18
Grawng Krax Pa Pex Davit
(2Sam. 8:1-14)
1 Khaix an Davit puing ka ceu pui Philitix khankix mai pex ka kix mai teei veng Gat mai nyiex yaong khankix khaing daux tawm taix ceu pui Philitix heue.
2 Khaix an nawh hoik puing haktiex Mawbax mai pui Mawbax khankix hoik lih mawh siliex Davit mai kix hoik yaox ti tawx keen heue.
3 Davit hoik deeh puing Hadadeza pa mawh simiang haktiex Zawbax tom hoek ka veng Hamat, sonsang lih hu pang nawh meung haktiex tix piang hawt baoh rawm klawng Yufrethi heue.
4 Davit hoik rhim ti teei ling lawx naing brung khankix tix rheng, cub kru naing brung khankix aliah rheng kaux mai kru naing caong khankix ra mheen kaux heue. Khaix hoik yuh Davit ling lawx naing brung tang dah khankix laux mai nawh deeh teei ling lawx naing brung tixyieh lhang khaing heue.
5 Yam hoek pui Surix khankix khaing veng Damase, sonsang teem Hadadeza simiang Zawbax, Davit pah cub pui Surix khankix yum ra mheen ra rheng kaux heue.
6 Khaix an Davit deuh cub tab pa pau veng khankix ka veng Damase, ka haktiex Surix mai ceu pui Surix khankix hoik lih mawh siliex Davit mai kix hoik tawx keen ka nawh heue. Mawh kheu nan, Siyiex kia ngien Davit ka can dee hu nawh heue.
7 Davit hoik rhim ti teei kraung naing tiebtie plah khri kix khaing siliex Hadadeza mai viex kix ing ka veng Yerusaliem heue.
8 Khaing veng Tibahat mai khaing veng Khun, pa mawh veng Hadadeza khankix, Davit hoik teei ti viex tawng lheung ing tom nie heue. Sawlamon tom yuh rawm dung tawng, rong tawng mai kraung shiao ka tawng khankix tom nie heue.Ref 18:8 1Sim 7:40-47; 2Been 4:11-18.
9 Yam mhong Tou pa mawh simiang veng Hamat ka grawng hoik pex Davit ka cub kru naing Hadadeza, simiang haktiex Zawbax khankix khawmuik,
10 Nawh ploi kawn simex tix Hadoram, hu ka simiang Davit, sonsang rieb tix pub nawh mai nawb bwan piang nawh, grawh grawng nawh Davit hoik puing Hadadeza mai hoik pex ka nawh, mawh kheu Hadadeza hoik yuh naing ka nawh glang ka an heue. Hadoram viex kraung khrai mau mai kraung tawng lheung kuceu khankix hoek heue.
11 Simiang Davit hoik tan tix tawx khankix ka Siyiex, tan khri mai mau pa hoik viex kix hoek khaing haktiex Edom, haktiex Mawbax, pui Arun khankix mai khaing cau pui Philitix mai khaing ceu pui Amaliet khankix khawmuik heue.
12 Lheu khaing an, Abishie kawn simex Zeruya, hoik pah ka ceu pui Edom khankix yum ka daux ngawd kih, tix mheen daix rheng kaux heue.
13 Nawh baox deuh cub tab pau veng khankix hoik lih mawh siliex Davit khawmuik heue. Siyiex hoik kia ngien Davit ka can dee hu nawh heue.Ref 18:12 Yaog 60 Title.
Grawng Kwang Pang Davit Haktiex
14 Mawh kheu nan, Davit kwang piang ceu pui Isarelax khankix mai hoik prawng rahsee piang pui nawh khankix khawmuik heue.
15 Yuabax kawn simex Zeruya mawh cao kwang piang cub kru naing mai Yehashaphat, kawn simex Ahilut mawh cao pa mhai ti deuh carang,
16 Zadok kawn simex Ahitut mai Abimaliet kawn simex Abiata khankix mawh cao giex kaing mai Shavasha, mawh cao tiiem lai,
17 Benayax kawn simex Yehoyadax mawh cao kwang piang pui Kheretix mai pui Peletix mai kawn simex Davit khankix kawx mawh cao kaing pa ting pa kwang ka kaing ka plak sivoe simiang heue.