1 Lox pa yaogyaw Davit Siyiex eue, paw nyang deuh phimap ka piang aux, ka daux pa song rhawm Maix mai paw nyang sivied ti gau aux ka daux pa kied song rhawm Maix liak.Ref 6:1 Yaog 38:1. 2 Siyiex eue, teem ka aux, mawh kheu iak riang aux, Siyiex eue, kieh aux deeh brax deeh moi, mawh kheu si-ang aux hoik yung yiang heue. 3 Ju aux kied lhat graung heue. Siyiex eue, aux kawn sang kham geu miex grheung? 4 Siyiex eue, Maix deeh hoek ti taoh ju aux liak. Deeh taoh aux ka daux krax pa caux rhawm Maix liak. 5 Ka daux meung yum ang pui lai doh keud ka Maix, ka dee an, pui mawx pa sang yaogyaw ka Maix? 6 Aux iak riang rao kheu kied kha aux rhawm tix mai jah rawm ngai ku singaix, tom kieh dee it aux caux lan heue. 7 Laux ngai aux kheu khi rhawm aux, vuvi ngai aux jao pui pa koeng ka aux khankix heue. 8 Pui pa yuh kaing pa caox caig khankix eue, via hu khaing aux heue.Ref 6:8 Mat 7:23; Luk 13:27. Siyiex hoik mhong ka lox yiiem riag yo aux heue. 9 Siyiex hoik mhong ka lox pa khyox khaw aux mai Siyiex hoik nghiet ka lox pa rawg aux bwan heue. 10 Can pui pa koeng ka aux khawmuik, tak hoek krax kaig tua mai hoek krax som nai heue. Kix kaig tua mai tang to dom mawx dom an heue.