1 Pui pa ot ka dee pa tiebtie Siyiex, Cao pa ting lhaong khaing khawmuik, tak pon ti ot ka greem veei sibrawm Nawh heue. 2 Aux krai ka Siyiex ah nin, “Maix mawh dee deuh aux rhawm mai mawh tab aux mai Siyiex pa deuh aux rhawm heue.” 3 Nawh Cao kieh maix luan khaing kie pa hoik taong cao jaw mai saux preng heue. 4 Nawh tak teei hauk pruik tix, mai maix yaox ti ot mhawm mhawm ka greem pruik Nawh mai sijax mukheu Nawh mawh kraung naing pa tiebtie heue. 5 Maix tak ang koe pa lhat graung ka ceu pa lhat ponsawm mai te pa puing pon singaix 6 mai ang lhat ka Jhawm saux pa hu ka daux pa faik mai jhawm saux pa chix yuh laux yam jung singaix khankix heue. 7 Viang pui tix rheng kaux goh dex maix mai pui tix mheen kaux goh plak taix khawn dawm maix kawx, tak ang doh pon yuh tidtix ka maix heue. 8 Maix tak jhak ka ngai tix mai briex yaox ka phimap pa hoek ka piang pui pa ang rahsee khankix heue. 9 Siyiex eue, Maix mawh dee deuh aux rhawm heue. Maix hoik hoek dee ot Siyiex pa ting lhaong, khaing khawmuik heue. 10 Ceu pa caox caig, ang pon ti hoek ka piang maix mai ceu pa lhat graung ang pon ti dex ka nyiex dee ot maix heue. 11 Nawh Cao tak tawm lox grawng maix ka kawncau Siyiex khankix, Ref 91:11 Mat 4:6; Luk 4:10. tak sang kia ngien maix, ka daux krax pa hu maix khankix. 12 Son ang caong maix sang krox ka simaox, kix tak sang yaog Maix ka tawm taix kix heue.Ref 91:12 Mat 4:6; Luk 4:11. 13 Maix tak sang dig ka sivai sangsi mai siuing pa cai mai yaog caong maix mai dig ka sivai sangsi pa awn ju mai siyawng heue.Ref 91:13 Luk 10:19. 14 Mawh kheu moh nawh Aux, Aux tak sang taoh ka nawh, mawh kheu tawng nawh ka ceu kaux Aux, Aux tak sang yaog nawh ting heue. 15 Yam kok nawh ka Aux, Aux deeh pawk ka lox nawh heue. Yam yaox nawh krax pa kha rhawm, Aux ot ka plak nawh heue. Aux tak taoh nawh lih mai yaog min plakngai nawh sidawng heue. 16 Aux tak sang kieh nawh lang ju mai kieh nawh nyawm rhawm mai jhi nawh yaox krax taoh Aux heue.