29
1 Hezakiyax yaog ti mawh simiang yam koe ju nawh tixnga phwan num mai nawh hoik kwang haktiex tixnga dim num, ka daux veng Yerusaliem heue. Ceu kaux miex nawh mawh Abiyax kawn bun Zakharix heue.
2 Nawh yuh can ceu pa khaw caw ka daux plak sivoe ngai Siyiex awm krax pa hoik yuh keeing nawh Davit khawmuik heue.
3 Ka daux num pa kwang nawh dau num jah ka daux khix tix, nawh paoh siviex nyiex bwan Siyiex mai deeh cox ka heue.
4 Khaix an, nawh deeh viex cao giex kaing li mai pui Lewix khankix hoek mai khrawm kix ka daux bing pak plak lih singaix,
5 mai ah nin ka kix, “Pui Lewix khankix eue, nghiet ka aux, “yam in yuh tokaux cao pex singax mai yuh nyiex bwan Siyiex keeing pex khankix singax mai teei ti tik kraung pa seeing khankix khaing dee pa singax singeh heue.
6 Mawh kheu keeing ex khankix hoik lud mai hoik yuh pa caox caig ka plak sivoe ngai Siyiex ex; kix hoik tik hoik vud ka nawh mai hoik veeh plakngai tix hu dee singai khaing dee ot dee koe Siyiex mai veeh blawg tix plak nawh cao heue.
7 Kix baox nyeep ti deuh siviex sidub nyiex bwan mai hoik preet kawk ngu mai ang lai gleeing nyawng bhawng mai ang lai tan krax tan pa gleeing khankix ka dah dee pa singax singeh ka nyiex ceu pui Isarelax khankix heue.
8 Mawh kheu nan, krax pa song rhawm Siyiex hoik lih piang meung Yudax mai piang veng Yerusaliem mai tawx krax pa kha rhawm ka kix mai yuh kix daox deng mai yuh kix koe lox sa lox lao, awm yaox pex nawh ka ngai tix heue.
9 Mawh kheu jao grawng in, keeing ex hoik goh ti yum ka vaig mai kawn simex kawn bun ex khankix mai moeng ex hoik yaox ti ot ka daux pa giex laung heue.
10 Yam in aux koe rhawm tix sang yuh, sijax mukheu tau mai Siyiex ceu pui Isarelax, mawh sonsang kieh krax pa kied song rhawm Nawh Cao veeh tix hu singai khaing ex heue.
11 “Kawn simex aux khankix eue, paw kieh pex koe rhawm nieh rhawm ciien yam in liak, mawh kheu Siyiex hoik laug ti teei pex, sonsang pon cung pex ti yuh kaing jhaw ka plak sivoe Nawh Cao mai sonsang yuh kaing jhaw pa tok nyawng bhawng ka son Nawh Cao heue.
12 Khaix an, pui Lewix inkix pa mawh Mahat kawn simex Amashie mai Yawlax kawn simex Azarix, doeh ru Kawhat; doeh ru kawn simex Merarix pa mawh Kishax kawn simex Abadix mai Azarix kawn simex Yehalelax; daux doeh ru Geshon pa mawh Joah kawn simex Zimma mai Edem kawn simex Joah,
13 doeh ru kawn simex Elizaphan, mawh Shimri mai Yeyelax; doeh ru kawn simex Asapha, pa mawh Zakharix mai Matannia,
14 doeh ru kawn simex Heman, pa mawh Yehilax mai Shemix; doeh ru kawn simex Yedutum, pa mawh Shemayax mai Uzilax,
15 kix yaog ti kaoh kraix khrawm ti deuh puxaik kix mai yuh tokaux cao kix singax mai hoik hawt awm lox tawm simiang ka daux gumlox Siyiex ti deuh, sonsang singax singeh yuh kix pa nyiex bwan Siyiex heue.
16 Khaix an, cao giex kaing li khankix laig ka plak daux nyiex bwan Siyiex sonsang yuh tix nawh singax singeh mai teei can nyhee pa yaox kix ka daux nyiex bwan Siyiex heue. Pui Lewix khankix, teei ceu ankix lih mai don ti tik ka daux rawm klawng iak Kidaron heue.
17 Yam in, kix jah ti yuh krax pa singax singeh ka daux khix tix, tix ngaix mai ka daux daix singaix khix an, kix hoek ka sidub nyiex bwan Siyiex heue. Khaix an, kix yuh nyiex bwan Siyiex singax singeh ka daux daix ngaix mai ka daux kao liah singaix daux khix tix, kix hoik yuh ankix hoik heue.
18 Khaix an, kix hu laig ka dee ot simiang Hezakiyax ah nin, “Yix hoik yuh nyiex bwan Siyiex khankix singax singeh khawmuik mai khu krax tan pa gleeing khankix, khawm kraung pa shiao khankix mai pheen pa khan blah, khawm kraung pa shiao nawh khankix khawmuik heue.”
19 Lheu khaing an, can ceu kraung shiao pa hoik tik hoik vud simiang Ahaza khankix, dau baux yam kwang nawh, ka haktiex yam hoik lud nawh khankix, yix hoik cox khre cox priex mai hoik mawh pa singax singeh mai can ceu ankix, mawh pa koe tan plak sivoe krax krub dee tan Siyiex heue.
20 Khaix an, simiang Hezakiyax yaog ti kaoh caocao mai khrawm cao pa kwang ka daux veng khankix mai kix haok ka nyiex bwan Siyiex heue.
21 Kix teei ti viex moi aliah mu, yung aliah mu, kawn yung iak aliah mu mai khawm pex mhaing aliah mu, yung krax tan pa pluat ploi phimap, son haktiex mai son dee pa singax singeh mai son meung Yudax khankix heue. Khaix an nawh tawm lox ka cao giex kaing li khankix pa mawh kawn simex Arun, sonsang tan ceu ankix piang khu dee tan Siyiex heue.
22 Mawh kheu nan, kix pah mawie khankix mai cao giex kaing li rieb ti teei nham mai phruat ankix piang khu dee tan an heue. Awm an, kix hoik pah yung khankix mai phruat nham piang khu dee tan heue. Kix baox deeh pah kawn yung iak khankix mai phruat nham piang khu dee tan heue.
23 Khaix an, kix viex pex mhaing khankix lih, yuh krax tan pa pluat ploi ka sivoe simiang mai ka plak sivoe pui hun mai kix deuh taix tix piang ankix heue.
24 cao giex kaing li pah ankix yum mai kix tan ti deuh nham piang khu dee tan son krax tan pa pluat ploi phimap, krax pa khyox khaw son ceu pui Isarelax khawmuik, mawh kheu simiang hoik tawm lox ka kix, sonsang yuh kix krax tan pa gleeing mai krax tan pa pluat ploi phimap ka son ceu pui Isarelax khankix khawmuik heue.
25 Khaix an, nawh tawx pui Lewix khankix ka daux nyiex bwan Siyiex tau mai chiang, ting pa koe maox mai ting plah kaox feuk khankix, awm gumlox tawm Davit mai cao jhai cie simiang pa mawh Gat mai cao jhai Natan heue. Grawh grawng nawh, an hoik mawh lox tawm ping nyap Siyiex ti deuh khaing cao jhai khankix heue.
26 Pui Lewix khankix yaog tix cung tau mai kraung ting pa hoik yuh Davit ti deuh mai cao giex kaing li khankix cung tau mai teettawng heue.
27 Khaix an, Hezakiyax tawm lox ka kix, son song tan kix krax tan pa gleeing piang khu dee tan heue. Yam jah kix ti yuh krax tan pa gleeing, kix kawx ah lai rhax yaogyaw Siyiex tau mai teettawng mai kraung ting pa hoik yuh Davit pa mawh simiang ceu pui Isarelax ti deuh heue.
28 Mawh heu nan, cub pui hun khawmuik krub ka Siyiex mai cao pa ah lai rhax khankix hoik ah lox rhax kix mai cao phlu teettawng kix hoik kieh teettawng si num; kix khawmuik sitoe ti hu tom hoek bawg yam yuh kix krax tan pa gleeing heue.
29 Yam hoik naox kix krax tan khankix, simiang mai can pui pa ot tau mai nawh khankix, hoik gup kaing tix mai krub ka heue.
30 Lheu khaing an, simiang Hezakiyax mai cub cao kaing khankix, tawx lox tix ka pui Lewix, sonsang rhax kix lai rhax yaogyaw ka Siyiex ka gumlox kab Davit mai cao jhai Asapha heue. Mawh kheu nan, kix hoik rhax lai rhax yaogyaw tau mai krax gaux rhawm mai kix gup kaing tix mai krub ka heue.
31 Khaix an, Hezakiyax deeh pawk lox ah nin, “Yam in, pex hoik appong tokaux cao tix ka Siyiex, hoek dee dex mai viex krax pa appong tix khankix mai krax tan pa yaogyaw khankix laig ka daux nyiex bwan Siyiex heue. “Mawh kheu nan, cub pui hun khankix, viex krax pa appong mai viex krax tan pa gleeing tix khankix hoek heue.
32 carang krax tan pa gleeing pa hoik viex cub pui hun khankix mawh mawie atixgliah mu, yung tiyieh mu mai kawn yung iak ra yieh mu; inkix khawmuik mawh son krax tan pa gleeing ka Siyiex heue.
33 Can ceu pa appong ti tan khankix, mawh mawie liah yieh mu mai yung khankix loe rheng mu heue.
34 Viang mawh kawx nan, cao giex kaing li khankix hoik kied tux, kix ang pon peeik hak tobrie krax tan pa gleeing khankix khawmuik; mawh kheu nan, puxaik kix pui Lewix khankix yaox tix teem ka kix yam hoik sidah yuh kix kaing mai tom hoek bawg yam hoik yuh cao giex kaing li tang kaux khankix tokaux cao tix singax singeh, mawh kheu pui Lewix khankix, hoik nie lheu sau riang rao tokaux cao tix ka grawng pa yuh tix nawh singax singeh khaing cao giex kaing li khankix heue.
35 Krax tan pa gleeing khankix hoik baox lheu tom nie mai klon bee, krax tan pa nhim, khawm krax tan pa nyaux khankix, son krax tan pa gleeing kuceu heue. Mawh kheu nan, kaing jhaw daux nyiex bwan Siyiex hoik mawh pa grum yuh tix heue.
36 Khaix an, Hezakiyax mai pui khankix koe krax pa gaux rhawm ka pa hoik khre rien Siyiex ti tawx ka pui khankix, kheu hoik kied phai hoik grawng ankix heue.