1 Yaogyaw ka bwanson Siyiex, mawh kheu Nawh mawh pa jiet mhawm mai krax pa caux rhawm Nawh koe jheung jheungRef 107:1 1Been 16:34; 2Been 5:13; 7:3; Eza 3:11; Yaog 100:5; 106:1; 118:1; 136:1; Ye 33:11. heue. 2 Siyiex pa hoik taoh kix khaing daux tawm taix pui pa koeng khan kix. 3 Can kix pa ot ka daux meung pa koe plak lih singaix mai plak klip singaix, caong ma laong mai caong ma seh khankix, Nawh deeh viex kix hoek heue. 4 Kix lailing ka daux tiagtu, dee yiien yawg mai ang yaox veng dee ot pui. 5 Kix laux rhawm kheu ang yaox ti sawm mai ang yaox ti nyaux rawm heue. 6 Kix kok yo ka Siyiex, yam yaox kix krax pa hot sibhawm mai Nawh Cao taoh kix ka daux pa kha rhawm heue. 7 Nawh Cao thong kix hu ka daux krax pa rahsee mai kieh kix hoek ka veng dee ot pui heue. 8 Kieh pui khankix khaw ti keud ka krax pa caux rhawm mai ceu pa daox am, pa hoik yuh Nawh ka kawn pui khankix mai kieh kix yaogyaw ka Siyiex heue. 9 Grawh grawng nawh, Nawh Cao tawx awm pa simie kix mai pui pa cai rhawm khankix, Nawh tawx ceu pa ih pa mhawm tom sak heue. 10 Kix yaox ti ot ka daux pa faik mai ka daux veei krax yum mai yaox ti kha rhawm ka pa phyawk maox ceng heue. 11 Mawh kheu thiang kix ti tik ka gumlox Siyiex mai nieb yuh pa ang cee ang cag ka krax pa keud pa sawn Siyiex Cao pa ting lhaong khaing khawmuik heue. 12 Mawh kheu in, Nawh Cao kieh kaing pa yuh kix, deeh hoek ka kix tiru mai rau dee tiiem mai kix goh mai ang koe cao pa yaog heue. 13 Kix kok yo ka Siyiex, yam yaox kix krax pa hot sibhawm mai Nawh Cao taoh kix ka daux pa kha rhawm heue. 14 Nawh Cao teei kix lih khaing ka daux pa faik mai veei krax yum, yah ti ploi kix khaing pa phyawk heue. 15 Kieh pui khankix khaw ti keud ka krax pa caux rhawm mai ceu pa daox am pa hoik yuh Nawh ka kawn pui khankix mai kieh kix yaogyaw ka Siyiex heue. 16 Grawh grawng nawh, Nawh Cao raig ti tik ka siviex tawng lheung mai tat dud ka gawng rhiem khankix heue. 17 Pui pa koe rhawm pa caox khankix, yaox ti kha rhawm, kheu lud kix krax hu tix mai yuh phimap heue. 18 Kix ih ceu pa seeing brai kuceu mai hoek dex siviex krax yum, 19 mai kix kok yo ka Siyiex, yam yaox kix krax pa hot pa sibhawm, Nawh Cao taoh kix ka daux pa kha rhawm heue. 20 Nawh Cao ploi gumlox tix mai kieh jhawm saux kix moi mai taoh kix lih khaing daux pa laux leeing heue. 21 Kieh pui khankix khaw ti keud ka krax pa caux rhawm mai ceu pa daox am, pa hoik yuh Nawh ka kawn pui khankix mai kieh kix yaogyaw ka Siyiex heue. 22 Kieh kix tan mai rieb ti teei ka bwanson Nawh Cao mai rhax lai gaux rhawm mai plak jhi ka grawng kaing pa hoik yuh Nawh Cao khankix heue. 23 Can kix pa brug reu ting mai tiang rawm sigrit sigra mai pa yuh kaing ka piang rawm khankix, 24 kix pon ti yaox grawng kaing pa hoik yuh Siyiex mai ceu pa daox am pa yuh Nawh Cao, ka daux pa raux pa mox heue. 25 Nawh Cao kieh bhaung ting phlu mai kieh pukpak rawm haok hwan heue. 26 Kix haok ka piang raoma mai deeh lih ka dee raux dee mox mai kix laux rhawm kheu yaox krax pa khi rhawm heue. 27 Viex kix vung vang awm pui pa yoek ka plai mai viex krax tawng kix grai hu heue. 28 Kix kok yo ka Siyiex yam yaox kix krax pa hot pa sibhawm mai Nawh Cao taoh kix khaing ka daux pa kha rhawm heue. 29 Nawh Cao kieh bhaung ting grai mai kieh pukpak rawm yiien yawg tix heue. 30 Yam an kix koe krax gaux rhawm kheu yiien yawg hu yuh nan heue. Nawh Cao thong kix hu ka dee bang reu ting dee simie kix ti hu heue. 31 Kieh pui khankix, khaw ti keud ka krax caux rhawm mai ceu pa daox am pa hoik yuh Nawh ka kawn pui khankix mai kieh kix yaogyaw ka Siyiex heue. 32 Kieh kix yaog Nawh ting, sinax dee khrawm pui hun mai kieh kix yaogyaw ka dee khrawm kix kuad song khankix heue. 33 Nawh kieh rawm klawng lih mawh daux tiagtu mai dee lih rawm keut khankix kieh kroh hu heue. 34 Haktiex dee mhawm dee koe phon kawx, kieh ceet hu kheu phimap pa yuh pui haktiex heue. 35 Nawh Cao deeh kieh rawm naog ka daux tiagtu mai kieh rawm keut deeh lih ka dee kroh haktiex heue. 36 Nawh Cao tawx ka pui pa cai rhawm ot ka dee an mai kix yuh veng son dee ot kix heue. 37 Kix yuh ma yuh kaung mai sum plix siiet mai pon plix khaox mai plix nghox plix koi tom nie heue. 38 Nawh Cao nawb bwanson ka kix mai kieh kawn praix kix pre haoh hun mai cub yung, cub mawie kix kawx, kied haoh hun heue. 39 Viang yuh nan kawx, yam yaox kix krax pa tuktiaktukte mai yaox krax laux som, kix laux rhawm heue. 40 Nawh Cao teei krax pa kaig tua, tawx ka kawn laux Simiang khankix mai kieh kix vuvie ka daux tiagtu, dee ang krax koe heue. 41 Nawh Cao teei pui pa hot sibhawm lih khaing ka daux pa kha rhawm mai yaog kix deuh dee lhaong mai kieh mawh nyiex ma haoh hun awm cub yung heue. 42 Pui pa rahsee yaox mai gaux rhawm heue. Can phimap khankix, ang lai simawd thox jheeh tix heue. 43 Pui pa koe cuyi pingnya khankix, kieh tawng ka grawng bwanson krax pa caux rhawm Siyiex heue.