1 Yaogyaw ka bwanson Siyiex heue. Rawg bwan ka ceu kaux Nawh mai plak jhi kaing ceu pa hoik yuh Nawh ka pui khankix heue. 2 Rhax lai ka Nawh heue, rhax lai yaogyaw ka Nawh heue. Krai grawng kaing ceu pa daox am, pa yuh Nawh khankix. 3 Mai yaw rangdi ka daux ceu kaux pa singax singeh Nawh. Kieh rhawm can pui pa sawg ka Siyiex, gaux rhawm heue. 4 Sawg ka sibrawm Siyiex heue. Sawg ka plakngai Nawh jheung jheung heue. 5 Doh keud ka grawng ceu pa daox am pa hoik yuh Nawh mai ceu pa daox, lox tawm beenli pa hoik lih khaing jheeh Nawh khankix heue. 6 Doeh ru siliex Nawh Abraham mai kawn praix Yakop, pa hoik laug Nawh ti teei khankix eue, 7 Nawh Cao mawh Siyiex ex mai Nawh prawng ca ka piang haktiex khawmuik heue. 8 Nawh Cao doh keud ka sijax mukheu Nawh mai gumlox tawm beenli, pa hoik krai Nawh ti deuh tom sidah ju pui tix rheng ju heue. 9 Sijax mukheu pa hoik yuh Nawh ti deuh mai AbrahamRef 105:9 Jah 12:7; 17:8. mai pa hoik tiextu Nawh ka Icak.Ref 105:9 Jah 26:3. 10 Sijax mukheu pa hoik yuh Nawh, sonsang mawh pa kaux cong ka Yakop mai sijax mukheu an, tak sang mawh pa kaux cong leeing ju son pui Isarelax heue. 11 Aux tak teei haktiex meung Khanan, pa mawh sin, pa tak sang pon pex, tawx ka maix heue.Ref 105:10-11 Jah 28:13. 12 Ka daux ceu pui ex, phan simin ti yaox ang awt nie tux, yam mawh kix nyo sinie ka daux meung an heue. 13 Yam lailing kix tix veng hoik tix veng mai tix meung hoik tix meung, 14 Siyiex ang kieh pui mawx tuktiak tukte ka kix, Siyiex sivied ti gau ka simiang ka son kix heue. 15 Paw lai chuh ka can pui pa hoik kraix Aux rawm bee mai paw lai deuh phimap ka cao jhai Aux khankix.Ref 105:14-15 Jah 20:3-7. 16 Siyiex kieh sibhawm praix hoek ka daux meung an mai teei ti tik ka ceu pa ih khawmuik.Ref 105:16 Jah 41:53-57. 17 Nawh Cao ploi pui hu tix kaux sivoe kix, pa mawh Yosiep pa yaox ti kham geu pa coh sonsang mawh siliex pui heue.Ref 105:17 Jah 37:28; 45:5. 18 Kix sau gang ka caong nawh mai tuktiaktukte ka nawh mai kieh nawh kha rhawm heue. 19 Ka sivoe ang lox nawh nyang grum naog, Siyiex cheuk cheu ti yaox nawh heue.Ref 105:18-19 Jah 39:20-40:23. 20 Simiang pa giex kaing pui khankix, ploi pui hu taoh nawh lih mai tawx krax nyawm rhawm heue.Ref 105:20 Jah 41:14. 21 Nawh deuh Yosiep mawh simiang pa giex kaing nyiex haw nawh mai kieh nawh priex kraung khrai sinngao nawh khawmuik heue.Ref 105:21 Jah 41:39-41. 22 Nawh tawx akhwang, sonsang phyawk mai sonsang sidiex gau ka simiang greem nawh khankix, awm pa simie nawh ti yuh heue. 23 Isarelax hoek ka daux meung EjiptuxRef 105:23 Jah 46:6. mai Yakop hu bang haktiex ceu pui HamaxRef 105:23 Jah 47:11. heue. 24 Siyiex kieh pui Nawh pre, haoh hun mai ting riang ting rao khaing pui pa koeng khankix heue. 25 Nawh Cao tieh loh rhawm kix mai kieh kix koeng mai boh rhawm rhi ka pui Nawh khankix heue.Ref 105:24-25 Lih 1:7-14. 26 Khaix an Nawh Cao laug ti teei mai ploi siliex Nawh Mose mai Arun heue.Ref 105:26 Lih 3:1-4:17. 27 Maix kieh jhi sakse Nawh Cao khankix, ka daux meung Ejiptux mai yuh mhai ceu pa daox am, Nawh khankix, ka daux haktiex ceu pui Hamax heue. 28 Nawh Cao ploi pa faik, kieh faikRef 105:28 Lih 10:21-23. heue. Kix ang pon tiebtie ka gumlox Nawh Cao. 29 Nawh Cao kieh rawm mawh nham mai kax khankix yum heue.Ref 105:29 Lih 7:17-21. 30 Kieh khet naog ka haktiex kix, khawm daux nyiex haw dee ot simiang heue.Ref 105:30 Lih 8:1-6. 31 Nawh Cao tawx lox, kieh prawp mai maingRef 105:31 Lih 8:20-24. lih, naog ka haktiex kix heue.Ref 105:31 Lih 8:16-17. 32 Nawh Cao kieh mu pre lih, tang lhiex mai kieh rao ngu lih ka haktiex kix heue. 33 Nawh Cao kieh lah ka piang nhu plix siiet mai khaox ruh mai raig ti tik ka khaox pa koe ka daux meung kixRef 105:32-33 Lih 9:22-25. heue. 34 Nawh Cao tawx lox ka sido mai sido Pa haoh hun tom ang lai uik simin lih hoek ka daux meung kix heue. 35 Ih taux lhax, rib riem mai plix nghox plix koi pa koe ka daux meung kix heue.Ref 105:34-35 Lih 10:12-15. 36 Siyiex kieh kawn Ai kix yum khawmuik, pa moh mai pa deuh kix rhawm tix kah heue.Ref 105:36 Lih 12:29. 37 Khaix an, Nawh Cao viex pui Isarelax lih hu khawm brax kwa mai viex mau khri lih hu heue. 38 Pui meung Ejiptux, koe krax gaux rhawm yam lih hu pui Isarelax heue.Ref 105:37-38 Lih 12:33-36. 39 Grawh grawng nawh, kix kied lhat graung ka kix heue. Nawh Cao kheem veei paiawm ka piang kix mai tawx pa riang ngu yam ponsawm ka kix heue.Ref 105:39 Lih 13:21-22. 40 Yam rawg mhaing kix, Nawh Cao tawx keed hoek ka kix mai tawx blah raomaRef 105:40 Lih 16:2-15. sonsang fah rhawm kix heue. 41 Nawh Cao paoh ka rang mai rawm lih mai lih hu ka dee kroh tiex, awm rawm klawng heue.Ref 105:41 Lih 17:1-7; Si 20:2-13. 42 Grawh grawng nawh, Nawh Cao doh keud ka sijax mukheu pa singax singeh tau mai siliex Nawh Abraham heue. 43 Nawh Cao kieh pui Nawh khankix lih mai pui pa hoik laug Nawh khankix, ah lox gaux rhawm mai lih hu heue. 44 Nawh Cao teei ti tawx haktiex pui tang ceu ka kixRef 105:44 Yaw 11:16-23. mai kix pon ti ih ka kaing pa yuh pui tang ceu khankix heue. 45 Kieh kix hawt yuh lox tawm beenli Nawh khankix mai hawt ti twah klaung lox tawm beenli Nawh heue. Haleluya!