1 Ahaza hoik koe ju tixnga num yam yaog nawh ti mawh simiang mai nawh kwang haktiex kao liah num ka daux veng Yerusaliem; mai nawh ang cu ti yuh ceu pa khaw caw ka plak sivoe ngai Siyiex awm pa hoik yuh keeing nawh Davit heue. 2 Mawh kheu nawh hawt lawng daux krax pa yuh simiang meung Isarelax mai raug ti yuh riang grang son siyiex Balax heue. 3 Nawh gleeing nyawng bhawng ka daux ngawd kawn simex Hinnom mai gleeing ti tan kawn praix nawh khankix ka daux ngu, awm krax pa seeing brai ceu pui ankix, pa hoik grheu Siyiex nawh lih khaing plak sivoe kawn praix ceu pui Isarelax khankix heue. 4 Nawh appong ti tan mai gleeing nyawng bhawng piang dee pa lhaong piang gawng mai ka greem num pang khaox klai lhax kudah heue.

5 Mawh kheu nan, Siyiex hoik ap ti tawx nawh ka daux tawm taix simiang meung Surix heue. Kix pex nawh mai teei ti viex cub pui hun hu awm pui pa giex laung mai hoik viex kix hoek ka veng Damase heue. Khaix an, nawh ap tix ka daux tawm taix simiang meung Isarelax pa hoek ka nawh taux mai krax pah yum pa kied ting heue. 6 Ka daux tix singaix ngie, Peka kawn simex Remalix hoik pah pui Yudax pa koe rhawm vao rhawm kwa tix sien ra mheen kaux yum, kheu jao grawng hoik tik vud kix ka Siyiex keeing kix heue. 7 Zikharix pa mawh pui pa kied ting riang rao daux Epharem hoik pah ka Maseyax kawn simex simiang Azarikam pa mawh cao kaing pa kwang ka daux nyiex nawh mai Elakanax pa mawh simiang ra kaux tix kaux heue. 8 Ceu pui Isarelax khankix giex ti teei puxaik puxo, kawn simex kawn bun kix ra sien kaux mai kix baox rhim ti teei kraung khrai tom nie viex hoek ka veng Samarix heue. 9 Viang mawh nan, cao jhai Siyiex pa ot tan tix kaux pa ceu kaux nawh mawh Odiet, mai nawh hu plak sivoe cub kru naing pa deeh hoek ka veng Samarix mai ah nin ka kix, “Jhak heue, mawh kheu jao grawng hoik song rhawm Siyiex keeing pex khankix ka meung Yudax, Nawh Cao hoik ap ti tawx ka daux tawm taix pex; viang mawh nan, pex hoik pah kix yum ka daux pa song rhawm tix tom hoek ka daux meung raoma heue. 10 Yam in pex sang khin kawn praix meung Yudax mai pui veng Yerusaliem mawh siliex simex siliex bun pex; viang mawh nan, mawh ang pex koe krax lud ka plak sivoe Siyiex Cao pex lie? 11 “Yam in nghiet ka lox aux, pex deeh tawx pui pa giex laung pa hoik rhim pex ti teei khaing puxaik pex khankix ing, phan ang mawh nan, krax pa kied song rhawm Siyiex tak hoek piang pex heue. 12 Khaix an, cao kaing kawn praix Epharem khankix tiblah pa mawh Asariya kawn simex Yohanan, Berekhiya kawn simex Hadalie khankix pa hoik cung tix tieb can pui ankix pa hoik hoek khaing daux naing, 13 ah nin ka kix, “Pex tak ang pon ti viex pa giex laung inkix hoek tin, mawh kheu ex hoik koe krax pa lud loe ka Siyiex heue. Pex sang baox naok ankix piang phimap ex mai piang pa lud tix khankix, mawh kheu nawh, krax pa lud ex hoik mawh pa kied ting mai krax pa kied meet rhawm an koe piang ceu pui Isarelax khankix heue.” 14 Mawh kheu nan, cub pui naing khankix, hoik prah ka pui pa giex laung tix khankix mai khawm kraung pa pon tud rhim tix khankix ka plak sivoe cao kaing mai cub phung pui hun khankix khawmuik heue. 15 Khaix an, can pui pa hoik mhai kix ceu kaux khankix yaog ti kaoh mai hoik teei pui pa giex laung an khankix mai khaing daux kraung pa tud rhim ankix teei ti tawx pui pa ang koe kraung ceep khankix daux sinax kix mai tawx kix ceep kraung, tawx kix ceep kiiep mai tawx pa ih ka kix khawm rawm nyaux khankix mai kraix bee ka kix heue. Hoik kieh kaux pui pa ang koe riang khankix brug la heue. Mawh kheu nan, kix hoik deeh viex kix hoek ka puxaik kix ka daux veng Yerikho, pa mawh veng pa koe pang khaox jhie yaong khankix heue, Khaix an, kix deeh ing ka veng Samarix heue.

16 Ka daux bawg yam an, Simiang Ahaza ploi cao cau khankix hu kok cub simiang meung Asurix khankix sonsang teem ka nawh heue. 17 Mawh kheu pui Edom khankix baox hoek puing ka meung Yudax mai giex ti viex pui khankix hu heue. 18 Can pui Philitix khankix baox deeh laig tix puing veng khankix pa koe ka dee lung haktiex mai ka plak seh meung Yudax khankix mai hoik rhim ti teei veng Biet-shemiet, veng Ayalon, veng Gederot, veng Sawkhaw, khawm nyiex yaong nawh khankix, veng Timna khawm nyiex yaong nawh khankix mai veng Gimzaw khawm nyiex yaong nawh khankix mai kix pang ti ot tan heue. 19 Siyiex yeen meung Isarelax tiiem kheu jao Ahaza simiang Isarelax mai kheu jao hoik laux jhawm mhawm ka daux meung Yudax mai nawh ang lai baox koe krax pa kaux sijax ka Siyiex heue. 20 Tigalatpilesa pa mawh simiang meung Asurix hoek ka nawh mai hoik yuh krax pa laux rhawm nawh mai ang cu tix tawx krax teem ka nawh heue. 21 Grawh grawng nawh, Ahaza hoik gwieh ti teei sinngao kraung khrai khankix khaing daux nyiex bwan Siyiex mai khaing daux nyiex simiang mai khaing daux cie cao kaing an khankix mai nawh hoik tawx ankix ka simiang meung Asurix; viang mawh nan, nawh ang teem ka nawh heue.

22 Yam in ka daux bawg yam laux rhawm simiang Ahaza, nawh kied nie ang koe krax pa kaux sijax ka Siyiex heue. In mawh grawng krax pa yuh simiang Ahaza heue. 23 Mawh kheu nawh hoik appong ti tan ka siyiex veng Damase pa hoik pex ka nawh ah nin, “Mawh kheu teem siyiex simiang meung Surix ka kix, aux tak sang appong krax tan tix ka kix, sonsang pon kix tix teem ka aux heue. “Viang mawh nan, siyiex ankix hoik mawh pa kieh simiang Ahaza mai ceu pui Isarelax khankix khawmuik laux leeing heue. 24 Mawh kheu nan, Ahaza deeh kraix khrawm kraung khrai nyiex bwan Siyiex khankix tau, hoik pat ti tik kraung khrai nyiex Siyiex khankix phawng mai hoik nyeep ti deuh siviex nyiex bwan Siyiex khankix mai yuh ti deuh khu dee tan khankix son tokaux cao nawh daux veng Yerusaliem ku daog ku dawn heue. 25 Ka daux veng Yudax khankix ku veng, nawh hoik yuh ti deuh dee pa lhaong khankix sonsang gleeing tix nyawng bhawng ka siyiex tang kaux tang hak mai kieh pa song rhawm Siyiex keeing nawh lih heue. 26 Yam in grawng kaing pa ghoik nawh ti yuh khankix mai grawng krax pa yuh nawh khankix khawmuik yam jah tom sidah, kix hoik tiem ti deuh grawng ankix ka daux phuk lai been cub simiang meung Yudax mai meung Isarelax khankix heue. 27 Mawh kheu nan, Ahaza hoik laux lee it tau mai keeing nawh mai kix sipaung nawh ka daux veng Yerusaliem; viang mawh nan, kix ang viex nawh laig ka daux simeeig cub simiang meung Isarelax khankix heue. Khaix an, kawn simex nawh Hezakiyax hoik deeh plud ti kwang haktiex ka dah dee ot nawh heue.