1 Siyiex eue, Maix moh ka meung tix mai geh nyiex Yakop pa hoik giex hu khankix, deeh hoek tawx liak. 2 Maix pluat ploi phimap pui Maix khankix mai hoik kheem phimap kix khawmuik heue. 3 Kieh krax pa song rhawm song rhi Maix grai uik mai yawn rhawm Maix khaing krax pa song rhawm song rhi liak. 4 Siyiex Cao pa taoh ex eue, kieh ex deeh tieh deeh loh tix mai kieh yiien ka rhawm pa hoik sax song rhawm song rhi Maix liak. 5 Khex song rhawm song rhi Maix ka ex jheung jheung lie? Krax pa song rhawm song rhi Maix ang cu tix grai leeing ju lie? 6 Maix hoik kieh ex im ju mai kieh pui Maix khankix, gaux rhawm gaux rhi ka daux Maix ang mawh lie? 7 Siyiex eue, Maix jhi ex yaox krax pa caux rhawm Maix mai taoh ex ka bwanson Maix liak. 8 Aux tak sang krox tix nghiet ka gumlox pa sang krai Siyiex heue. Grawh grawng nawh, Nawh koe gumlox pa nhim, ka pui Nawh pa singax singeh khankix, viang mawh nan, paw lai deeh yuh pa caox caig khaix in liak. 9 Bwanson krax taoh Nawh Cao, hoik hoek dex kix ka pui pa lhat graung ka Nawh Cao mai min plakngai Nawh Cao, hoik ot ka daux meung ex tete heue. 10 Krax caux rhawm mai sijax mukheu hoik rob paox tix, pa rahsee mai pa nhim, tix kaux lai tix kaux ngheut paox tix heue. 11 Sijax mukheu lih khaing haktiex mai pa rahsee lih khaing raoma tak num tix jhak heue. 12 Siyiex tawx bwanson pa mhawm ka ex mai tawx kraung khrai plix nghox plix koi Nawh ka haktiex ex heue. 13 Krax pa rahsee hu sivoe Nawh Cao mai khaix Caong Nawh hawt hu heue.