1 Siyiex eue, ot plak pui pa rahsee mai nghiet ka lox pa kok yo aux liak, veeh yhaok Maix mai nghiet ka lox pa rawg mhaing aux ka daux jheeh pa ang pie lhen liak. 2 Kieh krax prawng ca aux, mawh pa kaoh khaing Maix mai kieh ngai Maix jhak ka grawng pa rahsee liak. 3 Cheuk cheu ti yaox ka rhawm aux, hoek ti kia ngien ka aux yam ponsawm, yam cheuk cheu Maix ti yaox ka aux mai ang yaox pa caox caig daux aux, pa keud aux mai lox jheeh aux kawx, ang koe dee lud. 4 Mawh kheu hawt aux gumlox Maix mai via khaing ceu pa laux leeing pa yuh pui tang kaux khankix heue. 5 Kieh caong aux kaux cong yam hu aux daux krax Maix mai son ang caong aux cang klad liak. 6 Siyiex eue, aux rawg mhaing ka Maix mawh kheu hoik pawk Maix lox aux, veeh yhaok Maix mai nghiet lox aux liak. 7 Teei taix khawn dawm Maix taoh ka pui pa deuh rhawm ka Maix khaing tawm taix pui pa tieh feen ka Maix, Simiang eue, Maix jhi yaox krax moh krax rhawm pa daox am Maix liak. 8 Kia ngien aux, awm jhak Maix ka sok ngai tix mai tawb aux ka greem veei pruik Maix liak. 9 Kieh aux luan khaing tawm taix pui pa caox caig, pa tuktiaktukte ka aux, pa mawh pui pa koeng pa simie ti teei aux yum mai pa rob hawt vung viang aux khankix liak. 10 Kix ang koe krax pa caux rhawm mai ah lox ting lox lhaong heue. 11 Aux hu dee mawx ang ah, kix hoik rob vung viang aux, sonsang goh aux ka piang tiex, kix jeung ngai ka aux heue. 12 Awm sivai sangsi pa simie ti rud ti ih ka to pa hoik pon tix mai awm kawn sivai sangsi pa mox tix ka daux yeem dee ot tix heue. 13 Siyiex eue, kaoh heue, tiebtie ka kix mai nyhot kix goh liak, teei vaid Maix mai kieh aux luan khaing tawm taix pui caox caig khankix liak. 14 Siyiex eue, ka daux tawm taix Maix, kieh aux luan khaing tawm taix pui mai tawm taix pui haktiex liak. Yam kawn im ju kix yam in kieh kix sak naog ka sin Maix mai kieh kix deuh son kawn praix tix ang ah, son kawn saux kix heue. 15 Grawh grawng nawh, aux mawh pui pa rahsee tak sang pon ti yaox ka plakngai Maix heue. Yam siduad aux, rhawm aux hoik grum naog awm riang pak peung Maix heue.