YAOGYAW 36
1 Pui pa koe phimap mai pa ang rahsee ah nin ka daux rhawm tix, krax pa lhat graung ka Siyiex ang koe sivoe ngai nawh.
2 Grawh grawng nawh, nawh yuh grang tix awm pa ang koe phimap pa seeing brai mai pa koeng ka pa caox caig plak sivoe ngai tokaux tix heue.Ref 36:1 Ro 3:18.
3 Lox pa lih khaing jheeh nawh mawh pa seeing brai mai pa pie lhen, tik ka cuyi pingnya mai ceu pa mhawm mhiem khankix heue.
4 Nawh keud ceu pa caox caig pa ang mhawm ka dee it tix mai nawh hawt ka daux krax pa seeing brai mai nawh ang seeing brai ka ceu pa caox khankix heue.
5 Siyiex eue, krax moh krax caux rhawm Maix hoik hoek tom raoma mai sijax mukheu Maix hoek ka paiawm heue.
6 Krax pa rahsee Maix, awm gawng heue. krax prawng ca Maix mawh pa kied raux heue. Siyiex eue, Maix teem ka kawn pui mai khawm totiag heue.
7 Siyiex eue, krax pa moh pa caux rhawm Maix ting lhaong miex ding? kawn pui deuh rhawm ka Maix mai ot greem veei pruik Maix heue.
8 Kix tak sak mai kluing bee ka daux nyiex Maix mai Maix tak tawx kix nyaux rawm klawng im ju heue.
9 Grawh grawng nawh, daux lih rawm im ju koe mai Maix, aux yaox pa riang ka daux pa riang Maix heue.
10 Krax pa moh pa caux rhawm Maix koe ka piang pui pa tawng ka Maix, kieh pa rahsee Maix, koe ka piang kix pa koe rhawm rahsee liak.
11 Paw kieh caong pui pa ting rhawm ting rhi dig ka aux liak, paw kieh taix pui pa ang rahsee grheu aux to liak.
12 Pui pa yuh phimap hoik goh tan, kix goh mai ang lai pon ti kaoh heue.