1 Yaogyaw ka bwanson Siyiex heue. Mawh kheu Nawh mawh pa jiet mhawm mai krax caux rhawm Nawh koe jheung jheungRef 106:1 1Been 16:34; 2Been 5:13; 7:3; Eza 3:11; Yaog 100:5; 107:1; 118:1; 136:1; Ye 33:11. heue. 2 Pui mawx pa tak sang pon ti krai grawng pa yuh Siyiex ka sibrawm pa ting lhaong Nawh? 3 Pui mawx pa tak sang pon ti plak jhi ka bwanson Nawh khawmuik? Can pui pa hawt ti yuh ka beenli Nawh mai pa hawt ka krax pa rahsee Nawh ku bawg, koe bwanson heue. 4 Siyiex eue, viex rhawm sibieh Maix doh keud ka aux mai taoh ka aux mai hoek ti jhak ka aux liak. 5 Kieh aux yaox ka pa mhawm can pui pa hoik laug Maix ti teei khankix, kieh aux gaux rhawm mai pui Maix, pa gaux rhawm i khankix, kieh aux yaw rangdi tau mai can kix pa mawh sin Maix liak. 6 Ex hoik lud awm pa hoik lud tax du ex mai ex hoik yuh phimap mai pa ang rahsee heue. 7 Tax du ex khankix ang kix tawng ka ceu pa daox am, pa hoik yuh Maix ka daux meung Ejiptux, kix pi awm ka krax caux rhawm Maix tom nie mai kix tieh feen ka Nawh praok rawm sigrit sigra pa raoh Edom heue.Ref 106:7 Lih 14:10-12. 8 Viang mawh kawx nan, Nawh Cao taoh kix, mawh kheu ceu kaux Nawh mai Nawh kieh sibrawm Nawh pa ting, sidawng heue. 9 Nawh Cao tawx lox ka rawm sigrit sigra pa raoh Edom mai rawm an kroh hu heue. Nawh Cao thong kix hu dee raux, awm hu piang tiex kroh heue. 10 Nawh Cao taoh kix khaing ka daux tawm taix pui pa koeng ka kix mai taoh kix lih ka daux tawm taix pui pa ciang khoi ka kix heue. 11 Rawm an, kheem ti tik ka pui pa koeng ka kix khankix mai ang lai deuk tix kaux kawx heue. 12 Yam an kix yum rhawm ka lox Nawh CaoRef 106:9-12 Lih 14:21-31. mai rhax lai yaogyaw ka bwanson Nawh Cao heue.Ref 106:12 Lih 15:1-21. 13 Viang mawh kawx nan, kix khran pi awm ka ceu pa hoik yuh Nawh Cao mai kix ang krox ang pau ka krax pa keud pa sawn Nawh Cao heue. 14 Kix koe rhawm pa ghoing ka ceu pa ih ka daux tiag mai kix tom cheuk cheu ti yaox ka Siyiex, dee yiien dee ang pui ot heue. 15 Nawh Cao tawx ka kix awm pa mhaing kix heue. Viang mawh nan, Nawh Cao tawx pa yhawm pa krawx ka kix heue.Ref 106:14-15 Si 11:4-34. 16 Kix boh rhawm rhi ka Mose ka daux tab mai Arun pa mawh pui pa singax singeh Siyiex heue. 17 Yam an, haktiex bih mai bleet ti ih ka Datan mai cub kix pa laig ka Abiram heue. 18 Ngu lih ka piang cub caw kix mai gleeing ka pui pa ang rahsee khankix heue.Ref 106:16-18 Si 16:1-35. 19 Kix raug riang kawn mawie ka piang gawng Hawrap mai krub ka nawh heue. 20 Kix teei min plakngai mai loh ka riang kawn mawie pa chix ih rib heue. 21 Kix hoik pi awm ka Siyiex, Cao pa hoik taoh ka kix mai Cao pa yuh grawng kaing ceu pa ting lhaong, ka daux meung Ejiptux, 22 mai yuh ceu pa daox am khankix, ka dee ot ceu pui Hamax mai grawng ceu pa lhat graung ka praok rawm sigrit sigra Edom heue. 23 Mawh kheu in, Siyiex tom keud ti yuh laux ka pui Nawh khankix, viang mawh nan, Mose siliex pa hoik laug Nawh ti teei tom cung sivoe Nawh mai khyox khaw son ang Nawh sang yuh kix laux leeing heue.Ref 106:19-23 Lih 32:1-14. 24 Kix nieb yuh ang kieh koe ceu ka meung pa jiet mhawm an mai kix ang yum rhawm ka lox mukheu pa hoik krai Siyiex heue. 25 Kix ah lox bawg be ka nyiex bang dee ot tix mai ang lai nghiet ka gumlox Siyiex heue. 26 Yam an Nawh Cao yaog taix tix tang plak mai kieh kix goh ti yum ka daux tiag heue. 27 Kieh ru kix, goh sinax pui tang ceu khankix mai jhax lawg ka kix mai kieh kix prung prang rai ruad hu ku praix ku klawng heue. 28 Kix hawt khaix siyiex Balapekurax mai ih ka ceu pa hoik tan lu sivoe ngai pa yum heue.Ref 106:24-26 Si 14:1-35. 29 Mawh kheu nan, kix yuh ceu pa song rhawm song rhi Siyiex mai kieh ceu pa saux preng hoek ka piang kix heue. 30 Yam an Phinahat kaoh mai prawng ca ka pui pa yuh pa caox caig khankix mai saux preng grai hu khaix heue. 31 Mawh kheu yuh nawh nan, deuh nawh mawh pa rahsee, ku ju leeing ju heue.Ref 106:28-31 Si 25:1-13. 32 Khaix an kix baox yuh krax pa song rhawm Nawh Cao, ka praok rawm Meribax mai Mose tom yaox ti kham geu krax kha rhawm sipiag kix heue. 33 Mawh kheu yuh kix pa sung sang rhawm Mose, jheeh nawh tom ah lox pa ang khaw tix ah ka kix heue.Ref 106:32-33 Si 20:2-13. 34 Kix ang yuh laux ka pui tang ceu mai kix ang hawt yuh ka gumlox Siyiex heue. 35 Kix ot tau mai pui tang ceu mai gau ka beenli kix heue. 36 Kix krub ka riang grang kix mai krix ka kie pa taong kix heue.Ref 106:34-36 Cao 2:1-3; 3:5-6. 37 Kix teei kawn simex mai kawn bun kix mai tan ka phicaox heue.Ref 106:37 2Sim 17:17. 38 Kix plaux kawn simex mai kawn bun kix, pa ang koe phimap mai teei nham kix mai tan ka riang grang meung Khanan mai meung an, seeing brai ka nham heue.Ref 106:38 Si 35:33. 39 Kix yuh tokaux ti seeing brai ka kaing pa yuh kix mai kix lud ka pa yuh tix heue. 40 Mawh kheu in, Siyiex tom lih krax song rhawm ka pui Nawh khankix mai seeing brai ka sin Nawh heue. 41 Nawh Cao teei ti tawx ka daux tawm taix pui tang ceu khankix mai kieh pui pa koeng ka kix, giex kaing ka piang kix heue. 42 Pui pa koeng ka kix, tuktiaktukte ka kix mai kix yaox ti ot mai yuh siliex greem tawm taix kix heue. 43 Viang Nawh Cao hoik taoh ka kix, tom nie bawg kawx kix ca keud krax tieh feen, kheu phimap pa yuh kix heue. 44 Viang mawh kawx nan, Nawh Cao jhak ka krax pa kha rhawm kix mai mhong ka lox pa kok yo kix heue. 45 Nawh Cao doh keud ka sijax mukheu pa hoik yuh Nawh son kix mai caux rhawm ka kix, awm krax pa caux rhawm Nawh tom nie heue. 46 Siyiex kieh kix deeh pon krax caux rhawm khaing pui pa hoik viex kix hu khawmuik heue.Ref 106:40-46 Cao 2:14-18. 47 Siyiex eue, khrawm ti taoh ex lih khaing pui tang ceu mai rieb ti teei ka bwanson ceu kaux Maix pa singax singeh mai pa ting lhaong heue. Aux yaw rangdi mai gaux rhawm yaogyaw ka Maix heue. 48 Kieh Siyiex ceu pui Isarelax koe bwanson tom sidah haktiex leeing ju liak. Kieh kawn pui khawmuik rieb tix ah, Amen. Haleluya!Ref 106:47-48 1Been 16:35-36.