1 Amazix koe ju tixnga phwan num yam yaog nawh ti mawh simiang mai nawh kwang haktiex tixnga dim ka daux veng Yerusaliem heue. Ceu kaux miex nawh mawh Yehodan pui veng Yerusaliem heue. 2 Nawh yuh ceu pa khaw caw ka plak sivoe ngai Siyiex; viang mawh nan, nawh ang yuh khawm rhawm rhi tix heue. 3 Yam in ceu an khankix hoik lih ti mawh awm an, yam hoik pang kix ti deuh haktiex son nawh, nawh ciyang kawncau nawh khankix pa hoik pah ka keeing nawh pa mawh simiang heue. 4 Viang yuh ka mawx kawx, nawh ang pah ti tik kawn praix kix, viang mawh nan, nawh yuh awm krax pa hoik tiem tix ka daux gumlox beenli pa koe ka daux phuk lai Mose pa hoik tawm Siyiex ti deuh ah nin “Keeing khankix tak ang pon ti yum son kawn tix, kawn khankix tak ang pon ti yum son keeing, pui tak tang yum son phimap cao tix heue.

5 Lheu khaing an Amazix khrawm pui Yudax khankix mai yaog ti deuh cao kaing naing khankix piang pui kaing yieh, awm krax pa koe doeh nyiex ma keeing kix ka daux cub ceu pui Yudax mai cub ceu pui Binyamin; mai nawh simin ti deuh kix, jah ka pui pa koe ju tixnga num haok plak piang mai pui pa hoik laug nawh ti deuh khankix koe loe sien kaux pa mawh pui sang pon hu daux naing mai pa mawh pui pa pon giex pliah mai pa pon viex plah tiebtie rhiem khankix heue. 6 Nawh baox deeh cang pui pa kied ting riang rao, pa koe rhawm vao rhawm kwa khankix tix sien kaux khaing meung Isarelax ka mau tiyieh talantan heue. 7 Viang mawh nan, pui Siyiex tix kaux hoek ka nawh ah nin. “Simiang eue, Paw kieh cub kru naing Isarelax hu tau mai maix, grawh grawng nawh Siyiex ang ot tau mai pui Isarelax khankix mai ang ot tau mai kawn praix ceu pui Epharem pie tix kaux kawx heue. 8 Viang mawh nan, phan maix sang hu, lih hu heue. Kieh maix koe riang rao kaux cong ka daux naing, viang yuh nan kawx, Siyiex tak kieh maix som nai plak sivoe pui koeng; mawh kheu Siyiex koe sibrawm ti sang teem mai sang pluk pliak ti tik kix heue. 9 Khaix an, Amazix ah nin ka pui Siyiex an “Viang mawh nan, ex tak sang yuh ka mawx ka grawng mau tixyieh talantan an, ka pa hoik tawx aux ka cub lien pui Isarelax khankix lie? “pui Siyiex deeh pawk ah nin “Siyiex mawh pa nie lheu pon tawx ceu ankix ka maix heue. 10 Mawh kheu nan, Amazix tang gwieh ti deuh pui naing an khankix pa hoik hoek ka nawh khaing haktiex Epharem, sonsang deeh ing kix ka nyiex ma tix heue. Mawh kheu jao an, krax pa song rhawm kix hoik kied lih piang pui Yudax mai kix hoik deeh blak ti ing ka nyiex ma tix ka daux krax pa kied song rhawm tix heue. 11 Khaix an, Amazix sau riang rao tokaux cao tix kaux mai thong bung ka pui nawh khankix; nawh hu ka daux ngawd kih mai pah pui ot piang gawng Sirax khankix yum tix mheen kaux heue. 12 Kawn praix pui Yudax khankix teei pui pa im pa giex laung kix tix mheen kaux mai viex kix haok piang choek rang, cot kix rau sonsang pot sang phawng kix khawmuik heue. 13 Viang mawh nan, son nyawm lien cub kru naing pa hoik gwieh Amazix tix priex mai sonsang ang kix lai pon ti hu tau mai nawh ka daux bang naing, kix puing ti teei veng Yudax khankix, jah ka veng Samarix, tom hoek ka veng Biet Horom mai pah pui pa ot ka daux veng loe rheng kaux yum mai hoik teei kraung pa tud rhim khankix tom nie heue. 14 Yam in ceu ankix hoik baox lih ti mawh, khaix hoik hoek Amazix khaing pah tix pui Edom yum, nawh teei ti viex siyiex ceu pui Sirax hoek mai jung ti deuh ankix mawh Siyiex Cao nawh mai ngeuh kaing tix ka plak sivoe kix mai gleeing ti tawx nyawng bhawng ka kix heue. 15 Mawh kheu nan, krax song rhawm Siyiex hoik lih piang Amazix mai Nawh Cao ploi cao jhai hoek ka nawh tix kaux, ah nin ka nawh “Maix sawg ti yaox siyiex tang ceu khankix pa ang pon taoh ka pui tokaux cao nawh khaing daux tawm taix maix yuh ka mawx lie? 16 Mawh kheu nan, ceu ankix hoik lih ti mawh yam sikah nawh tau mai simiang ah nin ka nawh, “Mawh hoik kieh yix maix mawh cao pa tawx krax keud ka simiang lie? paw nye! maix lai sang sawg ti yum kheu jao patix lie? “Khaix an, cao jhai yawg tix mai deeh ah nin “Aux tawng ka hoik tat Siyiex rhawm ti sang yuh maix laux leeing, kheu jao hoik yuh maix ceu in mai kheu jao ang maix lai cu ti nghiet ka krax keud pa tawx aux khankix heue. Pui Isarelax Pex Ka Pui Yudax 17 Khaix hoik kum kawng Amazix simiang meung Yudax mai nawh ploi pui hu ka Yoshax kawn simex Yehohaza, kawn simex Yehu, pa mawh simiang meung Isarelax ah nin, “Hoek heue, Kieh ex yaox paox tix daux bang naing heue. 18 Yoshax simiang Isarelax ploi pui hu ka Amazix simiang meung Yudax ah nin khaox kat lawm pa koe ka daux Lebanon, hoik ploi hu ka khaox Arit, pa koe ka daux Lebanon ah nin, tawx kawn bun maix mawh moeng kawn simex aux; mai totiag khaing Lebanon hoik tiang ti hu mai dig piang khaox kat lawm an heue. 19 Maix ah ka hoik pex tix ceu pui Edom khankix tete mai rhawm maix hoik yaog tix yaw rangdi tix heue. Ot maix daux nyiex khaing! Maix chix sang sawg ti yaox krax pa kha rhawm sonsang som nai tix mai khawm pui Yudax pa ot tau mai maix khankix yuh ka mawx lie? 20 Viang mawh nan, Amazix ang cu ti nghiet ka lox ankix, mawh kheu ceu ankix hoik kaoh khaing Siyiex, sonsang tawx Nawh Cao kix ka daux tawm taix pui koeng kix kheu jao grawng hoik sawg kix ka siyiex haktiex Edom khankix heue. 21 Mawh kheu nan, Yoshax simiang meung Isarelax, lih hu; nawh mai Amazix, simiang meung Yudax yaox paox tix ka daux veng Bieshemiet, pa mawh cie meung Yudax heue. 22 Pui Yudax khankix hoik som ka pui Isarelax mai pui ku kaux tang to ka nyiex gox cao tix heue. 23 Khaix an, Yoshax simiang meung Isarelax hoik pon giex ka Amazix simiang meung Yudax, pa mawh kawn simex Yoshax, kawn simex Yehohaza, ka daux veng Bietshemiet mai hoik viex nawh hoek ka veng Yerusaliem mai hoik yieh ti tik veng Yerusaliem, plak diang siviex Epharem, tom hoek ka caong daog diang siviex an pon yieh sawk heue. 24 Nawh teei khri mai mau khankix, khawm kraung khrai pa hoik yaox nawh ka daux nyiex bwan Siyiex tau mai Obed-edom mai kraung khrai sinngao daux nyiex simiang khankix khawm can pui pa laung nawh ti deuh khankix mai deeh ing ka veng Samarix heue.

25 Amazix kawn simex Yoshax, simiang meung Yudax, im ju kao phwan num khaix hoik yum Yoshax, kawn simex Yehohaza, simiang meung Isarelax heue. 26 Yam in grawng kaing pa deuh Amazix ti yuh, jah tom hoek dee sidah, ang hoik mawh kix pa hoik tiem ti deuh ka daux phuk lai been simiang meung Yudax mai meung Isarelax lie? 27 Khaix hoik yam deeh viex Amazix khaing krax hawt tix khaix Siyiex, kix yuh cub caw pa deeh tieh feen ka nawh ka daux veng Yerusaliem mai nawh to ka veng Lakhishax; viang mawh nan, kix hoik ploi pui khankix hawt khaix nawh ka daux veng Lakhishax mai pah nawh yum heue. 28 Khaix an, kix tang tix viex nawh hoek piang brung mai sipaung nawh tau mai keeing nawh ka daux veng Yudax heue.