1 Siyiex eue, aux moh ka Maix, kheu mawh Maix riang rao aux heue. 2 Siyiex mawh rang ting dee deuh aux rhawm tix mai mawh guh veng pa kaux pa tiebtie ka aux, rung pa lawm Nawh taoh ti teei aux mai mawh tab pa kaux son aux heue. 3 Aux tak kok yo ka Siyiex, pa khaw aux ti yaogyaw ka Nawh mawh kheu hoik taoh Nawh aux luan khaing daux tawm taix pui pa koeng ka aux khankix heue. 4 Maox krax yum hoik rob vung viang aux mai aux lhat ka rawm klawng yum pa chix kieh laux heue. 5 Maox meung yum hoik rob vung viang aux mai aux hoik krix ka kie krax yum heue. 6 Yam yaox aux krax nu krax khawm, aux kok yo ka Siyiex mai aux rawg mhaing ka Nawh heue. Nawh mhong ka lox kok yo aux ka daux nyiex bwan Nawh mai lox pa kok yo aux sivoe ngai Nawh hoek daux yhaok Nawh heue. 7 Yam an haktiex yung yiang prung prang mai gawng lua khankix greed ti hu, mawh kheu kied song rhawm Nawh Cao heue. 8 Taox ngu lih khaing daux meeh Nawh mai ngu lih khaing daux jheeh Nawh mai gaox ngu rup kheu Nawh heue. 9 Nawh Cao plak raoma lih hoek ka greem caong Nawh mai lih ti mawh pa faik heue. 10 Nawh Cao brug ka kawncau Siyiex Cherubin hoek mai pu hu vung viang mai hu ka piang pruik bhaung heue. 11 Nawh yuh pa faik mai mox ka daux rawm mai paiawm lung rob vung viang Nawh heue. 12 Mawh kheu jhan pa riang sivoe ngai Nawh mai paiawm viex mu pre mai gaox ngu prung prang hu heue. 13 Siyiex pa ting lhaong, kieh sinum praix lih ka piang raoma mai ploi lox sinum lih mawh mu pre mai gaox ngu heue. 14 Nawh puing ak hu ka kix mai ploi pukplak praix mai kieh kix som mai tang to heue. 15 Siyiex eue, Maix deuh phimap ka kix, ka daux pa toek Maix bhawm ka daux meeh tix mai Maix kieh greem rawm mai jaong num haktiex lih sidawng heue. 16 Nawh Cao ot dee lhaong mai nyeu taix tix tok aux lih khaing ka daux rawm pa ting pa raux heue. 17 Taoh ti teei aux lih khaing pui pa koeng ka aux, pa nie lheu ting riang khaing aux mai pa koeng riang ciang khoi ka aux khankix, mawh kheu ang aux lai pex ka kix heue. 18 Kix hoek ti yuh pa caox ka aux mai singaix yam yaox aux krax khi rhawm, viang mawh nan, Siyiex mawh dee deuh aux rhawm heue. 19 Nawh viex aux hu ka dee vieh va mai Nawh taoh ti teei aux, kheu kied moh Nawh aux heue. 20 Siyiex tawx bwanson, awm pa rahsee aux mai tawx awm taix pa singax singeh aux heue. 21 Grawh grawng nawh, kheu hawt aux daux krax Siyiex jheung jheung, aux ang lai yuh pa caox caig mai ang lai tik ka Siyiex. 22 Krax prawng kra ca Nawh, hoik koe sivoe ngai aux mai aux ang tik ka beenli Nawh Cao heue. 23 Aux hoik grum ceu pa mhawm mhiem sivoe ngai Nawh mai aux hoik via ka phimap pa caox heue. 24 Grawh grawng nawh, Siyiex, tawx bwanson awm pa rahsee aux mai tawx awm taix pa singax singeh plak sivoe ngai Nawh Cao heue. 25 Tawx krax pa caux rhawm ka kix, pui pa chix caox rhwm, Maix tawx krax grum naog ka kix pa grum naog heue. 26 Maix tawx pa singax singeh ka kix pui pa singax singeh mai Maix tawx pa lah cha ka kix pui pa lah cha heue. 27 Maix taoh ti teei ka pui pa hot pa sibhawm khankix mai yeen tiem ka pui pa ting rhawm lhaong ngai khankix heue. 28 Siyiex tok kawk ngu aux mai jhan riang ka daux pa faik heue. 29 Grawh grawng nawh, aux pon to dex tab Maix mai pon jao ka guh veng, mawh kheu deuh aux rhawm ka Maix heue. 30 Daux krax Siyiex mawh pa grum naog, sijax mukheu Nawh, hoik mawh pa thi ti singax singeh heue. Nawh Cao mawh ceu pa tiebtie ka kix pui pa deuh rhawm ka Nawh heue. 31 Lheu khaing Siyiex, siyiex mawx pa kawn koe tix kaux kaux, lheu khaing Siyiex ex, simaox rang mawx pa kawn ting khaing Nawh lie? 32 Siyiex teei maox rawd nyoi mai nhawt ka nyoi aux mai kieh krax hu aux rahsee heue. 33 Nawh kieh caong aux brax awm caong cak mai kieh aux cung ka dee lhaong heue. 34 Nawh gau taix aux, sonsang chix puing naing mai plawng taix aux pon raig ti tik ka ak rhiem heue. 35 Nawh tawx ceu pa tiebtie pa taoh ka aux mai taix khawn dawm Nawh joh jhan ka aux heue. Nawh yaog aux ting ka daux krax gun yeung pa caux rhawm Nawh heue. 36 Nawh Cao kieh krax hu aux blang, son ang caong aux cang klad. 37 Aux pheet ka pui pa koeng ka aux tom krup, phan aux ang nyang yuh kix laux lak pak leeing, aux ang deeh hoek. 38 Aux dig kix goh ka greem caong tix, tom ang kix lai pon kaoh. 39 Grawh grawng nawh, Maix nhawt maox rawd nyoi aux, sonsang koe riang ti chix puing naing ka kix pa ot tang plak goh greem caong aux heue. 40 Maix hoik kieh pui pa koeng ka aux khankix, to plak khaix aux mai aux sang yuh laux leeing ka pui pa koeng ka aux pak lawg heue. 41 Kix riag yo miex ding kawx, ang koe pui pa taoh, kix kok yo ka Siyiex kawx, Nawh Cao ang lai pawk. 42 Yam an aux krid kix phawng awm phawng tiex pa phlu bhaung, aux klup ti tik kix ka daux krax awm nyheu nyhawk heue. 43 Maix kieh aux luan khaing pui pa lah cha ka aux, Maix kieh aux mawh Simiang cao pa giex kaing piang pui tang ceu, pui ang aux tawng khankix, mawh siliex aux heue. 44 Yam mhong kix lox aux, nghiet lox aux dom mawx dom an mai pui tang ceu khankix khyox khaw ka aux heue. 45 Kix khleep ngai mai lih hu khawm siyaung tix khaing daux tab dee mox tix heue. 46 Siyiex mawh Cao pa im ju mai rang ting aux, kieh koe bwanson liak, kieh yaog ting lhaong ka Siyiex Cao taoh aux liak. 47 Siyiex Cao prawng ca plak aux, kieh cub pui khankix ot ka greem aux. 48 Maix kieh aux luan khaing daux tawm taix pui pa koeng ka aux, Maix yaog aux ting lhaong ka piang pui pa ot tang plak mai kieh aux luan khaing daux tawm taix pui pa pa rhim khankix heue. 49 Mawh kheu nan Siyiex eue, aux tak sang yaogyaw ka Maix mai aux tak sang rhax lai yaogyaw ka ceu kaux Maix heue.Ref 18:49 Ro 15:9. 50 Nawh Cao hoik tawx krax taoh pa ting lhaong ka Simiang pa hoik laug Nawh mai Nawh Cao hoik yuh bwanson jah ka Davit kaw pa hoik groi Nawh rawm bee mai ru nawh leeing ju heue.