1 Yam in khwan Siyiex hoik lih hoek piang Azariyax kawn simex Awdiet heue. 2 Nawh hu pub ka Asa ah nin, “Asa mai pui Yudax pui Binyamin khankix eue, Nghiet lox aux heue. Phan pex sawg ka Nawh Cao, Nawh Cao tak kieh pex yaox tix; viang mawh nan, phan pex tik vud ka Nawh Cao, Nawh Cao tak tik vud ka pex heue. 3 “Ka daux bawg yam pa kied rheung, pui Isarelax khankix ang lai koe Siyiex pa mawh meh mai ang lai koe cao giex kaing li pa gau mai ang lai koe gumlox beenli khankix heue. 4 “Viang mawh nan, yam hoek kix ka daux krax pa kha rhawm khankix, kix deeh veeh ti ing ka Siyiex ceu pui Isarelax mai sawg ti yaox Nawh Cao mai Nawh Cao hoik kieh kix yaox tix heue. 5 “ka daux bawg yam ankix, krax pa nhim ang lai koe ka pui pa lih laig tix kaux kawx, viang mawh nan, krax pa kied suk sag hoik koe ka pui pa ot ka daux haktiex an khankix heue. 6 Mawh kheu nan, tix meung mai tix meung, tix veng mai tix veng ra lai yuh paox tix laux, mawh kheu Siyiex hoik tawx krax kha rhawm kix tau mai krax pa kham geu kuceu heue. 7 Viang mawh nan, phan mawh pex, kieh ti koe riang rao mai paw doh kieh taix pex khankix mawh pa dieh riang, mawh kheu kaing jhaw yuh pex tak mawh pa pon totaix heue. 8 Yam hoik mhong Asa ka gumlox inkix mai khawm gumlox cao jhai Awdiet, nawh yuh ti koe rhawm vao rhawm kwa mai nawh hoik yieh ti tik riang rao pa seeing brai an khankix khaing daux haktiex Yudax mai daux haktiex Binyamin khawmuik mai khaing daux veng khankix pa hoik rhim nawh ti teei piang gawng Epharem heue. Nawh deeh cox khre khu dee tan Siyiex pa hoik koe ka plak sivoe bang laig daux nyiex bwan Siyiex heue. 9 Khaix an, nawh deeh kraix khrawm pui Yudax mai pui Binyamin khawmuik mai pui ankix pa hoek ti ot tau mai kix tivud ticu khaing baoh haktiex Epharem baoh haktiex Manashe mai baoh haktiex Simeon, mawh kheu kix hoek ka nawh ka daux krax pa kied nie haoh hun khaing daux ceu pui Isarelax khankix yam hoik yaox kix ka hoik ot Siyiex tau mai Asa heue. 10 Mawh kheu nan, kix kraix khrawm paox tix ka daux veng Yerusaliem, daux khix loe, bawg yam kwang Asa ka haktiex kao phwan num heue. 11 Kix tan moi aliah yieh mu mai yung aliah rheng mu, khaing kraung pa pon tud rhim tix, pa hoik viex kix hoek tau mai tix ka Siyiex ka daux bawg yam an heue. 12 Khaix an, kix laig ka daux sijax mukheu, sonsang sawg kix ti yaox Siyiex keeing kix khawm rhawm tix mai khawm ju tix khawmuik khawm leeing; 13 Can pui pa ang koe rhawm ti sawg ka Siyiex ceu pui Isarelax, viang mawh simex bun pa iak pa ting ang ah tak pah yum heue. 14 Khaix an, kix tiextu ka plak sivoe Siyiex tau mai lox yo pa kied sinum mai khawm lox teettawng mai lox teet rung kawn yung khankix heue. 15 Pui Yudax khankix gaux rhawm ka daux krax pa hoik tiextu tix; mawh kheu kix hoik tiextu khawm rhawm rhi tix khawmuik khawm leeing mai kix sawg ti yaox Nawh Cao khawm ju tix khawmuik mai Nawh Cao hoik kieh kix yaox tix mai Siyiex tawx krax pa yiien yawg koe hawt rawb rim kix khawmuik heue. 16 Nawh pluat ti tik ara Makha, pa mawh miex simiang Asa khaing pa mawh kiex miex simiang, kheu jao yuh kieh riang grang Asherax pa seeing brai mai Asa kid ti tik riang rao pa seeing brai kiex mai yuh ankix phawng mai nawh gleeing ti tik an hawt rawm klawng Kidarom heue. 17 Viang mawh nan, dee pa lhaong khankix ang nyang bax gah ti tik khaing daux haktiex Isarelax heue. Viang yuh ka mawx kawx, rhawm Asa hoik koe krax pa kaux sijax ka daux ju tix heue. 18 Nawh baox deeh viex can ceu pa hoik appong keeing nawh khankix mai khawm can ceu pa hoik appong tokaux cao nawh khankix, pa mawh mau mai khri mai kraung pa shiao, laig ka daux nyiex bwan Siyiex khawmuik heue. 19 naing ang lai koe khaix an pie tix bawg kawx tom hoek baux num hoik kwang Asa haktiex tixngoe phwan num heue.