1 Aux tak sang yaogyaw ka bwanson Siyiex ku bawg yam mai yaogyaw ka Nawh jheung jheung heue. 2 Ju aux deuh rhawm ka Siyiex mai yaw rangdi, yam mhong kix pui pa hot sibhawm khankix, tak gaux rhawm gaux rhi heue. 3 Yaogyaw bwanson Siyiex tau mai aux, ex yaogyaw ceu kaux Nawh ting lhaong heue. 4 Yam sawg aux ka Siyiex, Nawh deeh pawk ka lox aux mai taoh aux luan khaing pa lhat graung khawmuik heue. 5 Pui pa maong ti jhak ka Nawh Cao khankix, pon pa riang heue. Pakngai kix ang hoek krax pa kaig tua heue. 6 Lox kok yo pui pa hot pa sibhawm, Siyiex nghiet lox nawh mai taoh nawh lih khaing ka daux pa kha rhawm kuceu khawmuik heue. 7 Kawncau Siyiex cie Simiang, deuh tab rob vung viang kix pa lhat graung ka Nawh mai taoh ka kix heue. 8 Cim ti yaox grawng pa mhawmRef 34:8 1Pe 2:3. mhiem Siyiex mai pui pa deuh rhawm ka Siyiex, koe bwanson heue. 9 Pui pa singax singeh Siyiex khankix eue, lhat graung ka Siyiex awx, can pui pa lhat ka Nawh ang lai baox lo tittix. 10 Kawn sivai sangsi khankix, cai rhawm mai ang yaox ti ih pa ih kawx, can pui pa sawg ka Siyiex khankix, pa simie ti pon pa mhawm pa ang kix pon ang koe tix ceu kawx heue. 11 Kawn nyawm khankix eue, hoek ka aux mai nghiet lox aux, aux tak sang gau pex ka beenli pa lhat graung ka Siyiex heue. 12 Pui mawx pa simie ti im ju mai lang ju mai pa krox jun ka singaix bawg yam pa mhawm khankix. 13 Kieh dak tix luan khaing pa caox pa ang mhawm mai jheeh nawh kawx paw vi ah lox pie lhen, 14 via khaing ceu pa caox mai yuh ceu pa mhawm mai sawg ka pa khaw caw mai hawt leue tom krup awx. 15 Grawh grawng nawh, ngai Siyiex jhak ka piang pui rahsee khankix mai yhaok Nawh nghiet ka lox pa rawg pa mhaing kix heue. 16 Pui pa yuh pa caox caig khankix, Siyiex vud ngai khaing kixRef 34:12-16 1Pe 3:10-12. mai tik vud kix, tom kawn pui piang haktiex ang tawng mai ang lai doh keud ka kix heue. 17 Siyiex nghiet ka lox pa kok yo pui pa rahsee khankix mai taoh kix lih khaing krax pa kha rhawm kuceu khawmuik heue. 18 Siyiex ot dex mai pui pa laux rhawm laux rhi khankix mai Nawh taoh ka pui pa awn rhawm khankix heue. 19 Pui pa rahsee khankix, viang kix yaox krax pa kha rhawm tom nie kawx, Siyiex taoh kix lih khaing ceu an kuceu khawmuik heue. 20 Nawh Cao priex si-ang Nawh khawmuik mhawm mhawm mai ang kieh pot tix nyaing kawx.Ref 34:20 Lih 12:46; Si 9:12; Yo 19:36. 21 Pui pa yuh pa caox, yum ka pa caox, pui pa koeng ka pa rahsee khankix, yaox ti prawng ca ka phimap pa yuh tix heue. 22 Siyiex taoh ka ju siliex Nawh mai pui pa deuh rhawm ka Nawh khankix, ang hoek krax prawng krax ciyang phimap tix kaux kawx heue.