19
Grawng Pa Som Pui Amon Mai Pui Surix
(2Sam. 10:1-19)
1 Khaix hoik yum simiang Nahat pa mawh ceu pui Amon mai kawn simex nawh deeh yaog tix kwang haktiex ka dah dee ot nawh heue.
2 Khaix an, Davit ah nin, “Aux tak jhi krax caux rhawm tix ka Hanun kawn simex Nahat, mawh kheu hoik jhi keeing nawh krax caux rhawm tix ka aux heue. “Mawh kheu nan, Davit ploi cao cau hu sonsang yuh kix krax pa nyawm rhawm nawh ka son grawng keeing nawh heue. Siliex Davit khankix hoek ka Hanun ka haktiex dee ot pui Amon sonsang khu rhawm nawh heue.
3 Cub simiang Amon khankix ah nin ka Hanun, “Mawh keud maix Davit sang tawx krax yungyi ka keeing tix kheu jao ploi nawh pui pa khu rhawm maix khankix hoek lie? Ang maix tawng siliex nawh khankix mawh pa sang sawg ti jiang ti yaox ka haktiex mai pa sang hoek yuh maix laux leeing khankix lie?”
4 Mawh kheu nan, Hanun giex ka siliex Davit khankix mai khlao hauk bheup kix mai tat kraung ceep kix tom hoek sigreung piang ba viang kix mai deeh ploi kix hu dee singai heue.
5 Khaix an, pui tiblah hu krai Davit mhong grawng pui an khankix mai nawh ploi pui hu pub kix, kheu jao hoik kied koe krax kaig tua pui an khankix heue. simiang ah nin, ot tan ka daux veng Yerikho, tom hoek bawg yam kuah hauk bheup pex mai khaix an deeh hoek awx.”
6 Yam yaox pui Amon khankix ka hoik yuh kix krax pa seeing brai ka Davit, Hanun mai pui Amon khankix hoik sipaox mau tixrheng talantan hu sonsang vai tix ling lawx naing brung mai cub pui naing brung khankix son tokaux kix, khaing haktiex Mesopotemia mai khaing haktiex Surix Makha mai khaing haktiex Zawbax khankix heue.
7 Mawh kheu nan, kix hoik vai ling lawx naing brung khankix loe mheen ra rheng lhang, tau mai simiang Makha mai khawm pui nawh khankix, hoik hoek ti yuh tab ka plak sivoe veng Medabax heue. Pui Amon khankix hoik deeh baox khrawm paox tix tau khaing ku veng dee ot cao kix mai hoek ka biang naing heue.
8 Yam mhong Davit ka grawng an, nawh ploi Yuabax mai kru naing pa kied ting riang khawmuik hu heue.
9 Khaix an, tokaux pui Amon khankix lih hu ti yuh naing ka plak sivoe siviex veng mai cub simiang pa hoek ti teem khankix hoik tang teei dee ot tix ka daux tong heue.
10 Yam yaox Yuabax ka hoik khre kix biang naing ka plak sivoe mai ka plak khaix tix, nawh hoik laug pui Isarelax pa cheung khankix tiblah mai nawh ploi kix hu ka biang naing sonsang puing ka ceu pui Surix khankix heue.
11 Son can pui pa kawn deuk khankix, nawh ap kix ot greem pa kwang pux nawh Abishie mai kix yuh naing ka pui Amon khankix heue.
12 Khaix an, nawh ah nin, “Phan pui Surix mawh pa ting riang khaing aux maix tak caw ti teem ka aux, viang mawh nan, phan pui Amon khankix mawh pa ting riang khaing maix, khaix an, aux tak teem maix heue.
13 “Kieh koe krax pa kwa rhawm ka daux pa mhawm mai kieh ex mawh pa koe riang rao ka son pui ex khankix mai son veng Siyiex ex khankix heue. Kieh Siyiex yuh ceu pa mhawm awm pa koe alo Nawh Cao heue.”
14 Mawh kheu nan, Yuabax mai pui pa ot tau mai nawh khankix, hoik greed tix dex sonsang puing naing ka pui Surix khankix mai kix hoik to khaing plak sivoe nawh heue.
15 Yam yaox pui Amon khankix ka hoik to pui Surix khankix, kix kawx baox to sivoe pux nawh Abishie mai laig ka daux veng heue. Khaix an, Yuabax hoik deeh ing ka veng Yerusaliem heue.
16 Yam hoik yaox pui Surix khankix hoik som ti ka ceu pui Isarelax khankix, kix ploi cao cau khankix hu mai kieh kix kok ka pui Surix pa ot toi klawng Yufrethi mai Shophat pa mawh cao kaing naing ting, cub kru naing simiang Hadadeza khankix hu ka plak sivoe kix heue.
17 Yam krai kix grawng an ka Davit, nawh deeh kraix khrawm ceu pui Isarelax khankix mai nawh tiang hu ka toi rawm klawng Yawdan mai hoek ka kix mai kix puing naing ka kix heue. Mawh kheu nan yam puing Davit ka pui Surix khankix, kix deeh puing naing tau mai nawh heue.
18 Khaix an, pui Surix khankix hoik to sivoe ceu pui Isarelax mai Davit pah cub pui naing ling lawx brung khankix yum aliah rheng kaux mai khawm kru naing caong ceu pui Surix khankix yum pon mheen kaux mai nawh pah Shaphat cao kaing naing kru naing kix heue.
19 Yam yaox siliex Hadadeza khankix ka som tix ka ceu pui Isarelax khankix, kix yuh pa nhim tan mai Davit mai kix hoik lih mawh siliex nawh heue. Mawh kheu pui Surix khankix ang lai koe rhawm sang teem ka pui Amon khaix an pie tix bawg kawx heue.