1 Simiang siyiex eue, taoh aux khaing tawm taix pui pa caox liak. Tiebtie teem aux khaing tawm taix pui pa caox khankix liak. 2 Kix keud ceu pa ang mhawm ka daux rhawm tix, kix cheeik naing koe ku singaix jheung jheung heue. 3 Kix klaing dak tix awm siuing, siyieb jheeh kix koe cai awm siuing pa vao heue.Ref 140:3 Ro 3:13. 4 Siyiex eue, tiebtie mai teem aux khaing tawm taix pui pa ang rahsee mai tiebtie teem aux khaing tawm taix pui pa caox caig mai keud ti sang kieh aux goh heue. 5 Pui pa ting rhawm khankix, teei maox siah mai mox ti taong kie ka son aux, kix teei rub di ti deuh ka daux krax ka son aux heue. 6 Aux krai ti deuh ka Siyiex ah nin, “Maix mawh Siyiex aux heue. “Siyiex aux eue, nghiet ka lox pa rawg mhaing aux liak. 7 Siyiex aux eue, sibrawm pa taoh Maix aux, Maix tawb kheem ka kaing aux singaix puing naing heue. 8 Siyiex eue, paw lai tawx akhwang pa grum naog ka pui pa ang rahsee liak. Paw lai tawx krax pa keud kix grum naog liak. 9 Yam yaog kix kaing mai rob vung viang aux, lox pa ang mhawm pa lih khaing jheeh kix, kieh deeh hoek ka piang kix liak. 10 Kieh gaox ngu khankix rau ka piang kix liak. Kieh rau ka daux ngu mai ka daux pa kied raux liak. Paw kieh kix deeh pon kaoh tix bawg kawx heue. 11 Pui pa ah lox pa caox caig khankix, paw kieh dee ot kix kaux cong piang haktiex in mai krax kha rhawm khankix, hawt leue khaix kix, pa mawh pui pa caox caig, tom sidah laux leeing heue. 12 Aux tawng Siyiex teem ka pui pa hot sibhawm mai prawng ca ot plak pui pa hot sibhawm heue. 13 Pui pa rahsee khankix, tak yaogyaw ka ceu kaux Maix mai pui pa rahsee ka daux rhawm rhi khankix, pon ti ot tau mai Maix heue.