1 Khaix hoik luan ceu an khankix mai yam ot Davit ka daux nyiex haw tix, Davit ah nin ka cao jhai Natan, jhak heue, yam in Aux ot ka daux nyiex khaox Arit, viang mawh nan, teug bwan sijax mukheu Siyiex kawn ot ka greem nyiex gox bwan man tieb heue.” 2 Khaix an, Natan ah nin ka Davit, “Yuh awm can ceu pa koe ka daux rhawm maix, mawh kheu Siyiex ot tau mai maix heue.” 3 Viang mawh nan, ceu an hoik lih ti koe ka daux sawm an mai gumlox Siyiex hoek bleeh ka Natan ah nin, 4 “Hu mai krai ka kawncau Aux Davit, “Maix tak ang pon ti sum nyiex sonsang ot Aux ka heue. 5 “Aux ang sax yaox ti ot ka daux nyiex glang bawg yam viex Aux ceu pui Isarelax khankix lih hu khaing haktiex meung Ejiptux, tom hoek ka daux singaix, viang mawh nan, Aux hoik lai loh ti ot daux nyiex gox khankix tix mu hoik tix mu mai khaing nyiex gox bwan man tix mu heue. 6 “Can dah dee hoik gah Aux ti hu tau mai ceu pui Isarelax, mawh hoik sax krai Aux ka cao prawng see ceu pui Isarelax khankix tix kaux kaux, ka pa hoik tawm Aux kix mawh cao liang yung pui Aux khankix ka daux krax pa ah nin, mawh ang pex nyang sum nyiex khaox Arit ka son Aux lie?” 7 Yan in maix krai ka kawncau Aux Davit, Siyiex Cao kru naing mai raoma ah nin, “Aux hoik laug ti teei maix khaing daux kawg yung mai khaing dee liang yung, sonsang mawh maix cao kwang piang pui Aux Isarelax khankix heue. 8 “Aux ot tau mai maix ka can dee hu maix khankix mai grheu ti tik pui koeng maix khankix ka plak sivoe maix mai kieh ceu kaux maix koe min awm ceu kaux pui ting lhaong khankix pa koe piang ca haktiex heue. 9 “Lheu khaing an, Aux tak sang laug ti deuh dah dee tix dah ka son pui Aux Isarelax khankix mai Aux tak sum kix kaux cong sonsang pon ot kix ka dah dee cie cao kix mai ang lai yaox ti gah khaing tan tix bawg kawx mai pui caox khankix tak ang lai pon yeen ya ka kix khaix in tix bawg kawx awm glang singaix pa hoik luan khankix, 10 “Jhak ka bawg yam tawm Aux lox ka cao prawng see, sonsang kwang kix piang pui Aux Isarelax khankix heue. Aux tak grheu ti tik pui koeng pex khankix heue. Lheu khaing an Aux sang krai maix mhong ka sang sum Siyiex nyiex ka son maix heue. 11 “Ceu an tak lih ti mawh yam naog singaix baux ju maix khankix mai yam hu ot maix tau ka dee ot keeing maix khankix, Aux tak yaog ti deuh ru maix khaix maix, ka daux kawn simex maix khankix mai Aux tak sang pang ti deuh meung haktiex nawh heue. 12 “Nawh tak mawh pa sum nyiex ka son Aux mai Aux tak pang ti deuh dang ngeung nawh leeing ju heue. 13 “Aux tak mawh keeing nawh mai nawh tak mawh kawn simex AuxRef 17:13 2Kaw 6:18; He 1:5; Jhi 21:7. mai Aux tak ang lai teei krax pa caux rhawm tix hu khaing nawh, awm hoik teei Aux krax pa caux rhawm tix khaing pui pa hoik dawg koe ka sivoe maix heue. 14 Aux tak tawx nawh ot ka daux nyiex Aux mai ka daux meung Aux leeing ju mai dang ngeung nawh tak kaux cong leeing ju heue.” 15 Nawh tom deeh krai ka Davit awm koe gumlox pa plak jhi in kix khawmuik heue. 16 Khaix an simiang Davit laig ka daux mai ngawm ka plak sivoe Siyiex heue. Mawh aux pui pa yuh ka mawx lie? mawh doeh nyiex ma aux pa yuh ka mawx, Maix Cao lai yaogyaw aux ting yuh nin lie? 17 Siyiex eue, in hoik mawh ceu pa iak pa liied ka plak sivoe ngai Maix Cao; Siyiex eue, Maix Cao hoik gruh krai grawng doeh nyiex ma kawncau tix, son bawg yam pa sang hoek an mai Maix Cao hoik deuh aux mawh pui pa kied ting min plakngai heue. 18 “Davit tak sang baox pon ah patix ka Maix Cao grawng yaog Maix Cao min plakngai kawncau tix lie? grawh grawng nawh, Maix Cao tawng grawng kawncau tix heue. 19 “Siyiex eue, mawh kheu jhak Maix Cao ka bwanson kawncau tix, hoik koe rhawm Maix Cao, Maix Cao hoik yuh ceu pa ting lhaong in khawmuik ka daux pa sidawng laing laing ka daux pa kied ting lhaong in khawmuik heue. 20 Siyiex eue, Siyiex pa awm Maix Cao ang koe tix kaux kawx, awm pa hoik sax mhong ka yhaok tix khawmuik, lheu khaing Maix Cao ang lai koe Siyiex tang kaux heue. 21 “Ka piang haktiex in, mawh koe pui tang ceu khankix pa awm pui Maix Isarelax, ka pui pa hoik laug Maix Cao ti teei ka son cao tix, sonsang kieh Maix Cao ceu kaux pa kied ting lhaong tix sidawng mai grawng kaing pa daox deng khankix ka daux pa Maix Cao grheu pui kuceu lih hu khaing plak sivoe pui Maix Cao khankix, pa hoik deeh taoh Maix Cao kix lih khaing haktiex meung Ejiptux lie? 22 “Grawh grawng nawh, Maix Cao hoik kieh pui Isarelax khankix mawh pui cie tix leeing ju mai Maix Cao, pa mawh Siyiex hoik mawh Siyiex kix heue. 23 “Siyiex eue, gumlox pa hoik krai Maix Cao son kawncau Maix mai ka son doeh nyiex ma nawh khankix, kieh ankix mawh pa kaux cong leeing ju mai yuh awm pa hoik krai Maix Cao heue. 24 “Mawh kheu nan, kieh min ceu kaux Maix Cao pa ting lhaong kaux cong leeing ju, Siyiex Cao kru naing raoma mai mawh Siyiex ceu pui Isarelax khankix mai kieh doeh nyiex ma kawncau Maix Davit mawh pa sum tix kaux cong ka plak sivoe Maix Cao heue 25 Grawh grawng nawh, Siyiex aux eue, Maix Cao hoik krai grawng sang sum tix nyiex ka son kawncau Maix Cao heue. Mawh kheu nan, kawncau Maix hoik yaox ka ceu ankix, ka daux rhawm tix sonsang rawg bwan ka plak sivoe Maix Cao heue. 26 “Yam in, Siyiex eue, Maix Cao mawh Siyiex mai Maix hoik yuh sijax mukheu pa mhawm in khankix ka kawncau Maix Cao heue. 27 Yam in Maix Cao mawh pa koe rhawm tix nawb bwan piang doeh nyiex ma kawncau Maix khankix, sonsang pon ceu an pa kaux cong ka plak sivoe Maix Cao leeing ju heue. Grawh grawng nawh, Siyiex eue, Maix Cao nawb bwan piang ankix mai ceu ankix tak mawh pa pon bwan son leeing ju heue.”