1 Yam in, yam hoik ceu inkix khawmuik, pui Isarelax pa hoik hoek tan khawmuik, lih hu ka veng meung Yudax mai raig ti tik rong simaox singax tom phawng mai kid ti tik khaox riang grang siyiex Asherax mai yieh ti tik dee pa lhaong khawm khu dee tan ka daux meung Yudax khawmuik mai haktiex Binyamin haktiex Epharem mai haktiex Manashe, tom hoek bawg yam yuh kix, ceu ankix laux leeing pak lawg khawmuik heue. Khaix an, kawn praix ceu pui Isarelax khankix deeh ing ka veng cao tix mai pui ku kaux hoik tang deeh ing ka haktiex brex brum cie tix heue. 2 Hezakiyax tang gwieh ti tawx beeh glawm cub mawx cub an, ka cao giex kaing li mai pui Lewix khankix, awm pa hoik gwieh khaing cub caw mai pui ku kaux awm pa koe kaing jhaw nawh, cao giex kaing li mai pui Lewix khankix, tan krax tan pa gleeing mai krax tan pa nhim, yuh kaing jhaw pa yaogyaw bwanson mai ah lox rhax yaogyaw ka daux diang siviex Nyiex bwan Siyiex heue. 3 Simiang baox teei khaing daux sinngao ka plak cie nawh, son krax tan pa gleeing pa mawh son krax tan pa gleeing ka daux plak ponngawb mai plak ponbo mai krax tan pa gleeing khankix, son singaix twah mai son singaix haok khix khraox mai yam hoek bawg pawie, awm pa hoik tiem tix ka daux gumlox been Siyiex heue. 4 Lheu khaing an nawh tawx lox tix ka pui pa ot ka daux veng Yerusaliem khankix, sonsang tan kix ti tawx nyum ka son cao giex kaing li mai pui Lewix khankix, sonsang pon sau kix riang rao tix ka gumlox been Siyiex heue. 5 Yam hoik roi kix lai gumlox an, hu kudah dee dom mawx dom an, kawn praix Isarelax khankix, viex plix khaox pa pon kix phao voe mai rawm plix siiet khawm rawm bee mai khawm rawm hia khawm can pa pon kix khaing daux kaung daux ma khankix kao son tix son tom nie heue. 6 Ceu pui Isarelax mai ceu pui Yudax khankix, viex moi mai yung khankix, hoek kao son tix son mai gwieh mawh ceu pa singax singeh, pa hoik appong kix ti tawx, ka Siyiex kix kao son tix son mai kix hoik pum ti deuh ceu ankix heue. 7 Ka daux khix loe, kix jah tix pum ankix mai kix hoik naox krax yuh tix ka daux khix aliah heue. 8 Yam hoek yaox Hezakiyax mai cub cao kaing khankix, krax pa hoik pum ti deuh khankix, kix yaogyaw ka Siyiex mai nawb bwan ka ceu pui nawh Isarelax khankix heue. 9 Khaix an, Hezakiyax chawk ti yaox cao giex kaing li mai pui Lewix khankix, son grawng sinngao krax pa hoik cu kix tix pum khankix heue. 10 Azarix pa mawh cao kaing ting cub cao giex kaing li khankix pa kaoh khaing daux nyiex Zadok, pawk lox ka nawh ah nin, “Glang hoik jah pui khankix ti viex krax tan hoek ka daux nyiex bwan Siyiex, yix hoik kub ih kub un mai kawn deuk tom nie heue. Mawh kheu Siyiex hoik nawb bwanson piang pui Nawh khankix mai can ceu pa kawn deuk in tom mawh pa kied haoh hun heue. 11 Yam in Hezakiyax tawx lox ka kix, sonsang khre kix ti priex lawg khankix, ka daux nyiex bwan Siyiex mai kix hoik khre ti priex ceu ankix heue. 12 Khaix an, kix viex krax tan tix khankix, hoek kao son tix son, ka daux krax pa kaux sijax tix mai appong ti tawx ceu an khankix, pui Lewix pa mawh Kawnanix hoik mawh cao pa kwang piang kix mai puxaik nawh Shimix mawh cao pa kwang greem nawh heue. 13 Yehilax, Azazix, Nahat, Asahelax, Yerimot, Yawzabat, Elelax, Isamakhiyax, Mahat mai Beneyax khankix hoik mawh cao pa jhak pa ngiien kaing khankix, greem tawm taix Kawnanix mai pux nawh Shimix, ka daux lox tawm simiang mai Azariyax cao pa kwang ka daux nyiex bwan Siyiex heue. 14 Korax kawn simex Imnax, pa mawh pui Lewix cao pa pau diang siviex plak li singaix hoik mawh cao pa kwang piang krax tan pa koe rhawm pui khankix ti tan ka Siyiex mai sonsang deeh gwieh nawh ti tawx krax tan cie Siyiex khankix khawm can ceu pa kieh singax singeh khankix heue. 15 greem nawh khankix mawh Eden, Minimin, Yeshua, Shemayax, Amariyax mai Shekhaniyax pa mawh cao teem pa kaux sijax nawh ka cao giex kaing li daux veng khankix mai sonsang mawh kix cao pa roi ti tawx kraung ceu pa gwieh tix khankix, ka puxaik kix awm krax pa koe cub caw mawx cub caw an, ka cub ting mai cub iak khankix heue. 16 Lheu khaing simex an khankix, jah ka pa koe ju loe num haok plak piang mai pa hoik tiem tix laig ka daux carang doeh ru mawx ceu cat an, kix hoik roi ti tawx ankix ka pui ku kaux, pa hoik laig ka daux nyiex bwan Siyiex mai krax pa pon nawh tix ngaix son grawng kaing jhaw pa yuh nawh, ka daux cub caw nawh, 17 Cao giex kaing li an khankix pa hoik tiem ti laig ka daux carang doeh ru kix, awm pa koe doeh nyiex ma keeing kix mai son pui Lewix an khankix jah khaing pui pa koe ju tixnga num haok plak piang, awm pa koe kaing kix ka daux cub daux caw kix, 18 son pui khawmuik pa hoik tiem tix laig ka daux carang doeh ru kix, khawm kawn nyawm iak mai moeng kix, khawm kawn simex kawn bun kix mai cub caw kix khawmuik, mawh kheu ka daux krax pa kaux sijax, kix hoik singax yuh tokaux cao kix ka daux krax pa singax singeh heue. 19 Awm an, son kawn simex cao giex kaing li Arun khankix, pa ot daux tong kaung haktiex pui hun veng cie kix khankix mai pa ot ka daux veng ku veng mai can simex khankix, pa hoik teei carang pa koe ceu kaux sonsang roi kix ti tawx nyum pa pon kix, ka kawn nyawm simex khankix, pa koe ka daux sinax cao giex kaing li mai pui pa hoik laig carang doeh ru kix khawmuik, ka daux sinax pui Lewix khankix heue. 20 Mawh kheu nan, Hezakiyax hoik yuh ceu ankix ka daux meung Yudax mai nawh hoik yuh can ceu pa mhawm mai pa rahsee mai pa mawh meh haktiex kix ka plak sivoe Siyiex heue. 21 Ka daux kaing ceu pa yuh nawh khankix kuceu, nawh hoik jah ankix ka daux kaing jhaw nyiex bwan Siyiex mai ka daux gumlox beenli mai ka daux lox tawm pingnyap khankix mai sawg nawh ka Siyiex tix, nawh hoik yuh ceu an khawm rhawm khawm rhi tix khawmuik heue. Mawh kheu nan, nawh hoik koe krax pex krax pon ka heue.