14
1 Mawh kheu nan, Abiyax hoik laux lee tix tau mai keeing nawh khankix mai kix sipaung nawh ka daux veng Davit heue. Khaix an, kawn simex nawh Asa, deeh plud ti kwang haktiex ka dah dee ot keeing nawh heue. Ka daux baux singaix nawh khankix, haktiex hoik koe krax yiien yawg kao num heue.
2 Asa hoik yuh ceu pa mhawm mai pa rahsee ka daux ngaix Siyiex heue.
3 Mawh kheu nawh hoik gah ti tik khu dee tan siyiex tang meung khankix mai khawm dee pa lhaong khankix mai raig ti tik rong pa singax khankix mai kid ti tik riang rao pa mawh khaox khankix heue.
4 Nawh tawm lox ka pui Yudax, sonsang sawg kix Siyiex keeing kix mai sonsang priex rien kix ka gumlox beenli mai gumlox tawm pingnyap khankix heue.
5 Nawh baox deeh gah ti tik dee pa lhaong khankix mai dee tan nyawng khankix khaing daux veng haktiex Yudax mai meung an hoik yiien yawg ti ot greem krax pa kwang nawh heue.
6 Nawh sum ti deuh veng pa kaux cong khankix ka daux meung Yudax, kheu hoik yiien yawg haktiex nawh ang lai koe krax pa sang puing naing ka daux num an khankix, mawh kheu hoik tawx Siyiex krax pa yiien yawg ka nawh heue.
7 Mawh kheu nan, nawh ah nin ka pui Yudax khankix kieh ex deeh sum veng inkix mai yuh guh veng hawt rawb rim kix mai nyiex pa pau ti jhak siviex veng mai khaox jhong siviex, glang kawn yiien haktiex plak sivoe ex, grawh grawng nawh, ex hoik sawg ka Siyiex tix, ex hoik yaox ka Nawh Cao mai nawh hoik tawx ex laux lee tix ku praok ku plak heue. Mawh kheu nan, kix hoik sum ti deuh ceu ankix mai hoik kied koe krax pa haok hwan heue.
8 Asa koe cub kru naing tix cub, koe pui loe sien kaux khaing pui Yudax khankix pa hoik viex plah tiebtie naing mai pliah khankix mai khaing daux cub pui Binyamin, hoik koe ra sien daix mheen mai pui pa giex ak khankix inkix hoik mawh pui pa kied ting riang rao pa koe krax vao rhawm khawmuik heue.
9 Khaix an, Zerax pa mawh simiang Ethiopia, hoik lih hoek ti sang puing kix tau mai cub kru naing pa koe tix lan kaux mai khawm ling lawx naing brung khankix loe yieh lhang mai nawh hoek ka veng Maresha heue.
10 Mawh kheu nan, Asa lih hu rieb ti puing nawh mai kix hoik khre ti deuh nyawm lien khankix ka daux ngawd Zephatax, pa koe hawt veng Maresha heue.
11 Asa kok yo ka Siyiex ah nin “Siyiex eue, ka daux simex pui pa ting riang rao mai pui pa iak riang rao, lheu khaing Maix ang koe pui pa sang teem ka yix heue. Siyiex ex eue, Teem coi ka yix liak! mawh kheu yix een rhawm tix ka Maix Cao mai ka daux min ceu kaux Maix Cao yix tak hu puing pui pa hun in khankix heue. Siyiex eue, Maix Cao mawh Siyiex ex heue. Paw doh kieh pui pex ka Maix Cao liak!”
12 Mawh kheu nan, Siyiex hoik kieh ceu pui Ethiopia khankix som ka plak sivoe Asa mai pui Yudax khankix mai pui Ethiopia khankix hoik to heue.
13 Asa mai cub pui pa ot tau mai nawh khankix hawt ti pheet kix tom hoek ka veng Gerax heue. Mawh kheu nan, pui Ethiopia khankix hoik som mai kix ang lai pon ti deeh koe Siyiex mai plak sivoe cub kru naing Nawh Cao tom nie heue. Pui Yudax khankix hoik pon tud rhim ti viex kraung tom nie heue.
14 Khaix an, kix hoik pex ka veng an khankix pa koe hawt rawb rim veng Gerax, mawh kheu jao hoik tawx Siyiex krax pa lhat graung hoek piang pui daux veng an mai kix pon rhim ti teei veng khankix khawmuik, kheu kraung pa koe daux veng hoik kied nie heue.
15 Kix deeh baox puing ti teei kawg tobrie khankix mai teei ti viex yung mai kala uk hu tom nie mai kix hoik deeh blak ti ing ka veng Yerusaliem heue.