2
Krax Prawng Cie Siyiex
1 Mawh kheu nan pui pa prawng ca ku kaux eue maix ang koe dee du ka phimap tix, grawh grawng nawh pa prawng ca maix ka pui tang kaux maix hoik prawng ca taix tokaux tix mawh pa khaw ti pon krax ciyang, Ref 2:1 Mat 7:1; Luk 6:37.mawh kheu prawng ca maix yuh nan ceu pa awm an heue.
2 Ex tawng grawng pa prawng ciyang Siyiex piang kix pa yuh ceu an, mawh awm pa khaw mai pa mawh meh heue.
3 Pui pa prawng ca ka pui pa yuh ceu an kix mai tokaux tix kawx yuh nang ceu pa awm an eue, maix ce ti sang pon luan khaing krax prawng ciyang Siyiex lie?
4 Phan ang mawh nan maix nieb yuh pa ang cee ang cak ka krax pa nie mi nie koe ceu pa mhawm rhawm mai pa gun yeung mai pa lang gun yeung Nawh Cao, kheu ang maix tawng grawng pa mawh in rhawm Siyiex mawh sonsang thong maix ti doh keud ka phimap tix lie?
5 Kheu pa kiien rhawm mai rhawm pa ang chix doh keud ka phimap tix mai rhawm ti deuh ceu pa song rhawm son tokaux tix, ka daux ngaix pa song rhawm mai yam sang sidawng pa prawng ciyang Siyiex rahsee.
6 Kaw pa tak sang tawx ka ku kaux daux pui awm pa khaw mai kaing pa yuh tix heue.Ref 2:6 Yaog 62:12.
7 Ka kix pa chix viex rhawm gun yeung mai ca yuh kaing pa mhawm mai sawg son min plakngai mai krax yung yi mai pa ang chix laux leeing, tak tawx ju leeing ju heue.
8 Viang mawh nan, ka kix pa yuh sipie lie sivoe mai ang cu nghiet ka pa mawh meh, viang mawh nan pa cu nghiet ka pa ang rahsee, tak tawx pa song rhawm,
9 mai pa lang teung kha rhawm mai pa khi rhawm, piang ju pui pa yuh pa caox ku kaux, ka pui Yudax ka paox tix mai ka khawm pui Helasax,
10 Viang mawh nan min plakngai mai pa yungyi mai pa nhim, ka pui ku kaux pa yuh ceu pa mhawm, ka pui Yudax ka paox tix mai ka khawm pui Helasax heue.
11 Grawh grawng nawh Siyiex ang jhak ka plakngai pui heue.Ref 2:11 Pi 10:17.
12 Grawh grawng nawh can kix pa ang koe lai beenli mai hoik lud, tak sang laux leeing khawm ang tix koe lai beenli mai can kix pa hoik lud greem lai beenli, tak sang prawng ca kix ka lox lai beenli heue.
13 Grawh grawng nawh pui pa mhong lox lai beenli mawh pa rahsee sivoe Siyiex ang mawh, viang mawh nan mawh pui pa hawt yuh lox tawm lai beenli pa tak hoek krax rahsee,
14 Grawh grawng nawh pui tang ceu khankix pa ang koe lai beenli, lak chix yuh sipie ceu pa koe ka daux lai beenli, pui inkix viang kix ang koe lai beenli kawx, kix mawh lai beenli ka tokaux tix tiru heue.
15 Kheu jhi kix kaing pa yuh lai beenli pa hoik tiiem daux rhawm kix mai dee chix keud tawng kix kham mhai rug ka an mai kheu tawng kix ti deuh phimap ka paox tix, phan ang mawh nan ti pluat ploi phimap ka paox tix heue.
16 Ka daux ngaix yam Siyiex tak sang teei Yesux Khrit mai prawng ca ka ceu pa hoik mox kawn pui, awm pa khaw mai lox bwan gaux rhawm pa sidiex aux heue.
Pui Yudax mai Lai Beenli
17 Phan maix kok tokaux tix mawh pui Yudax mai een rhawm tix ka lox lai beenli mai yaw rhang di ka daux Siyiex,
18 tawng alo Nawh Cao mai chix cheu chix liiem ka pa tang siyox, yam mhong maix pa phat lox tawm lai beenli,
19 hoik yiag tokaux tix mawh cao pa jhi krax ka pui dug ngai mai pa mawh pa riang ka kix pa ot ka daux pa vhaik,
20 mai pa gau ka pui daox aw khankix mai pa mawh sara cao gau ka kawn nyawm khankix, kheu koe grang krax tawng maix grang pa mawh meh, ka daux lox lai beenli.
21 Mawh kheu nan maix pa gau ka pui tang kaux, ang maix gau ka tokaux tix tiru lie? Maix pa sidiex gau nhie pui paw briex, tokaux maix lai briex lie?
22 Maix pa ah pui ang khaw ti lud vao, tokaux maix lai lud vao lie? Maix pa nieb yuh ti seeing ka riang grang khankix, tokaux maix lai mawh pui briex ka nyiex vad lie?
23 Maix pa yaw rangdi ka daux lox lai beenli maix lai yuh min plakngai Siyiex laux, kheu lheu maix lox tawm lai beenli lie?
24 Grawh grawng nawh pui tang ceu khankix salao ka ceu kaux Siyiex kheu pex,Ref 2:24 Isa 52:5. awm hoik tiiem daux phuk lai sigang khri heue.
25 Grawh grawng nawh been pat hak mawh pa koe bwanson phan maix mawh pui pa hawt yuh lox tawm lai beenli, viang mawh nan phan maix mawh pa lheu lox tawm lai beenli, pa pat hak maix hoik lih ti mawh pa ang pat hak heue.
26 Mawh kheu nan phan pui pa ang pat hak chix priex ti hawt been khankix pa koe daux lai beenli, pa ang pat hak nawh an, tak sang sawn ti mawh awm pa pat hak ang mawh lie?
27 Kix pa ang pat hak ka pa dex mai nex nham, phan kix grum hawt lox tawm lai beenli, tak sang prawng ka maix, pa hoik koe lox tawm lai been ka ngai lai mai pa hoik pat hak mai baox lheu ka lox tawm lai beenli ang mawh lie?
28 Grawh grawng nawh pui pa mawh pui Yudax plak praix, ang tie mawh pui Yudax tete, viang pa pat hak ka nex nham plak praix kawx, ang tie mawh pa pat hak tete,
29 viang mawh nan pa mawh pui Yudax tete, mawh pa mawh pui Yudax ka plak daux heue. Ceu pa pat hak mawh pa dex mai rhawm mai khuan mai ang mawh ka daux ngai lai heue. Ang lai mawh pa yaog yaw pui kah, mawh pa yaog yaw Siyiex kah heue.