22
1 Khaix an, pui ot ka daux veng Yerusaliem khankix yaog kawn simex nghoik nawh Ahazix mawh simiang ka daux dee ot nawh kheu hoik pah cub pui naing pa hoik bleeh ti hoek tau mai ceu pui Arepia daux tab ka cub kawn simex kuad an khankix heue. Mawh kheu nan, Ahazix kawn simex Yehoram, pa hoik mawh simiang Yudax kwang ka haktiex heue.
2 Ahazix hoik koe ju tixpon ra num, yam yaog nawh ti mawh simiang mai nawh kwang haktiex veng Yerusaliem tix num heue. Ceu kaux miex nawh mawh Athaliyax, pa mawh kawn saux bun Omri heue.
3 Nawh kawx baox lawng ka krax hu doeh ngiex ma Ahap, mawh kheu miex nawh hoik tawx krax keud ka nawh sonsang yuh nawh ceu pa caox caig heue.
4 Mawh kheu nan, nawh yuh pa caox caig ka plak sivoe ngai Siyiex, awm krax pa hoik yuh doeh nyiex ma Ahap; mawh kheu kix mawh cao pa tawx krax keud ka nawh, khaix hoik yum keeing nawh, sonsang hoek nawh krax laux leeing heue.
5 Nawh hoik lawng krax keud pa tawx kix mai hawt hu tau mai Yehoram kawn simex Ahap, simiang Isarelax, sonsang yuh naing ka Hazalax simiang Surix daux veng Ramot, meung Gilat mai pui Surix mat yuh Yoram heue.
6 Khaix an, nawh deeh ing ka veng Yezerelax, sonsang deeh pai khaix mat tix, pa hoik pon nawh ka daux veng Ramax, yam hu puing nawh ka Hazalax, simiang Surix heue. Azariyax kawn simex Yehoram simiang meung Yudax, kix hu jhak Yehoram kawn simex Ahap, ka daux veng Yezarilax, kheu saux nawh heue.
7 Grawng krax hu nawh ka Yehoram, hoik mawh pa yuh Siyiex sonsang som nai Ahazix; grawh grawng nawh, yam hoik bleeh nawh tan, nawh hoik lih hu tau mai Yehoram mai puing ka Yehu kawn simex Nimshi pa Siyiex groi rawm bee piang, sonsang tat nawh ti tik cub doeh nyiex ma Ahap khankix heue.
8 Ceu ankix hoik lih ti mawh yam hoik prawng ca Yehu tix pah ka cub doeh nyiex ma Ahap khankix mai yam hoik yaog nawh ka cub Siyiex pui Yudax khankix mai khawm cub kawn simex puxke Ahazix pa yuh kaing jhaw Ahazix khankix nawh hoik pah kix yum heue.
9 Khaix an, nawh sawg ka Ahazix mai kix hoik giex nawh, (nawh hoik mox ti ot ka daux meung Samarix yam an, ) mai hoik viex nawh hoek ka Yehu, yam hoik pah kix ka nawh kix sipaung nawh, kix ah nin, nawh mawh kawn simex Yehoshaphat, pa hoik sawg ka Siyiex khawm rhawm nawh khawmuik heue. Mawh kheu nan, pui daux nyiex ma Ahazix khankix ang lai koe pie tix kaux kawx, sonsang deeh teei tix sibrawm kwang piang meung haktiex heue.
10 Yam hoik yaox Atariyax miex Ahazix ka hoik yum kawn simex tix, kiex yaog ti kaoh mai yuh pa sang plud ti mawh cao pa sitoe simiang doeh nyiex ma Yudax khankix laux leeing khawmuik heue.
11 Viang mawh nan, Yeshabax kawn bun simiang yaog ti teei Yoshax kawn simex Ahazix mai briex nawh hu khaing daux sinax cub kawn simiang pa hoik pah tix yum mai deuh nawh tau mai bun priex ka nawh ka daux lawg it tix heue. Mawh kheu nan, Yeshabax kawn bun simiang Yehoram, moeng cao giex kaing li, mawh kheu nawh, mawh pux nan Ahaziyax mox ti deuh nawh khaing Athaliyax, son ang nawh pon ti pah nawh yum heue.
12 Nawh hoik mox tix tau mai kix ka daux nyiex bwan Siyiex liah num glang yam kawn kwang Athaliyax, piang haktiex heue.