13
1 Ka daux num hoik kwang simiang Yerobom, ka haktiex kao daix num tix num, Abiyax yaog ti mawh simiang piang meung Yudax heue.
2 Nawh kwang daux Yerusaliem loe num heue. Ceu kaux miex nawh mawh Makha, kawn bun Awrelax, khaing veng Gibia heue. naing koe sinax Abiyax mai Yerobom yam an heue.
3 Abiyax laug ka pui naing pa koe rhawm vao rhawm cong pon sien kaux, sonsang yuh naing heue. Yerobom kawx laug pui naing pa koe rhawm vao rhawm cong daix sien kaux sonsang deeh puing ka nawh heue.
4 Khaix an, Abiyax cung piang gawng Zemarem, pa koe ka daux baoh haktiex gawng lua ceu pui Epharem ah nin, “Yerobom mai ceu pui Isarelax khankix eue, Nghiet ka aux heue.
5 Mawh ang pex nyang tawng ka hoik tawx Siyiex ceu pui Isarelax, krax kwang krax pang piang haktiex Isarelax ka Davit leeing ju, ka nawh mai ka kawn simex nawh khankix, ka sijax mukheu pa hoik yuh ka kix lie?
6 Viang yuh nan kawx, Yerobom kawn simex Nebat, pa mawh kawncau Sawlamon kawn simex Davit, hoik yaog ti kaoh mai tieh feen ka simiang cao nawh heue.
7 Khaix an, pui pa lu lhia jhawm khankix kraix khrawm ti hoek ka nawh mai hoik yuh tokaux cao kix koe riang rao, sonsang tieh feen tix ka Rehobom kawn simex Sawlamon, yam kawn awn ju Rehobom mai yam ang nawh nyang bax koe krax tawng yung mai yam ang nawh nyang bax pon ti tiebtie ka kix heue.
8 Yam in maix keud ti sang pon khre ti puing meung haktiex Siyiex, pa koe ka daux tawm taix cub kawn simex Davit khankix; mai maix mawh pa kied nie haoh hun mai riang kawn mawie hoik koe tau mai maix tan heue.
9 Ang hoik mawh maix pa tik cub cao giex kaing li Siyiex, pa mawh cub kawn simex Arun mai ceu pui Lewix khankix mai hoik deeh yaog ti deuh cao giex kaing li khankix son tokaux cao tix awm ceu pui haktiex tang dah tang dee khankix mai can pui pa hoek ti appong tokaux cao tix tau mai kawn mawie iak tix mu mai khawm yung aliah mu, tak pon ti mawh cao giex kaing li tix kaux, khaing ceu ankix pa ang mawh Siyiex khankix lie?
10 Viang mawh nan, phan mawh son yix, Siyiex mawh Siyiex yix mai yix ang tik vud ka Nawh Cao; mai cao giex kaing li pa yuh kaing jhaw son Siyiex khankix, mawh cub kawn simex Arun mai pui Lewix, khankix pa pau ti yuh beeh glawm kaing jhaw cie cao kix heue.
11 Kix gleeing krax tan pa gleeing mai ceu pa nyawm sioe bhawng khankix son Siyiex ku ngawb ku bo, kix hoik khan ti deuh blah piang pheen pa singax mai deeh khre jawk ten khri tau mai kawk ngu nawh khankix sonsang mawh pa tok ti riang ku bo mawh kheu ex priex ti een lox tawm pingnyap Siyiex ex, viang mawh nan, pex hoik tik vud ka Nawh Cao heue.
12 Jhak heue, Tokaux Siyiex ot tau mai ex, mawh cao kaing ex mai cao giex kaing li Nawh khankix kieh lox teettawng sinum sonsang tawx lox rien rhawm ka pex heue. Kawn praix Isarelax khankix eue, paw doh puing ka Siyiex keeing pex khankix liak! mawh kheu pex tak ang pon ti pex heue.
13 Viang mawh nan, Yerobom yuh naing jawm sonsang hu lai lawm tix ka plak khaix kix heue. Mawh kheu nan, kix ot ka plak sivoe pui Yudax mai pa yuh naing jawm ot ka plak khaix kix heue.
14 Jhak pui Yudax khankix ka hawt vung viang tix, kix hoik daox deng ka hoik koe pui naing ka plak sivoe tix mai khawm ka plak khaix tix khawm ra plak; mai kix riag yo lox tix ka Siyiex mai cao giex kaing li hoik phlu lox teettawng tix sinum heue.
15 Khaix an, pui Yudax khankix riag yo awm hoik riag yo pui Yudax khankix, ceu ankix hoik lih ti mawh mai Siyiex tawx krax pa som ka Yerobom mai ceu pui Isarelax khawmuik, sivoe Abiyax mai pui Yudax khankix heue.
16 Ceu pui Isarelax khankix to sivoe pui Yudax mai Siyiex ap ti tawx kix ka daux tawm taix pui Yudax heue.
17 Khaix an, Abiyax mai cub pui nawh khankix hoik mug kix yum ka daux krax pa kied ting; mawh kheu nan, pui pa hoik laug kix ti teei khaing pui Isarelax khankix hoik goh ti yum phwan sien kaux heue.
18 Mawh kheu nan, ceu pui Isarelax khankix hoik som nai ka daux bawg yam an mai ceu pui Yudax khankix hoik pex ka kix, kheu jao hoik een kix rhawm tix ka Siyiex keeing kix heue.
19 Abiyax hoik pheet ti hawt khaix Yerobom mai nawh teei veng khankix, pa mawh veng Betelax, tau mai nyiex yaong nawh khankix mai veng nyiex yaong nawh khankix, khaing nawh heue.
20 Mawh kheu nan, Yerobom, ang lai koe riang rao ka daux baux ju Abiyax mai Siyiex ciyang ka nawh mai nawh yum heue.
21 Viang mawh kawx nan, Abiyax hoik nied ti baox koe riang rao mai nawh teei ti koe moeng kao pon kaux mai pon kawn simex tix tixnga ra kaux mai khawm kawn bun kao liah kaux heue.
22 Yam in grawng kaing pa deuh Abiyax, ti yuh mai grawng krax ot krax koe nawh khankix mai grawng krax pa ah nawh khankix, hoik mawh pa tiiem tix ka daux phuk lai cao jhai Idado heue.