaw ka Siyiex,
21 mai nawh vah rhawm grawng Kaw pa tawx lox mukheu an, mawh Kaw pa koe sibrawm ti chix yuh heue.
22 Mawh kheu nan krax yum rhawm nawh hoik sawn mawh pa rahsee son nawh heue.
23 Viang mawh nan pa hoik tiiem ah nin, “Hoik sawn mawh pa rahsee,” ang mawh ngie son Abraham khaing,
24 mawh khawm son ex, pa tak sang sawn mawh awm nang nan, ka ex pa yum rhawm ka Kaw pa kieh Simiang ex Yesux deeh kaoh im khaing krax yum heue.
25 Hoik tawx Simiang Yesux an kheu phimap mai hoik kieh deeh kaoh im, sonsang kieh ex hoek krax rahsee heue.