1 Siyiex eue, Maix chawk cheng tix yaox aux Maix tawng heue. 2 Maix hoik tawng ka pa ngawm aux mai pa cung aux heue. Maix ot dee singai mai tawng ka pa keud sawn aux heue. 3 Maix chawk cheng ti yaox ka pa hu pa it aux mai Maix tawng ka jhawm hu jhawm ing aux khawmuik heue. 4 Ka sivoe ang aux nyang lih lox tix gum kawx, Siyiex eue, Maix hoik tawng ka grawng khawmuik heue. 5 Maix ot hawt vung viang mai aux mai teei taix Maix deuh ka piang aux heue. 6 Krax tawng krax yung an khankix, mawh ceu pa daox am, pa ang aux lai chix yuh, ang lai pon ti hoek krup kah heue. 7 Aux tak sang hu dee mawx? Sonsang luan khaing Khwan Maix? Tak sang to dee mawx? Sonsang luan khaing pakngai Maix? 8 Phan aux haok daux raoma kawx, Maix hoik ot tan, phan aux tawm ti it ka daux meung yum kawx, Maix hoik ot tan heue. 9 Phan aux teei pruik ponngawb mai hu dee sidah rawm sigrit sigra kawx, 10 Ka dee an kawx, taix Maix tak tawx ka aux mai taix khawn dawm Maix giex ka aux heue. 11 Phan aux ah, pa faik kheem aux, yam ponsawm kawx pa riang jhan rob vung viang aux heue. 12 Pa faik ang doh pon kheem sivoe ngai Maix tix ceu kawx, ponsawm riang awm pon singaix, pa riang kiex pa faik awm paox tix sivoe ngai Maix heue. 13 Maix hoik phan hoik yuh sok lax aux mai tokaux aux khawmuik, ka daux vaig miex aux heue. 14 Aux tak yaogyaw ka Maix, mawh kheu aux hoik grum naog ka mhai rug ceu pa daox am mai ceu pa lhat graung khankix heue. Kaing pa yuh Maix in khankix mawh ceu pa daox am mai ju aux hoik tawng mawh tete heue. 15 Tokaux aux hoik sidawng sivoe ngai Maix, yam kleuk yam yuh Maix aux, ka greem tiex ka dee glip heue. 16 Ka ang aux nyang bax mawh pui, Maix hoik yaox heue. Ka sivoe ang Maix nyang yuh ka ceu an khankix tix ceu kawx, Maix hoik tiem ti deuh daux carang Maix khawmuik heue. 17 Siyiex aux eue, krax pa keud pa sawn Maix ka aux mawh ceu pa kied ting ngawh ting jum mai kied nie sigrien sigre heue. 18 Phan aux simin ti yaox nawh, nie lheu nie khaing mhaik khankix heue. Yam siduad aux, ot tau mai Maix heue. 19 Siyiex aux eue, Maix teei pui pa ang rahsee khankix yum liak. Pex pa pah pui yum khankix eue, lih hu khaing aux heue. 20 Kix ah lox pa lah cha ka Maix mai pui pa koeng ka Maix khankix, nieb ah lox pa ang cee ang cag ka Maix heue. 21 Siyiex eue, aux koeng ka pui pa koeng ka Maix khankix, ang mawh lie? Aux seeing brai ka pui pa cung tang plak ang mawh lie? 22 Aux koeng ka kix, khawm rhawm rhi tix mai deuh kix mawh pui pa koeng aux heue. 23 Siyiex aux eue, Maix chawk cheng ka aux mai tawng daux rhawm aux heue. Cheu ti yaox aux mai tawng ka rhawm pa keud sawn aux liak. 24 Jhak ka aux, hu ang hu ka daux krax pa caox lie? tawx aux hu ka daux krax leeing ju liak.