YAOGYAW 141
1 Siyiex eue, aux kok yo Maix, nied ti hoek ka aux liak. Yam kok yo aux ka Maix, nghiet ka lox aux liak.
2 Kieh pa rawg pa mhaing aux, awm nyawng bhawng pa sang gleeing ti tanRef 141:2 Jhi 5:8. mai kieh aux yaog taix tix rien awm krax pa tan plak ponbo sivoe ngai Maix liak.
3 Siyiex eue, deuh pa tiebtie sivoe jheeh aux liak, pau siviex siyieb jheeh aux liak.
4 Paw kieh rhawm aux keud ka ceu pa ang mhawm khankix, paw lai kieh aux neuex mai pui pa yuh phimap mai paw lai kieh aux hu ka daux krax pui pa ang rahsee khankix liak. Paw lai kieh aux ih ceu pa ih pui an khankix liak.
5 Kieh pui pa rahsee sivied ti gau aux liak. Tak koe bwanson heue. Kieh nawh sidiex gau aux liak. Tak mawh rawm bee pa kraix ka kaing aux heue. Baox yuh kawx, paw kieh kaing aux thiang liak. Yam in aux ot tang plak mai rawg bwan grawng pui pa nieb yuh khankix heue.
6 Pui ting cao giex kaing kix, ploi rau khaing daux rang, kix mhong lox aux heue. Lox an mawh pa nyawm ti nghiet.
7 Awm prung prang khix lug pui, si-ang ex kawx, prung prang ka siviex meung yum heue.
8 Siyiex eue, aux maong ti jhak ka Maix heue. Aux deuh rhawm ka Maix heue.
9 Paw lai hieh ti tik ju aux liak, Maix kieh aux luan khaing kie pa taong kix son aux mai kieh aux luan khaing jhawk pa taong pui pa yuh phimap khankix liak.
10 Yam hoik luan aux khaing khankix, kieh pui pa ang rahsee khankix, kieh cao kix deeh krix ka kie pa hoik taong kix tiru liak.