1 Siyiex eue, nghiet ka lox aux mai lox pa ngia aux liak. 2 Siyiex eue, mawh kheu rawg aux bwan ka Maix, nghiet ka lox pa kok yo aux liak. 3 Siyiex eue, yam ponngawb Maix mhong ka lox aux mai yam ponngawb Maix mhong lox rawg aux bwan ka daux krax krox jun sivoe ngai Maix heue. 4 Maix mawh Siyiex pa ang moh ka pui pa ang rahsee mai ang rieb ti teei ka pui pa caox heue. 5 Pui pa caox caig ang pon ti hoek dee ot Maix mai Maix koeng ka pui pa ang rahsee khawmuik heue. 6 Maix tak sang yuh laux ka pui pie lhen khankix, Siyiex seeing brai ka pui pa pah pui yum mai pui pie lhen khankix heue. 7 Phan mawh aux pon ti hoek daux nyiex Maix, kheu pon bwanson Maix tom nie mai koe rhawm lhat ka Maix mai pon ti krub ka Maix, daux nyiex bwan pa singax singeh heue. 8 Siyiex eue, mawh kheu koeng pui ka aux, thong aux hu ka krax pa rahsee Maix liak, kieh daux krax Maix rahsee sivoe ngai aux liak. 9 Jheeh kix ang kaux sijax, daux rhawm kix mawh pa caox, daux ghok kix mawh simeeig pa hoik bhang, dak kix kawx jiet chix nyaw glaw heue.Ref 5:9 Ro 3:13. 10 Siyiex eue kieh phimap hoek ka piang kix, kieh kix sivu ka krax keud krax sawn tix mai grheu ti tik kix kheu phimap pa lud kix tom nie, mawh kheu tieh feen kix ka Maix heue. 11 Pui pa deuh rhawm ka Maix, koe krax gaux rhawm. Kix koe krax gaux rhawm gaux rhi mai kok yo kheu kia ngien Maix ka kix heue. Kix pa moh ka ceu kaux Maix, kieh koe krax gaux rhawm gaux rhi ka daux Maix liak. 12 Siyiex eue, nawb bwanson ka pui pa rahsee mai kieh bwanson Maix tiebtie ka kix, awm kraung naing pa tiebtie heue.