3
1 Phan mawh nan pui Yudax chix nie lheu koe bwanson yuh ka mawx? Phan ang mawh nan pa pat hak koe bwanson yuh ka mawx?
2 Koe bwanson tom nie ka daux kuceu heue. Phaox ka tix ceu, hoik tawx pong lox tawm jhawm krai Siyiex ka kix heue.
3 Viang pui tix blah ang yum rhawm kawx, khex sang yuh ka mawx? Krax pa ang kix yum rhawm, sang chix laux yuh ceu pa kaux sijax Siyiex lie?
4 Ang doh mawh nan, viang pui khawmuik laux sijax kawx, Siyiex kaux sijax awm hoik tiiem ti deuh daux Phuk lai sigang khri ah nin, “Kheu sonsang yaox pa rahsee maix, ka daux gumlox maix mai sonsang pex maix, yam laig maix daux dee prawng ca heue.”Ref 3:4 Yaog 51:4.
5 Viang mawh nan phan pa ang rahsee ex, kieh pa rahsee Siyiex sidawng, ex sang ah ka mawx? Yam tawx Siyiex pa song rhawm pa ciyang Nawh ang rahsee lie? Aux ah hawt rhawm pui heue.
6 Ang doh mawh nan. Grawh grawng nawh, phan mawh nan Siyiex tak chix prawng ca pui haktiex yuh ka mawx?
7 Viang mawh nan phan pa kaux sijax Siyiex, nie lheu ting min plakngai, kheu pa laux sijax aux, lai kawn prawng ca aux awm pui pa koe phimap yuh ka mawx?
8 Kheu ang ah, awm pui tix blah nieb ah grawng ex mai dhua ex ah “Kieh ex yuh ceu pa caox, sonsang lih hoek ceu pa mhawm?” Pa ciyang ka pui pa yuh nan khaw heue.
Pui Rahsee Ang Koe
9 Phan mawh nan yuh ka mawx? Ex lheu mhawm khaing kix lie? Ang doh lheu mhawm ceeix kawx heue. Grawh grawng nawh ex hoik ah grawng pui Yudax mai khawm pui Helasax, mawh pa ot greem phimap khawmuik,
10 Awm pa hoik tiiem ti deuh ah nin, Ang koe pui pa rahsee, pon ang koe tix kaux kawx heue.
11 Pui pa tawng pa yung ang koe. Pui pa sawg ka Siyiex ang koe heue.
12 Kix hoik lud loe khawmuik. Kix hoik rom ti mawh pa ang koe bwanson heue. Pui pa yuh pa mhawm ang koe, pie tix kaux kawx pon ang koe heue.”Ref 3:10-12 Yaog 14:1-3; 53:1-3.
13 “Ghok kix mawh simeeig pa hoik bhang heue. Kix hoik teei dak tix, ti shiao pie lhen heue.” Ref 3:13 Yaog 5:9.“Jai siuing pa cai koe greem siyieb jheeh kix heue.”Ref 2:13 Yaog 140:3.
14 “Jheeh kix naog ka lox jhax mai lox pa song heue.”Ref 3:14 Yaog 10:7.
15 “Caong kix khran phai ti kieh nham lih heue.
16 Pa laux leeing mai pa kha rhawm koe daux krax pa hu kix heue.
17 Krax pa nhim kix ang sax tawng heue.Ref 3:15-17 Isa 59:7-8.
18 Ceu pa lhat graung ka Siyiex ang koe sivoe ngai kix heue.”Ref 3:18 Yaog 36:1.
19 Ex tawng grawng can pa ah lox lai beenli, sang ah ka kix pa ot greem lox lai beenli. Kheu sonsang thox jheeh ku mu mai sonsang viex pui haktiex khawmuik hoek greem pa prawng ca Siyiex heue.
20 Mawh kheu pui tix kaux kawx ang lai hoek krax rahsee ka sivoe Siyiex, kheu pa twah pa klaung hawt lai beenli, Ref 3:20 Yaog 143:2; Ka 2:16.Grawh grawng nawh pon ti tawng grawng phimap kheu lai beenli heue.
Pon Pa Rahsee Kheu Krax Yum Rhawm
21 Viang mawh nan yam in, pa rahsee Siyiex, pa tang pa ang dex mai lox lai beenli hoik plak sidawng mai lox lai beenli mai cao jhai khankix hoik kham mhai rug ka an,
22 pa mawh pa rahsee Siyiex kheu krax yum rhawm ka Yesux Khrit,Ref 3:22 Ka 2:16. ka can kix pa yum rhawm khawmuik. Grawh grawng nawh ang lai tang siyox heue.
23 Pui hoik yuh phimap khawmuik mai ang pon hoek ka min plakngai Siyiex,
24 kheu bwanson Siyiex kix pon hoek krax rahsee giex ang tawx ngawh, kheu krax taoh pa koe ka daux Yesux Khrit,
25 pa hoik een Siyiex ti kieh mawh pa tan, kheu krax yum rhawm ka daux nham Nawh Cao, sonsang jhi pa rahsee Nawh, kheu pa gun yeung Siyiex ka daux pa kieh luan khaing phimap pa hoik yuh glang ka khankix.
26 Kheu sonsang jhi pa rahsee Nawh ka daux bawg yam in mai sonsang rahsee tokaux Nawh, yam kieh pui pa yum rhawm daux Yesux Khrit mawh pui rahsee heue.
27 Phan mawh nan grawng pa yaw rangdi koe dee mawx? Hoik nyeep kieh ot plak praix heue. Hoik mawh kheu beenli pa yuh ka mawx? Kheu krax twah klaung lie? Ang mawh. Viang mawh nan hoik mawh kheu beenli krax yum rhawm heue.
28 Mawh kheu nan ex tom sawn pa hoek pui ka krax rahsee, mawh kheu krax yum rhawm mai ang dex ka pa twah klaung hawt lai beenli heue.
29 Siyiex mawh ngie Siyiex pui Yudax khaing lie? Nawh mawh Siyiex khawm pui tang ceu ang mawh lie? Mawh heue, mawh Siyiex khawm pui tang ceu heue.
30 Grawh grawng nawh koe ngie Siyiex tix kaux khaing mai Nawh Cao tak sang kieh pui pa pat hak hoek krax rahsee kheu krax yum rhawm mai kieh pui pa ang pat hak hoek krax rahsee ka daux krax yum rhawm heue.
31 Phan mawh nan ex yuh ti kieh lox lai beenli mawh pa giex going kheu krax yum rhawm lie? Ang doh mawh nan, sex kieh lox lai beenli kaux cong heue.