11
Krax Caux Rhawm Siyiex
1 Phan mawh nan, aux ah nin, Siyiex hoik tik pui cie Nawh lie? Ang doh mawh nan. Grawng nawh pie tokaux aux kawx mawh pui Isarelax, pa mawh ru Abraham, pa mawh ceu Benyamin heue.Ref 11:1 Phim 3:5.
2 Siyiex ang lai tik ka pui cie Nawh pa hoik grux tawng Nawh kah Ang pex tawng grawng phuk lai sigang khri hoik ah ka mawx grawng Eliyax lie? Grawng pa khyox khaw nawh ka Siyiex, sonsang deuh phimap ka pui Isarelax ah nin,
3 “Simiang eue, kix hoik pah cao jhai Maix khankix yum, kix hoik kaong ti tik khu dee tan Maix khankix, deuk ngie aux nong nong tix kaux khaing mai kix sawg ti teei ju aux heue.”Ref 11:3 1Sim 19:10, 14.
4 Lox pa pawk Siyiex, hoik ah yuh ka mawx ka nawh? “Aux hoik prah kieh deuk pui aliah rheng son tokaux tix, pa ang sax grux ngawng ka Balax.”Ref 11:4 1Sim 19:18.
5 Awm an daux bawg yam in kawx, kawn koe pui pa deuk, awm pa khaw mai pa laug ti teei pa dex mai bwanson heue.
6 Viang mawh nan phan hoik mawh kheu bwanson, ang lai kawn baox mawh kheu krax twah klaung, phan ang mawh nan bwanson ang lai kawn baox mawh bwanson heue.
7 Phan mawh nan sang mawh pa yuh ka mawx? Ceu pa hoik sawg pui Isarelax ka, kix ang lai pon heue, viang mawh nan pa hoik laug ti teei khankix hoik pon nawh mai pa deuk khankix hoik kiien hu heue,
8 Awm pa khaw mai pa tiiem ti deuh ah nin, “Siyiex hoik tawx rhawm pa sang it nie ka kix, mai ngai pa ang pon ti yaox ka kix, yhaok pa ang pon ti mhong ka kix, tom sidah hoek ngaix yam in heue.”Ref 11:8 Pi 29:4; Isa 29:10.
9 Davit ah nin, “Kieh yuh pheen kix mawh singoe mai kie mai dee sideeing mai pa keung ti kham ti pon ka kix liak.
10 Kieh ngai kix faik hu, son ang kix lai chix yaox mai Maix kieh nyoi kix buk ku jheung jheung liak.”Ref 11:9-10 Yaog 69:22-23.
Krax Taoh Lawd Ka Pui Tang Ceu
11 Phan mawh nan aux ah nin, kix sang sideeing yuh ka mawx sonsang goh lie? Ang doh mawh nan. Viang mawh nan kheu goh kix krax taoh tom hoek ka pui tang ceu, sonsang cheeik ti kieh kix boh rhawm kah heue.
12 Phan pa goh kix mawh pa mi pa koe ka son pui haktiex mai pa som nai kix mawh pa mi pa koe ka son pui tang ceu, pa grum naog kix tak sang nie lheu kah miex ding?
13 Aux sikah ka pex pa mawh pui tang ceu, mawh kheu mawh aux kawncau pa ting ka son pui tang ceu, aux tom yaogyaw ka kaing jhaw krax pa yuh tix,
14 yuh ka mawx sonsang pon aux ti cheeik kix pa mawh ceu nex nham aux, ka tix ceu ceu sonsang boh rhawm kix ka mai hoek krax taoh tix blah kheu heue.
15 Phan pa tik vud kix mawh grawng pa deeh khaw caw pui haktiex paox tix ka Siyiex, pa sang deeh rieb ti teei kix tak sang lih bleeh ti mawh patix, lheu khaing mawh pa deeh kaoh im khaing krax yum?
16 Phan blah pa hoik kleeig nhia pa ran ti teei tix bin mawh pa singax singeh khawm pum kawx singax heue. Phan riah mawh pa singax singeh, khawm kak kawx mawh pa singax singeh heue.
17 Phan hoik raig ti tik kak tix blah mai hoik teei maix pa mawh khaox Sanlun tiag kab sau ka sinax kix mai maix hoik lih mawh pa rom ti pon riah mai bee khaox Sanlun an.
18 Paw vi yaw ti ting piang kak khankix, phan maix hoik luan yaw tokaux tix ting, paw piawm grawng ang maix mawh pa peeh riah khaox, viang mawh nan mawh riah khaox pa peeh maix heue.
19 Maix tee sang ah, “Hoik raig ti tik kak khankix sonsang kab sau aux kah heue.”
20 Mawh heue, mawh kheu ang kix koe krax yum rhawm tom hoik raig ti tik kix mai kheu yum rhawm maix tom yaox ti ot kah heue. Paw vi ting rhawm, viang mawh nan lhat graung heue.
21 Grawh grawng nawh phan Siyiex ang deuh ka kak pa mawh kak tete khankix, viang ka maix kawx Nawh ang tau ti deuh heue.
22 Mawh kheu nan jhak ka pa mhawm rhawm mai ka pa lang teung ciyang Siyiex heue. Ka piang kix pa hoik goh khankix pa lang teung ciyang, viang mawh nan ka piang maix pa mhawm rhawm Siyiex, phan maix ca kawn ot ka daux pa mhawm Nawh, phan ang mawh nan viang ka maix kawx tak sang kid ti tik heue.
23 Khawm kix kawx, phan kix ang ca kawn ot ka daux krax pa ang yum rhawm kix, tak sang teei ti kab kix ka khaox heue. Grawh grawng nawh Siyiex chix ti teei kix, ti deeh kab kix heue.
24 Phan hoik kid maix khaing khaox pa koe rhawm khaox Sanlun tiag mai hoik kab maix sau awm pa ang khaw mai been rhawm ka khaox Sanlun pa mhawm, tak sang nie lheu teei inkix pa mawh kak tete mai deeh kab sau ka khaox Sanlun cie tix miex ding.
25 Puxaik khankix eue, aux ang rhawm kieh pex mawh pa ang tawng ka grawng pa raux mox in, pa mawh grawng pa hoik kiien rhawm hu pui Isarelax tix blah, tom sang grum naog bawg yam pui tang ceu, phan ang mawh nan ha pex kox yuh ti koe pingnya, ka daux pa nieb lak yuh ti ting rhawm tokaux pex tiru heue.
26 Mawh kheu nan pui Isarelax khawmuik tak sang hoek krax taoh, awm pa hoik tiiem ti deuh ah nin, “Cao pa pluat ploi tak sang lih hoek khaing Zion. Nawh tak sang kieh veeh hu khaing pa ang nab yam ka Siyiex ka daux ceu Yakop heue.”Ref 11:26 Isa 59:20.
27 “In mawh sijax mukheu pa hoik yuh Aux mai kix, yam sang teei aux ti tik phimap kix heue.”Ref 11:27 Ye 31:33-34.
28 Phan mawh pa khaw mai lox bwan gaux rhawm kix mawh pui koeng kheu sipiag pex, viang mawh nan phan mawh pa khaw mai pa laug ti teei, kix mawh pa hoik moh kah, kheu sipiag tax du khankix heue.
29 Totaix khankix mai pa kok Siyiex kah, ang mawh ceu pa deeh tieh loh khaing heue.
30 Awm pa ang pex koe krax cu nghiet ka Siyiex, ka daux bawg yam pa hoik luan, viang mawh nan yam in hoik pon krax pa caux rhawm kheu krax pa ang cu nghiet kix,
31 Awm an inkix kawx pa ang koe krax cu nghiet yam in, kheu krax caux rhawm pa hoik tawx ka pex, kix kawx tak sang pon krax caux rhawm yam in heue.
32 Siyiex hoik laung pui khawmuik tau ka daux krax pa ang cu nghiet, sonsang pon tawx Nawh krax caux rhawm ka pui khawmuik heue.
Pingnya Cuyi Siyiex Ang Koe Dee Deek
33 Pa mi, pa koe pingnya cuyi mai krax tawng ka Siyiex mawh pa raux miex ding miex glhaong. Pa prawng ca Nawh Cao mawh pa ang uik tah sawg mai krax pa hu Nawh Cao khankix mawh pa ang chix ti sikaw miex ding miex glhaong.
34 “Mawh pui mawx pasax tawng ka rhawm Siyiex? Phan ang mawh nan mawh pui mawx pasax mawh cao pa teem kum, teem ah ka son Nawh Cao?”Ref 11:34 Isa 40:13.
35 “Mawh pui mawx pasax tawx ka Nawh Cao ka sivoe, sonsang baox deeh pon kah?”Ref 11:35 Job 41:11.
36 Can pa koe kuceu khawmuik, hoik mawh kheu Nawh mai ka daux Nawh mai son Nawh heue. Kieh Nawh Cao koe min pakngai leeing ju liak. Amen.