5
1 Mawh kheu hoik pon hoek ex krax rahsee kheu krax yum rhawm, ex tom koe pa nhim ka plak Siyiex kheu Simiang ex Yesux Khrit heue.
2 Mawh kheu Simiang an ex hoik pon laig ka daux bwanson in, dee ot dee cung ex mai ex yaw gaux rhawm ka daux krax keud pot jun pot sonsang pon min plakngai Siyiex heue.
3 Ang joeng mawh ngie nan, viang ka daux krax kha rhawm kawx, ex yaw gaux rhawm kah, kheu tawng ex krax kha rhawm chix yuh kieh lih pa pon kham geu,
4 mai pa pon kham geu chix yuh kieh lih, pa hoik cheu ti tawng mawh pa mhawm, chix yuh kieh pa keud pot jun pot lih,
5 mai pa keud pot jun pot, ang lai kieh kaig tua heue. Mawh kheu krax moh krax rhawm Siyiex hoik prauk ti sau ka daux rhawm ex, kheu Khuan Singax Singeh pa hoik tawx ka ex heue.
Cao Khrit Ot Dee Ot Ex
6 Grawh grawng nawh yam kawn iak riang ex, yam caw bawg yam yum Cao Khrit son pui pa ang chix nab yam mai pa yuh pa ang khaw ka Siyiex heue.
7 Pie pui pa sang yum tang son pui rahsee kawx neuex pa koe. Pui pa sang kwa ti yum tang son pui mhawm tee sang koe tix kaux kaux pleue.
8 Viang mawh nan Siyiex jhi mhai rug grawng pa moh Nawh ka ex, ka daux pa yum Cao Khrit son ex, yam kawn mawh ex pui phimap heue.
9 Mawh kheu nan, phan ex hoik pon ti hoek krax rahsee yam in, kheu nham Nawh Cao, ex tak sang nie lheu pon pa taoh khaing pa song rhawm Siyiex kheu Nawh Cao heue.
10 Grawh grawng nawh, yam kawn mawh ex pui koeng, hoik kieh ex deeh khaw paox tix ka Siyiex, kheu pa yum Kawn Nawh Cao, kheu hoik deeh khaw caw ex paox tix, ex tak nie lheu hoek krax taoh kheu pa im ju Nawh.
11 Mai ang joeng mawh ngie nan, ex yaw gaux rhawm khawm ka daux Siyiex kheu Simiang ex Yesux Khrit, pa hoik pon ex pa deeh khaw caw paox tix yam in, ka daux Nawh heue.
Yum Daux Adam Im Daux Cao Khrit
12 Mawh kheu nan, awm hoik laig phimap daux haktiex kheu sipieag pui tix kauxRef 5:12 Jah 2:17; 3:6. mai krax yum hoik laig kheu phimap mai mawh kheu pui khawmuik hoik yuh phimap, krax yum hoik tah ka pui khawmuik heue.
13 Ka sang koe lox lai beenli phimap hoik dawg koe ka daux haktiex, viang mawh nan phan lox lai beenli ang koe, dee deuh dee jhawp phimap kawx ang lai koe heue.
14 Viang mawh nan jah tom ju Adam, tom hoek ju Mose, krax yum hoik kwang giex kaing heue. Viang piang kix, pa ang yuh phimap awm phimap pa yuh Adam kawx, hoik giex kaing kah Adam an mawh riang lox tiag Kaw pa tak sang hoek khaix heue.
15 Viang mawh nan phimap mai totaix pa tawx giex ang lai awm paox tix. Grawh grawng nawh phan mawh kheu sipiag phimap pa yuh pui tix kaux, pui hoik yum tom nie, bwanson Siyiex hoik nie lheu ting khaing kub son pui tom nie, kheu totaix bwanson pui tix kaux pa mawh Yesux Khrit heue.
16 Grawng phimap pa lud pui tix kaux mai grawng totaix pa tawx giex ang lai awm paox tix. Grawh grawng nawh, kheu sipiag phimap tix mu, hoik pon krax prawng ciyang, viang mawh nan totaix bwanson pa tawx giex, tawx kheu phimap tom nie sonsang kieh hoek krax rahsee heue.
17 Grawh grawng nawh phan mawh kheu sipiag phimap pui tix kaux, krax yum hoik pon kwang, pon giex kaing, kheu tix Kaux, kix pa hoik pon bwanson pa kied lheu ting khaing kub mai totaix pa rahsee pa tawx giex, tak sang nie lheu pon kwang pon giex kaing ka daux pa im ju, kheu tix Kaux, pa mawh Yesux Khrit heue.
18 Mawh kheu nan awm pui khawmuik hoek krax prawng ciyang kheu sipiag phimap pa yuh pui tix kaux, awm an kheu pa rahsee pa yuh tix Kaux, pui khawmuik tom pon hoek krax rahsee, pa dex mai ju pa im heue.
19 Grawh grawng nawh awm kheu sipiag pui tix kaux pa lieh lox, pui tom nie hoik lih mawh pui phimap, awm an kheu pa cu nghiet tix Kaux, pui tom nie tak sang hoek krax rahsee heue.
20 Lheu khaing an lox tawm lai beenli baox hoek laig, sonsang nie lheu ting koe phimap, viang mawh nan dee nie lheu ting koe phimap, bwanson kied nie lheu ting khaing kub,
21 awm hoik kwang hoik giex phimap kaing ka daux krax yum, viang bwanson kawx, sang pon kwang pon giex kaing kheu pa rahsee, tom lih pon ju leeing ju kheu Simiang ex Yesux Khrit heue.