1 Siyiex Cao kru naing raoma eue, nyiex bwan dee ot Maix, mawh pa kied sidaing mhawm heue. 2 Ju aux sawg dee ot Siyiex mai hoik iak riang iak rao hu heue. Rhawm aux mai tokaux aux, sawg mai kok yo ka Siyiex pa im ju heue. 3 Siyiex Cao kru naing raoma mai Simiang aux mai Siyiex aux eue, sim saik koe dee ot dee koe mai sim sivoeg koe mheem dee tawm dee vah ka dee dex khu dee tan Maix heue. 4 Pui pa ot ka daux nyiex Maix khankix, koe bwanson heue, kix tak yaogyaw ka Maix jheung jheung heue. 5 Pui pa teei riang rao ka Maix mai pui pa koe rhawm ka daux krax Maix khankix, koe bwanson heue. 6 Yam preeng kix tix hu ka daux ngawd dee kroh dee kram kawx, ka dee an, deeh kieh rawm keut lih tom nie mai rawm lhiex cao kawx, kieh bwanson kheem veei ka heue. 7 Kix nie hu, nie koe riang sinyek mai jhi pakngai kix ka Siyiex, ka daux veng Zion heue. 8 Siyiex Cao kru naing raoma eue, nghiet ka lox pa rawg aux bwan liak. Siyiex Yakop eue, veeh yhaok Maix mai nghiet liak. 9 Siyiex Cao pa tiebtie eue, jhak ka pakngai pui pa hoik laug Maix ti teei liak. 10 Pon tix ot dee ot Maix tix singaix, nie lheu mhawm khaing ot tang dah tang dee tix rheng singaix heue. Aux nie lheu moh tix pau diang siviex nyiex Maix Siyiex, khaing ot nyiex dee ot pui pa caox pa ang rah ang see khankix heue. 11 Siyiex mawh singaix mai Cao pa tiebtie heue. Siyiex mawh Cao pa tawx bwanson mai min plakngai heue. Nawh Cao ang lai tik vud ceu pa mhawm ka son pui pa rahsee khankix tix ceu kawx heue. 12 Siyiex Cao kru naing raoma eue, pui pa deuh rhawm ka Maix khankix, koe bwanson heue.