YAOGYAW 33
1 Pui pa rahsee khankix eue, rhax lai gaux rhawm gaux rhi ka daux Siyiex awx, krax pa gaux rhawm gaux rhi tix yaogyaw mawh pa keung pa khaw mai pui pa rahsee heue.
2 Tah ting mai yaogyaw ka Siyiex awx, teei ting pa koe maox kao nyaing mai rhax lai yaogyaw awx.
3 Ah lox rhax pa khraox sivoe ngai Nawh Cao awx, gaux rhawm mai tah ting mhawm mhawm pa nyawm ti nghiet lox awx.
4 Grawh grawng nawh, gumlox Siyiex mawh pa rahsee mai krax prawng ca Nawh kawx, mawh pa khaw mai sijax mukheu pa rahsee heue.
5 Nawh Cao moh ka pui yuh kaing pa rahsee mai prawng ca awm pa khaw caw mai beenli heue. bwanson krax pa caux rhawm Siyiex hoik naog ka piang haktiex khawm bee ma heue.
6 Raoma mai can pa koe piang raoma khawmuik, Siyiex hoik yuh ka bhawm gumlox Nawh heue.
7 Nawh Cao kieh rawm sigrit sigra khrawm ti tau mai rawm sigrit sigra pa raux khankix, priex ka daux dee kaux heue.
8 Kieh haktiex khawm bieh khawm baung lhat graung ka Siyiex awx, kieh kawn pui can pa ot piang haktiex khawmuik, nab yam yungyi ka Nawh Cao heue.
9 Grawh grawng nawh, Siyiex ah ceu patix, lih mawh ceu an heue, Nawh Cao tawx lox mai lih mawh heue.
10 Siyiex tik vud ka ceu pa kum kawng pui tang ceu mai yieh ti tik ka krax pa keud sawn kix heue.
11 Krax pa hoik ciak Siyiex ti deuh mawh pa kaux cong leeing ju mai ceu pa hoik keud Nawh Cao daux rhawm tix, kaux cong leeing ju heue.
12 Pui pa hoik laug Siyiex ti teei khankix, mawh sin Nawh Cao mai kix koe bwanson heue.
13 Siyiex ot ka piang raoma jhak mai yaox ka kawn pui khawmuik heue.
14 Nawh Cao ot ka dee ot tix, jhak ka kawn pui piang tiex khawmuik mai tawng ka kix heue.
15 Nawh Cao yuh rhawm rhi kix koe mai jhak ka pa yuh kix khawmuik heue.
16 Simiang kaux pui mawx ang ah, pon krax nyawm rhawm kheu haoh hun pui naing ang mawh mai cao giex kaing naing pa hoek krax taoh mawh kheu ting riang ting rao tix ang mawh.
17 Brung kawx mawh pa giex going, nawh ang pon taoh ka riang rao pa ting nawh.
18 Jhak heue, ngai Siyiex jhak ka pui pa lhat graung ka Nawh mai pui pa deuh rhawm ka bwanson krax pa caux rhawm Nawh khankix heue.
19 Kieh kix luan khaing krax yum mai kieh kix im ju yam hot sibhawm heue.
20 Ju ex krox pot jun pot ka Siyiex, Nawh Cao mawh Cao pa teem ex mai Cao pa tiebtie ex heue.
21 Mawh kheu ex deuh rhawm ka ceu kaux Nawh pa singax singeh mai rhawm ex tom koe krax gaux rhawm gaux rhi ka daux Siyiex heue.
22 Siyiex eue, mawh kheu krox jun ex ka Maix, kieh bwanson krax pa caux rhawm Maix koe ka piang ex liak.