1 Ka daux aliah num tix num, Yehoyadax sau riang rao tokaux cao tix ting mai nawh yuh sijax mukheu tau mai cao kaing naing pa kwang piang kru naing kaing yieh pa mawh Azariyax, kawn simex Yeroham, Isarelax kawn simex Yehohanan, Azariyax, kawn simex Obedax, Maseyax kawn simex Adayax mai Elishaphat, kawn simex Zikharix heue. 2 Kix lih hu lailing ka daux meung Yudax mai deeh khrawm ceu pui Lewix khankix khaing daux veng khawmuik pa koe ka daux meung Yudax mai khawm cao kaing ceu pui Isarelax khankix mai bleeh ka veng Yerusaliem khawmuik heue. 3 Khaix an, cub pui hun pa kum khawmuik yuh sijax mukheu tau mai simiang ka daux nyiex bwan Siyiex heue. Nawh ah nin ka kix “Jhak heue. kawn simex simiang tak sang kwang haktiex, awm hoik ah Siyiex ti deuh ka cub kawn simex Davit khankix heue. 4 “In mawh ceu pa tak sang yuh pex daux cub pex cao giex kaing li mai pui Lewix khankix loe son tix son tak mawh cao pau ti jhak diang siviex, yam laig yuh kaing jhaw daux singaix twah; 5 “Loe son tix son tak mawh pa ot ka daux nyiex simiang mai loe son tix son tak mawh pa ot diang siviex lawng heue. Pui khawmuik tak mawh pa ot ka daux biang nyiex bwan Siyiex heue. 6 Viang mawh nan, lheu khaing cao giex kaing li mai cub ceu pui Lewix pa yuh kaing jhaw Siyiex, paw doh kieh pui tix kaux kawx laig daux nyiex bwan Siyiex awx. Kix tak pon ti laig kheu mawh kix pa singax singeh; viang mawh nan, pui khawmuik tak pau ti jhak ka Siyiex heue. 7 Pui Lewix khankix tak ot vung viang simiang ku plak, pui ku kaux tak giex kraung naing ka daux taix tix; pui mawx ang ah, pa laig ka daux nyiex, kieh pah nawh yum heue. Pex tak mawh pa ot tau mai simiang yam laig yam lih nawh plak praix heue.” 8 Mawh kheu pui Lewix mai pui Yudax khankix yuh ceu an awm pa hoik tawm cao giex kaing li Yehoyadax heue. kaux pui mawx kaux pui an hoik tang teei pui nawh khankix, sonsang teei beeh glawm ka daux singaix twah, tau mai pui khankix, pa tak sang deeh plud beeh glawm tix ka daux singaix twah kheu ang cao giex kaing li Yehoyadax nyang bax preet ka cub caw an khankix heue. 9 Cao giex kaing li Yehoyadax tawx pliah khankix mai khawm kraung tiebtie rhiem pa ting pa iak pa hoik mawh cie simiang Davit pa hoik koe ka daux nyiex bwan Siyiex ka cub cao kaing naing pui kaing yieh khankix heue. 10 Khaix an, nawh gwieh ti deuh pui khankix, pa tang giex kraung naing tix khankix ku kaux, jah ka praok plak dawm nyiex bwan tom hoek ka praok plak gwiex nyiex bwan hawt baoh khu dee tan mai hawt baoh nyiex bwan mai hawt vung viang simiang khawmuik heue. 11 Kix viex kawn simex simiang lih plak praix mai ceep mhok khri simiang piang nawh, tawx lai kham sakse ka nawh mai yaog nawh mawh simiang heue. Khaix an, Yehoyadax mai cub kawn simex nawh khankix groi rawm bee piang nawh mai ah nin; “Kieh simiang lang ju heue.

12 Yam mhong Atariyax ka lox sinum to pui mai lox pa yaogyaw kix ka simiang, nawh bleeh ka pui khankix ka daux nyiex bwan Siyiex heue. 13 Yam jhak nawh ka kix, simiang cung ti ot hawt rong simaox ka daux diang laig daux nyiex bwan mai cao kaing pa thong bungkhankix mai cao pa phlu teettawng khankix hoik ot hawt simiang heue. Pui haktiex khawmuik hoik gaux rhawm mai phlu teettawng mai cao pa ah lai rhax khankix giex kraung tah ting mai thong bung pui ka lox pa yaogyaw, hoik ot hawt tan heue. Mawh kheu nan, Athaliyax, riah ti tik kraung ceep tix khankix mai riag yo ah nin “Krax pa tieh feen! krax pa tieh feen!” 14 Khaix an, cao giex kaing li Yehoyadax viex cub cao kaing naing pa kwang pui kaing yieh mai kru naing pa hoik deuh nawh tix priex khankix lih hu ka plak praix mai ah nin ka kix; “Teei nawh lih plak praix mai pau nawh mai can pui pa hawt tix hu khaix nawh khankix khawmuik pah yum ka vaig heue. “Mawh kheu cao giex kaing li ah nin, paw doh pah nawh yum ka daux nyiex bwan Siyiex liak! 15 Mawh kheu nan, kix giex nawh mai viex nawh hu ka plak krax dee laig daux diang siviex brung pa koe ka daux nyiex simiang mai kix pah nawh yum tan heue. 16 Khaix an, Yehoyadax, yuh sijax mukheu daux sinax tokaux cao nawh mai pui khankix mai khawm simiang sonsang mawh kix pui Siyiex heue. 17 Pui khawmuik hu ka nyiex vad Balax mai yieh ti tik ankix grhup, kix raig ti tik khu dee tan nawh mai riang rao khankix mai pah yum ka Mattan, pa mawh cao giex kaing li Balax ka plak sivoe khu dee tan heue. 18 Yehoyadax deeh baox tawx beeh glawm krax pa sang kia ngien nyiex bwan Siyiex ka daux tawm taix cao giex kaing li mai ka pui Lewix khankix, ka pa hoik yaog Davit ti deuh ka daux nyiex bwan Siyiex, sonsang tan krax tan pa gleeing khankix ka Siyiex, awm krax pa hoik tiem ti deuh ka daux lox lai been Mose, tau mai krax pa gaux rhawm mai krax pa ah lox lai rhax, awm pa hoik pang Davit ti deuh heue. 19 Nawh deuh cao pa pau diang siviex khankix ka daux diang sivex nyiex bwan Siyiex, son ang pui pa ang singax ka grawng tix ceuceu lai pon ti laig pie tix kaux kawx heue. 20 Khaix an, nawh teei cub cao kaing naing piang pui kaing yieh mai pui pa ting lhaongmai cao kaing pa kwang piang pui khankix mai pui haktiex khawmuik mai viex simiang lih khaing nyiex bwan Siyiex mai kix phlat ti hu daux diang siviex plak piang tom hoek ka nyiex simiang mai deuh simiang piang dang ngeung meung haktiex heue. 21 Mawh kheu nan, pui haktiex khawmuik hoik gaux rhawm mai veng hoik yiien yawg, kheu hoik pah kix Athaliyax yum ka vaig heue.