YAOGYAW 83
1 Lai yaogyaw pa ah Asapha Siyiex eue, paw lai glaik yiien yawg tix liak, Maix paw yuh tix ang tawx lox pa sang krai tix mai paw lai kaog liak.
2 Jhak heue, pui pa koeng ka Maix khankix, yuh lox lawh maw cuci mai pui pa koeng ka Maix khankix, hoik kaoh heue.
3 Kix briex kum paox tix nong nong, sonsang yuh laux leeing ka pui pa priex Maix khankix heue.
4 Kix ah nin ka paox tix, hoek heue, ex preet ti tik ka ceu pui Isarelax, yuh ka mawx son ang pui lai doh keud ka ceu kaux kix khaix in sax heue.
5 Kix ih rhawm rhi simau paox tix mai briex kum tix sang tieh feen ka Maix heue.
6 Mawh cub pui Edom, ceu pui Ishamelax, pui Mawbax, pui meung Hagarax,
7 pui meung Gebalax, pui meung Amon, pui meung Amaliet, ceu pui Philitix mai pui veng Turux khankix heue.
8 Ceu pui Asurix khankix kawx, rom tau mai kix cub geh nyiex Lotax heue.
9 Maix yuh kix yaox jhawm, awm pa hoik yuh Maix ka ceu pui MidianRef 83:9 Cao 7:1-23. mai Simiang Sisarax mai Simiang Yaben ka praok rawm klawng KhisonRef 83:9 Cao 4:6-22. liak.
10 Kix hoek krax laux krax som ka daux Endawrax mai mawh phon ka piang tiex heue.
11 Yuh simiang kix, khankix, awm yuh Maix ka simiang Awrebax mai simiang ZebaxRef 83:11 Cao 7:25. mai yuh simiang haktiex kix khawmuik awm yuh Maix ka simiang Zebahax mai simiang Zalamonnax, Ref 83:11 Cao 8:12.
12 Cao pa ah nin, ex rud ti teei nyiex bwan kix, mawh cie ex heue.
13 Siyiex aux eue, kieh kix awm phawng tiex pa phlu bhaung keu kang lux hu mai kam pa phlu bhaung hu liak.
14 Awm pa gleeing ngu ka daux tiagtu mai ka piang gawng lua khankix,
15 Maix teei bhaung ting lhiex ting lah ka kix mai teei bhaung caox ghlat ti tik kix liak.
16 Siyiex eue, kieh plakngai kix kaig tua mai kieh kix sawg ka ceu kaux Maix liak.
17 Kieh kix hoek krax pa kaig pa tua mai koe krax pa lhat graung liak mai kieh kix koe krax pa taug pa mao mai kieh hoek krax pa laux pa som liak.
18 Kieh kix tawng ka ceu kaux Maix tix kaux khaing pa mawh Siyiex tix kaux khaing, Cao pa ting ka piang haktiex khawmuik liak.