12
Pa Caw Kawn Khrit Ti Yuh
1 Mawh kheu nan, puxaik khankix eue, aux tom khyox khaw ka pex, kheu pa caux rhawm Siyiex, sonsang tawx pex tokaux tix, ti mawh pa tan pa im, pa singax singeh, pa khaw caw ka rhawm Siyiex, pa mawh kaing krub pa keung pex ti yuh heue.
2 Paw kieh khaw mai riang baux ju in, viang mawh nan kieh pex deeh tieh loh, kheu baox yuh rhawm tix pa khraox, sonsang chix cheu pex ti tawng, mawh pa yuh ka mawx pa mawh pa mhawm mai pa khaw caw rhawm mai pa grum mawh alo Siyiex heue.
3 Grawh grawng nawh kheu bwanson pa hoik tawx ka aux, aux tom krai ka ku kaux daux pui pa ot ka daux pex, son ang lai chax nie luan keud grawng pa ting tokaux tix tiru, khaing pa keung nawh ti keud, viang mawh nan sonsang chix keud, pa khaw pa chix priex rhawm tix keud, awm pa khaw mai krax yum rhawm pa hoik gwieh Siyiex ti tawx ka kaux pui mawx kaux pui an heue.
4 Grawh grawng nawh awm koe kraung pakpeung ex tom nie ka daux tokaux tix mu khaing, mai kaing pa yuh kraung pakpeung khankix khawmuik, ang lai awm paox tix,
5 Awm an ex pa mawh pui tom nie, mawh tokaux tix mu khaing ka daux Cao KhritRef 12:4-5 1Kaw 12:12. mai ralai mawh kraung pakpeung ka paox tix heue.
6 Ex koe totaix bwanson, pa tang siyox awm pa khaw mai bwanson pa hoik tawx ka ex, phan mawh pa mawh cao jhai ang ah, kieh ex ah lox jhai awm pa khaw mai krax yum rhawm tix heue.
7 Phan ang mawh nan, phan mawh cao sidiex kieh ex viex khawm rhawm tix yuh kaing sidiex tix heue. Phan ang mawh nan kaw pa yuh sara cao gau, kieh nawh yuh kaing gau tix heue.
8 Phang ang mawh nan kaw pa jeeh nyaw, kieh nawh yuh kaing jeeh nyaw tix heue. Kaw pa tawx, kieh nawh viex rhawm sibieh ti tawx heue. Kaw pa giex kaing, kieh nawh viex khawm rhawm ti yuh heue. Kaw pa yuh krax caux rhawm kieh nawh viex rhawm haing tix yuh heue.Ref 12:6-8 1Kaw 12:4-11.
9 Kieh krax moh krax rhawm pex mawh pa ang koe pie lhen. Koeng ka ceu pa caox mai jawg ti giex ka ceu pa mhawm heue.
10 Ka daux krax pa moh rhawm ka puxaik khankix, kieh tix kaux lai tix kaux moh paox tix mhawm mhawm heue. Ka daux krax pa yaogyaw, tix kaux lai tix kaux, yaogyaw ka tang kaux nie khaing tokaux tix heue.
11 Ka daux pa viex rhawm tix yuh, paw kieh nieh kah, viex rhawm pa rien tix yuh son Simiang.
12 Gaux rhawm ka daux pa keud pot jun pot. Gun yeung ka daux pa kha rhawm. Ca kawn viex rhawm kaux tix rawg bwan jheung jheung.
13 Tawx ceu pa lo ka pui pa singax singeh khankix. Yuh krax khan kheu heue.
14 Nawb bwan ka kix pa tuktiak ka pex, nawb bwan mai paw jhax lawg kah.
15 Gaux rhawm mai kix pa gaux rhawmRef 12:14 Luk 6:28. mai yiiem grai mai kix pa yiiem grai heue.
16 Kieh koe rhawm pa awm paox tix ka tix kaux lai tix kaux. Paw deuh rhawm pex ka ceu pa lhaong khankix, viang mawh nan yuh paox pie ka pa tiiem khankix. “Paw yuh tix koe pingnya, ka daux pa nieb lak yuh tix ting rhawm tix tiru.”Ref 12:16 Kab 3:7.s
Mai Pui Tang Ceu
17 Paw deeh tawx pa caox, ka son pa caox ka tix kaux kawx. Keud ti yu ceu pa khaw pa mhawm ka sivoe pui khawmuik heue.
18 Phan chix tix, pa koe ka plak maix, kieh koe pa nhim tau mai pui khawmuik heue.
19 Pa moh khankix eue. Paw deeh pawk bix tokaux tix, viang mawh nan yoi tix kieh koe dee ot son krax song rhawm Siyiex heue. Grawh grawng nawh, hoik tiiem ti deuh ah nin, “Pa pawk bix mawh cie Aux heue, Aux tak sang deeh viied kah, Siyiex ah nan heue.”Ref 12:19 Pi 32:35.
20 Mawh kheu nan, “Phan pui pa koeng ka maix cai rhawm, tawx nawh sawm heue. Phan nawh sang nyaux nie rawm, tawx nawh nyaux heue. Grawh grawng nawh ka daux pa yuh nan maix tak sang pum sau gaox ngu piang kaing nawh heue.”Ref 12:20 Kab 25:21-22.
21 Paw kieh pa caox pex ka pex, viang mawh nan teei ceu pa mhawm mai kieh pex ka pa caox heue.