10
Pui Isarelax Lo Lox Bwan Gauxrhawm
1 Puxaik khankix eue, pa kied mie rhawm aux mai pa rawg bwan ka Siyiex son kix, mawh sonsang hoek kix krax taoh heue.
2 Aux kham mhai rug son kix grawng pa chix viex kix khawm rhawm tix yuh son Siyiex, viang mawh nan ang khaw mai krax tawng pa mawh meh heue.
3 Mawh kheu ang kix tawng ka krax rahsee Siyiex mai sawg ti kieh krax rahsee tokaux tix koe, kix ang koe krax cu nghiet ka pa rahsee Siyiex heue.
4 Grawh grawng nawh Cao Khrit mawh dee sidah dee ghoik lox lai beenli tom hoek krax rahsee, son can pui pa yum rhawm ku kaux heue.
5 Grawh grawng nawh Mose hoik tiem grawng krax rahsee pa dex mai lox lai beenli, ah nin, “Pui pa hawt yuh lox lai beenli, tak im kheu heue.”
6 Viang mawh nan krax rahsee pa dex mai krax yum rhawm, ah nin, “Paw ah daux rhawm tix, Mawh mawx pa sang haok piang raoma?” ti sang viex Cao Khrit lih,
7 phan ang mawh nan, “Mawh mawx pa sang lih dee raux?” Ti sang viex Cao Khrit haok khaing dee yum.
8 Viang mawh nan hoik ah ka mawx? “Gumlox hoik koe dex ka maix, ka daux jheeh maix mai ka daux rhawm maix heue.”Ref 10:6-8 Pi 30:12-14. Mawh in heue, pa mawh gumlox pa dex mai krax yum rhawm, pa sidiex gau ex kah heue.
9 Mawh kheu phan maix kham grawng rieb ti teei Yesux mawh Simiang ka jheeh tix mai yum rhawm ka daux rhawm maix, grawng Siyiex hoik kieh Nawh Cao deeh kaoh im khaing krax yum maix tak sang hoek krax taoh heue.
10 Grawh grawng nawh, mawh ka rhawm heue, pa yum rhawm pui ti sang hoek krax rahsee mai mawh ka jheeh heue, pa kham grawng rieb ti teei, tom hoek krax taoh heue.
11 Phuk lai sigang khri ah nin, “Kaux pui mawx ang ah, pa yum rhawm ka Nawh Cao tak ang lai hoek krax kaig tua heue.”Ref 10:11 Isa 28:16.
12 Pui Yudax ang ah, pui Helasax ang ah, ang lai tang siyox, mawh kheu mawh ngie Simiang tix kaux khaing, pa mawh Simiang khawmuik, pa mawh pa mi pa koe ka son kix can pa kok ka Nawh khawmuik heue.
13 Grawh grawng nawh, “Can pa kok ka ceu kaux Simiang Yesux ku kaux tak sang hoek krax taoh heue.”Ref 10:13 Yol 2:32.
Pui Isarelax Thiang Lox Bwan
14 Phan mawh nan kix tak sang chix kok ka Kaw pa ang kix nyang bax yum rhawm kah, yuh ka mawx? kix tak sang chix yum rhawm ka Kaw pa ang kix nyang bax pon tix mhong grawng yuh ka mawx? phan ang koe cao sidiex gau kix tak sang chix pon ti mhong yuh ka mawx?
15 Phan ang ploi pui hu, kix tak sang pon ti sidiex gau yuh ka mawx? Awm pa hoik tiiem ti deuh ah nin, “Caong kix pa viex lox bwan gaux rhawm grawng pa mhawm mhiem khankix, mhawm grang miex ding heue.”Ref 10:15 Isa 52:7.
16 Viang mawh nan pui khawmuik hoik nghiet ka lox bwan gaux rhawm ang mawh, grawh grawng nawh Isayax hoik ah nin, “Simiang eue, mawh mawx pa hoik yum rhawm ka lox pa sidiex ex?”Ref 10:16 Isa 53:1.
17 Mawh kheu nan krax yum rhawm hoek kheu pa mhong mai pa mhong hoek kheu gumlox Cao Khrit heue.
18 Viang mawh nan aux ah nin, ang kix yaox ti mhong lie? Hoik mhong tete heue. “Lox kix hoik tah hu piang haktiex khawmuik mai gumlox kix hoik hu ka dee sidah haktiex heue.”Ref 10:18 Yaog 19:4.
19 Viang mawh nan aux baox ah nin, pui Isarelax ang tawng ka in lie? Bawg phao ka Mose hoik ah nin, “Aux tak cheeik ti kieh pex koe krax boh rhawm ka ceu pui pa ang mawh pui, Aux tak kieh pex song rhawm ka ceu pui pa ang koe krax tawng heue.”Ref 10:19 Pi 32:21.
20 Isayax sidaing kwa ti ah nin, “Kix pa ang sawg ka Aux, hoik yaox ka Aux heue. Aux hoik lih sidawng ka kix pa ang chawk ka grawng Aux heue.”Ref 10:20 Isa 65:1.
21 Viang mawh nan nawh hoik ah nin grawng pui Isarelax, “Aux hoik taong taix tix leeing ngaix ka pui ceu pa lie lox mai pa brax thiang heue.”Ref 10:21 Isa 65:2.