1 Siyiex eue, Maix lah cha ka pui pa lah cha ka aux, Maix puing ka pui pa puing ka aux. 2 Teei kraung naing pa tiebtie Maix, kaoh mai teem aux liak. 3 Teei pliah mai vaid Maix tiebtie ka pui pa hawt pheet khaix aux khankix liak, kieh daux rhawm aux ah nin, Maix mawh Cao pa taoh aux heue. 4 Pui pa sawg tix plaux ka ju aux khankix, kieh plakngai kix hoek krax pa kaig tua mai pui pa bak ti yuh pa caox ka aux khankix, kieh deeh blak plak khaix tix mai koe krax pa kaig pa tua khawm lhat tix liak. 5 Kieh kix awm kam riex pa phlu bhaung hu, kieh kawncau Siyiex cie Simiang hawt pheet ti tik kix liak. 6 Kieh krax hu kix faik mai nyu mai kieh kawncau Siyiex cie Simiang hawt pheet ti tik kix liak. 7 Ang koe krax koe grawng tittix kawx, kix mox ti taong kie mai kaong daux tiex mai tak sang teei ju aux yum heue. 8 Pui pa yuh nan, yam ang kix tien tawng, kieh krax laux leeing hoek ka piang kix liak mai kieh kix deeh krix ka kie pa hoik taong tix mai daux tiex pa hoik kaong kix tiru liak. 9 Phan yuh nan, ju aux deuh rhawm ka Siyiex mai koe krax gaux rhawm gaux rhi heue, deuh rhawm ka krax pa taoh Nawh mai gaux rhawm gaux rhi heue. 10 Siyiex eue, si-ang aux khawmuik ah nin, pui mawx sang awm Maix, Cao Taoh pui pa hot pa sibhawm khaing daux tawm taix pui pa ting riang ting rao khaing nawh mai tawx krax nyawm rhawm ka pui pa hot pa sibhawm mai pa cud cha khankix heue. 11 Pui pa kham sakse pa ang rahsee khankix, kaoh mai chawk ka aux grawng pa ang aux tawng. 12 Kix deeh pawk pa caox ka ceu pa mhawm pa yuh aux mai kix sang teei khawm ju mai kieh aux laux rhawm heue. 13 Phan mawh nan, yam yaox kix jhawm saux mai aux ceep kraung pa taing ka maox rhix mai aux kieh rhawm aux twah pa ih mai bwan pa rawg aux deeh hoek ka piang naok aux heue. 14 Aux deuh kix awm paox grawm mai puxaik, awm pui pa khi rhawm mai yiiem son miex tix, aux khi rhawm son kix mai gup kaing tix heue. 15 Yam yaox aux krax khi rhawm, kix khrawm paox tix gaux rhawm mai yuh pa ang cee ang cag mai pui pa ang aux tawng khankix giex aux mai tap toi ka aux heue. 16 Kix deuh aux awm pui pa caox caig mai greeik rhang tix ka aux heue. 17 Siyiex eue, Maix kawn tak sang jhak bawg yam miex grheung? Taoh ju aux khaing daux pa laux leeing, ceu pa lheu moh aux khaing paox tix, taoh aux khaing sivai sangsi khankix liak. 18 Phan yuh nan, aux tak yaogyaw bwanson Maix ka sinax pui hun heue. 19 Pui pa nieb koeng giex going ka aux, paw kieh kix gaux rhawm ka piang aux mai pui pa nieb ciang khoi ka aux, paw kieh nawh khiep ngai tix ka aux liak.Ref 35:19 Yaog 69:4; Yo 15:25. 20 Grawh grawng nawh, kix ang chix krai lox pa yiien yawg ti bawg kawx, sawg kix ti krai lox pie lhen ka pui pa ot mhawm mhawm khankix heue. 21 Kix ang jheeh tix mai ah nin ka aux, “ha ha!”, ngai ex hoik yaox ka ceu an heue. 22 Siyiex eue, Maix hoik yaox ka ceu in, paw glaik yiien yawg tix, Siyiex eue, Maix paw lai ot singai khaing aux liak. 23 Siyiex aux eue, siduad mai kaoh heue, prawng ca ka ceu pa hoek ka piang aux liak. 24 Siyiex aux eue, prawng ca ka aux awm pa rahsee Maix liak, paw kieh kix gaux rhawm ka piang aux liak. 25 Paw kieh kix ah nin, ka daux rhawm tix, haha, ex hoik naog alo tix, paw peung kieh kix ah, hoik pex ex ka nawh. 26 Can pui pa gaux rhawm yam yaox aux krax khi rhawm khankix, kieh kix hoek krax pa kaig tua mai voi plakngai liak. Pui pa yaw ka tokaux tix, tak sang ceep kraung pa kaig tua mai laux plakngai heue. 27 Pui pa deuh rhawm ka pa rahsee khankix, kieh kix rhax lai mai gaux rhawm gaux rhi liak. Kieh kix ah nin jheung jheung, kieh Siyiex khaw rhawm mai tawx krax pa nyawm rhawm mai min plakngai pa ting ka siliex Nawh heue. 28 Dak aux tak sang krai grawng pa rahsee Maix mai yaogyaw ka Maix ku singaix heue.