1 Yaogyaw ka bwanson Siyiex mai rhax lai ka ceu kaux Siyiex, Cao pa ting lhaong khaing khawmuik. 2 Teei ting pa koe maox kao nyaing mai teei ting pa mhawm lox pa khaw ti tah khankix, 3 mai jhi krax pa caux rhawm Nawh, ku ngawb mai sijax mukheu Nawh ku sawm jheung jheung heue. 4 Siyiex eue, Maix kieh aux gaux rhawm, kheu kaing pa hoik yuh Maix mai aux tak rhax lai, pa gaux rhawm ka ceu pa hoik yuh Maix ka taix tix heue. 5 Siyiex eue, kaing pa hoik yuh Maix, mawh ceu pa kied ting lhaong mai krax pa keud pa sawn Maix kawx, mawh pa kied nie raux heue. 6 Pui pa koe rhawm totiag mai pui pa caox pa ang tawng khankix. 7 Pui pa ang rahsee khankix, lih kuah awm rib riem mai yam pruh, pui pa nieb yuh khankix, tak hoek krax pa laux leeing, leeing ju heue. 8 Grawh grawng nawh, Maix mawh Siyiex, Cao pa ting piang khawmuik leeing ju heue. 9 Jhak heue, pui pa koeng ka Maix khankix, hoek krax pa laux leeing heue. Jhak heue, pui pa nieb yuh khankix khawmuik kawx, hoik prung prang rai ruad hu heue. 10 Maix hoik yaog rung choek aux, awm rung mawie praix mai teei rawm bee pa khraox kraix ka aux heue. 11 Ngai aux hoik yaox ka pui pa koeng ka aux mai yhaok aux hoik mhong ka pui pa yuh pa caox pa lah cha ka aux khankix heue. 12 Pui pa rahsee khankix, tak ting pang lang lhax awm khaox jhie yaong mai ting lhaong haok hwan awm khaox piakvan, pa koe ka piang gawng Lebanon heue. 13 Pui pa sum ka daux nyiex Siyiex khankix, tak mhawm pruh mhawm grang ka dee ot Siyiex ex heue. 14 Viang kix hoik rie ju kawx, deeh mhawm plix, mhawm tai heue. 15 Plak jhi sidawng, Siyiex mawh pa rahsee mai Nawh mawh Rang ting aux mai kieh aux luan khaing ceu pa ang rahsee heue.