1 Yoshax hoik koe ju aliah num yam yaog nawh ti mawh simiang mai nawh hoik kwang haktiex tixpon num ka daux veng Yerusaliem heue. Ceu kaux miex nawh mawh Zibiyax pui veng Berashebax heue. 2 Yoshax yuh ceu pa khaw caw ka daux plakngai Siyiex, glang daux baux singaix cao giex kaing li Yehoyadax heue. 3 Yehoyadax teei nawh koe moeng ra kaux mai nawh hoik pon kawn simex mai kawn bun khankix heue. 4 Yam in ceu ankix hoik lih ti mawh khaix in, Yoshax hoik tat rhawm tix sonsang deeh cox ka nyiex bwan Siyiex heue. 5 Khaix an, nawh khrawm cub cao giex kaing li mai khrawm cub pui Lewix khankix mai ah nin ka kix “Lih hu ka veng Yudax khankix mai khrawm ti viex mau khaing pui Isarelax khankix khawmuik, sonsang deeh cox ka nyiex bwan Siyiex pex, jah tix num hoik tix num mai jhak ti yaox ka daux krax pa sang pon pex ti yuh ankix phaiphai heue. “Viang yuh ka mawx kawx, pui Lewix khankix ang cu ti yuh ceu ankix phaiphai heue. 6 Mawh kheu nan, simiang kok ka Yehoyadax cao giex kaing li pa ting mai ah nin ka nawh “Maix ang tie tawm pui Lewix khankix viex mau tan mau lu son pa kham sakse nyiex gox bwan meung Yudax mai khaing daux veng Yerusaliem, awm pa koe lox tawm Mose, pa mawh kawncau Siyiex mai khaing cub pui hun Isarelax yuh ka mawx lie? 7 Mawh kheu kawn simex Athaliyax bun pa caox caig an, hoik preeng tix laig ka daux nyiex bwan Siyiex mai hoik baox teei ti tawx can ceu pa hoik appong tix khankix daux nyiex bwan Siyiex ka siyiex Balax khankix heue. 8 Khaix an, simiang tawm lox kieh kix yuh teug tix mu mai deuh plak praix hawt diang siviex nyiex bwan Siyiex heue. 9 kix hoik yuh ti tawx lox pao hu ka daux meung Yudax mai ka veng Yerusaliem, sonsang viex kix krax tan hoek ka Siyiex, awm krax pa hoik gwieh Mose ti tawx piang ceu pui Isarelax khankix ka daux tiagtu heue. 10 Khaix an, cao kaing khankix mai pui khawmuik hoik koe krax pa gaux rhawm mai viex krax tan ti hoek mai sau ti priex ka daux teug tom hoik tawx kix nawh khawmuik heue. 11 Mawh kheu nan, ceu an hoik lih ti mawh, ka daux bawg yam an ceu pui Lewix khankix viex teug an hoek ka daux lum simiang mai yam yaox kix ka hoik kied nie mau, cao tiiem lai simiang mai cao giex kaing li pa ting khankix hoek mai thawk teug an yi mai deeh teei ti deuh teug an ka daux dee ot prim heue, Kix hoik yuh awm an tix ngaix hoik tix ngaix mai hoik khrawm mau tom nie heue. 12 Khaix an, simiang mai Yehoyadax tawx mau ka pui pa yuh kaing jhaw nyiex bwan Siyiex mai kix cang kix cao pa yuh kaing kaw tiex mai cao pa yuh kaing khaox sonsang deeh cox kix ka nyiex bwan Siyiex mai ka pui pa yuh kaing rhiem kaing tawng sonsang deeh cox priex ka nyiex bwan Siyiex heue. 13 Mawh kheu nan, pui yuh kaing khankix hoik sau riang rao ti yuh kaing mai kaing hoik mawh pa grum naog, kix hoik deeh pon cox nyiex bwan Siyiex awm grang pakpeung phao voe mai hoik deeh kieh nawh mawh pa kaux cong heue. 14 Khaix hoik yuh kix nawh, kix viex mau pa kawn deuk khankix hoek ka plak sivoe simiang mai Yehoyadax, khaix an, kix yuh kraung pa sang shiao tix khankix son nyiex bwan Siyiex mai son kraung pa sang shiao kix daux kaing jhaw mai son krax pa tan tix, pa mawh cawx mai tawg khri tawg mau khankix heue. Kix hoik tan krax tan pa gleeing ka daux nyiex bwan Siyiex sijheeng glang baux singaix Yehoyadax heue.

15 Viang mawh nan, Yehoyadax, hoik kuad hu sipie mai singaix nawh hoik naog mai nawh hoik yum, nawh koe ju tixyieh tixngoe num yam yum nawh heue. 16 kix sipaung nawh ka daux veng Davit daux sinax cub simiang khankix, grawh grawng nawh, nawh hoik yuh ceu pa mhawm ka daux sinax ceu pui Isarelax khankix, ka plak sivoe Siyiex mai nyiex bwan Nawh Cao heue. 17 Khaix hoik yum Yehoyadax, cub cao kaing pui Yudax hoek mai krub ka simiang mai simiang nghiet lox sikah kix heue. 18 Mawh kheu nan, kix hoik prah ka nyiex bwan Siyiex keeing kix mai hawt ti yuh kaing jhaw khaox riang grang Asherax mai krax song rhawm hoik hoek piang meung Yudax mai veng Yerusaliem kheu jao grawng phimap kix heue. 19 Viang yuh nan kawx, Nawh Cao ploi cao jhai khankix hoek ka kix sonsang deeh viex kix ing ka Siyiex mai kix hoik jhi krax pa kham sakse tix ka kix heue. Viang mawh nan, kix hoik ang lai koe krax cu nghiet ka heue. 20 Khaix an, khwan Siyiex hoek piang Zekharix kawn simex Yehoyadax, nawh yaog tix cung ka dee lhaong mai ah nin ka kix, “Siyiex ah nin, pex lud ka gumlox pingnyap Siyiex, son ang pex lai pon ti koe krax haok hwan yuh ka mawh lie? Grawh grawng nawh, pex hoik tik hoik vud ka Siyiex heue. Nawh Cao kawx hoik tik vud ka pex heue. 21 Mawh kheu nan, kix kum kawng ti yuh ceu pa ang mhawm piang nawh mai ka daux gumlox pa tawm simiang, kix dheem nawh yum ka simaox ka biang nyiex bwan Siyiex heue. 22 Awm an simiang Yoshax, ang lai koe krax doh keud ka krax pa caux rhawm hoik yuh keeing nawh Yehoyadax ka tix mai hoik pah kawn simex nawh yum mai sivoe sang yum Zakharix nawh ah nin “Siyiex tak jhak piang grawng see in mai tak deeh plud ka nawh heue.

23 Mawh kheu nan, ceu ankix hoik lih ti mawh ka daux bawg yam raux praix daux num an, cub kru naing meung Surix hoek ti puing nawh mai kix hoek ka meung Yudax mai veng Yerusaliem mai kix yuh cao kaing pui khankix laux leeing khawmuik khaing daux sinax pui khankix mai ploi pui hu tawx kraung pa pon tud pon rhim tix khankix ka simiang veng Damase heue. 24 Cub kru naing pui Surix khankix viang mawh cub pui pa iak kawx, Siyiex ap tix tawx cub kru naing pa kied nie ting ka daux tawm taix kix kheu jao grawng hoik tik hoik vud kix ka Siyiex keeing kix heue. Mawh kheu nan, pui Surix khankix prawng ca ka Yoshax heue. 25 Yam hoik deeh lih hu kix khaing nawh, kheu kix prah nawh ot khawm saux mat sigrien sigre, kawncau nawh khankix kawx hoik deeh yuh krax pa tieh feen ka nawh kheu jao grawng nham phimap kawn simex cao giex kaing li Yehoyadax mai pah nawh yum piang ku it nawh, mawh kheu nan, nawh hoik yum heue. Kix sipaung nawh ka daux veng Davit, viang mawh nan, kix ang sipaung nawh ka daux simeeig cub simiang khankix heue. 26 Inkix mawh cub pui pa hoik tieh feen ka nawh; kix mawh Zabat, kawn simex Shimat bun Amon mai Yehozabat kawn simex bun ceu pui Mawbax heue. 27 Yam in phan mawh grawng kawn simex nawh khankix mai been lox ah pui plak nie son grawng nawh khankix mai grawng krax deeh cox khre nawh ka nyiex bwan Siyiex, kix hoik tiem ti deuh grawng been ankix ka daux phuk lai been simiang heue. Khaix an, kawn simex nawh Amazix, hoik deeh kwang haktiex ka dee ot nawh heue.