1 Hezakiyax kok ceu pui Isarelax mai pui Yudax khankix hoek mai nawh tiem ti tawx lai hu ka ceu pui Epharem mai ceu pui Manashe khankix, sonsang pon kix tix hoek ka nyiex bwan Siyiex daux veng Yerusaliem, sonsang pon yuh kix pawie Pasakha ka Siyiex ceu pui Isarelax heue. 2 Grawh grawng nawh, simiang mai cao kaing nawh mai cub pui hun khawmuik hoik grum rhawm ti sang yuh pawie Pasakha daux khix ra heue. 3 Mawh kheu kix ang nyang bax pon ti yuh ka pawie daux bawg yam an, kheu jao grawng ang cub cao giex kaing li pa hoik yuh tokaux cao tix singax singeh khankix nyang bax kub mai pui khankix ang nyang bax hoik khrawm paox tix tau ka daux veng Yerusaliem tan heue. 4 grawng an hoik mawh pa khaw rhawm simiang mai cub pui hun khankix khawmuik heue. 5 Mawh kheu nan, kix hoik tat rhawm ti sang yuh pa pao lox hu ka daux meung Isarelax khawmuik, jah ka veng Brashebax tom hoek ka veng Dan, sonsang hoek kix ti yuh pawie Pasakha ka son Siyiex ceu pui Isarelax ka daux veng Yerusaliem, kheu rheung ang kix lai sax yuh pawie an, awm pa hoik tat kix ti deuh heue. 6 Khaix an, cao to tix tawx lai lih hu ka daux meung Isarelax mai meung Yudax khawmuik, tau mai lai pa kaoh khaing simiang mai cao kaing mai hoik krai grawng ankix, awm gumlox pa tawm simiang ah nin, “Kawn praix Isarelax khankix eue, deeh ing ka Siyiex Abraham, Icak mai Isarelax heue. Khaix an, Nawh Cao tak sang deeh hoek ka can pex pa kawn deuk mai pa hoik glawd khaing daux tawm taix simiang meung Asurix heue. 7 paw kieh pex awm keeing pex mai puxaik pex khankix, pa hoik lud ka Siyiex keeing kix mai tom hoik yuh Nawh Cao kix laux leeing khawmuik awm hoik yaox pex nawh ka ngai tix heue. 8 Yam in paw koe krax kiien ngawg awm keeing pex khankix, viang mawh nan, appong ti tawx kaux cao pex ka Siyiex mai laig ka dah dee pa singax singeh Nawh Cao, pa hoik yuh Nawh Cao mawh pa singax singeh leeing ju mai yuh kaing jhaw Siyiex pex, sonsang deeh pon veeh Nawh Cao pa song rhawm tix luan dee singai khaing pex heue. 9 Phan pex deeh ing ka Siyiex, puxaik pex khankix mai kawn praix pex khankix, tak sang mawh pa yaox krax pa caux rhawm ka plak sivoe ngai pui pa giex laung ka kix, son tak deeh pon kix ti hoek ka daux haktiex in; mawh kheu Siyiex pex, mawh pa chix tawx bwanson mai pa caux rhawm mai pakngai Nawh Cao tak ang lai veeh tix khaing pex, phan pex deeh ing ka nawh heue. 10 Mawh kheu nan, cao to ti tawx lai khankix hoik tiang ti hu tix veng hoik tix veng ka daux haktiex Epharem mai haktiex Manashe, tom hoek dee singai ka baoh haktiex Zebulun; viang mawh nan, pui haktiex khankix nyiah sibriem ka kix mai ne ka kix heue. 11 Viang yuh nan kawx, pui khankix khaing baoh haktiex Asha, Manashe mai baoh haktiex Zebulun khankix hoik yuh tokaux cao tix tiiem mai hoek ka veng Yerusaliem tan heue. 12 Taix Siyiex koe piang pui Yudax khankix, sonsang kieh kix koe rhawm tix mu, sonsang hawt kix ti yuh ankix, awm lox tawm simiang mai cao kaing khankix, ka daux gumlox Siyiex heue. 13 Yam in pui tom nie pa mawh cub pui hun pa kied ting tix cub, hoik khrawm paox ti hoek ka daux veng Yerusaliem sonsang yuh kix pawie blah pa ang sau susaix ka daux khix ra heue. 14 Kix yaog ti kaoh mai teei khu dee tan khankix pa hoik koe ka daux veng Yerusaliem hu dee singai mai kix hoik teei khu dee tan nyawng bhawng khankix hu khawmuik mai hu tik ceu ankix daux rawm klawng iak Kidaron heue. 15 Khaix an, kix pah kawn yung iak Pawie Pasakha ka daux khix ra kao pon ngaix heue. Cao giex kaing li mai pui Lewix khankix viex krax tan pa gleeing khankix hoek ka nyiex bwan Siyiex heue. 16 Kix cung ti ot ka dee ot tix, awm pa koe been kix, awm gumlox beenli pa hoik tawm Mose pui Siyiex; cao giex kaing li khankix phruat nham pa hoik rieb kix ti teei khaing tawm taix Lewix khankix heue. 17 Mawh kheu pui pa ang nyang bax yuh tokaux tix singax singeh kawn koe tom nie ka daux cub pui hun khankix; mawh kheu nan, pui Lewix khankix hoik mawh pa teei beeh glawm ti pah kawn yung iak pawie Pasakha son ku kaux, pui pa ang nyang mawh pa singax mai sonsang deeh yuh kix singax singeh son Siyiex heue. 18 Mawh kheu pui pa kied haoh hun tix cub hoik mawh pa kied nie khaing daux ceu pui Epharem, ceu pui Manashe, ceu pui Isarelax mai ceu pui Zebulun khankix, mawh pa ang nyang bax yuh tokaux cao tix singax singeh, viang yuh nan kawx, kix hoik ih ka kawn yung iak pawie Pasakha mawh pa tang siyox khaing pa hoik tiem ti deuh heue. Viang mawh nan, Hezakiyax rawg bwan ka son kix ka daux krax ah nan, “Kieh Siyiex pa mhawm yuh ti tawx krax pluat ploi son pui ku kaux, 19 “Pa khre rien rhawm tix sonsang sawg Siyiex pa mawh Siyiex keeing kix khankix, viang nawh ang mawh pa singax singeh, awm hoik singax dee pa singax singeh an heue. 20 Siyiex nghiet ka Hezakiyax mai cox pai pui khankix heue. 21 Mawh kheu nan, kawn praix ceu pui Isarelax khankix, pa hoik ot ka daux veng Yerusaliem, hoik yuh pawie blah pa ang sau susaix aliah ngaix tau mai krax pa gaux rhawm tix; pui Lewix khankix mai cao giex kaing li khankix, hoik yaogyaw ka Siyiex tix ngaix hoik tix ngaix mai ah nin ka son Siyiex tau mai kraung ting khankix, pa ting sinum heue. 22 Hezakiyax tawx riang rao pui Lewix khankix pa hoik gau krax tawng yung, pa mhawm Siyiex mai hoik ih, hoik nyaux ka daux aliah singaix mai tawx krax tan pa nhim mai yuh krax pa khyox khaw ka Siyiex keeing kix heue. 23 Khaix an, can pui hoik kraix khrawm tix hoek daux bang kum khawmuik, hoik khaw rhawm tix sang deeh baox yuh pawie an, aliah singaix mai kix hoik baox yuh pawie an aliah singaix ka daux pa gaux rhawm tix heue. 24 Hezakiyax simiang meung Yudax tawx moi tix rheng mu mai yung aliah rheng mu ka cub pui hun khankix mai cub cao kaing khankix kawx tawx moi tix rheng mu mai yung tix mheen mu, ka cub pui hun khankix; mai cao giex kaing li pa kied hun khankix hoik yuh tokaux cao tix singax singeh heue. 25 Cub pui hun Yudax khawmuik, hoik gaux rhawm tau mai cao giex kaing li mai pui Lewix khankix mai cub pui hun khawmuik pa hoek khaing meung Isarelax, nyo sinie pa hoek khaing haktiex Isarelax mai pa ot ka daux meung Yudax khankix heue. 26 Mawh kheu nan, krax pa kied ting gaux rhawm hoik koe ka daux veng Yerusaliem, jah tom glang bawg yam Sawlamon kawn simex Davit, pa mawh simiang haktiex Isarelax, can pa awm in ang sax koe ka daux veng Yerusaliem heue. 27 Khaix an, cao giex kaing li mai pui Lewix khankix yaog ti kaoh mai nawb bwan piang pui hun khankix mai lox sinum kix, hoik mawh pa mhong tix mai lox bwan rawg kix hoik haok tom hoek ka dee ot dee koe pa singax singeh Nawh Cao ka daux meung raoma heue.