1 Siyiex eue, Maix chix cung dee singai yuh ka mawx? Mawh kheu patix Maix chix mox tix yam yaox krax pa khi rhawm yuh ka mawx? 2 Pui pa ang rahsee pa ting rhawm khankix, chix kieh pui pa hot sibhawm khankix, kha rhawm heue. Kix tak yaox ti kham pa giex pa phyawk pui ka pa nieb lak keud kix ti yuh tiru heue. 3 Pui pa ang rahsee khankix, chix yuh grang tokaux tix mai chix yaw ka tokaux tix mai nieb yuh pa ang cee ang cag ka Siyiex heue. 4 Pui pa ang rahsee khankix, keud daux rhawm ti ah nin, “Nawh Cao ang lai deeh teei, ” Kheu ang Siyiex koe heue. 5 Krax pa hu Nawh mawh pa kaux jheung jheung mai krax prawng ca Nawh, viang lhaong mai singai khaing Nawh kawx, Nawh Cao phlu ti tik ka pui pa koeng ka Nawh khawmuik heue. 6 Nawh keud ti ah nin daux rhawm tix, aux ang gah greed tix mai ang tau ti hoek ka daux pa kha rhawm tix bawg kawx heue. 7 Ka daux jheeh nawh hoik naog lox pa jhax lawg mai pie lhen mai coh lox sikah heue, greem dak nawh hoik naog ceu pa ang mhawm mai pa ang rahsee heue. 8 Nawh briex mox ti hawt dex praok yaong mai briex jawm ti pah pui pa ang koe phimap yum dee glip mai ngai nawh briex jiang ti jhak ka pui pa hot sibhawm khankix heue. 9 Nawh briex mox tix awm mox sivai sangsi ka daux yeem heue. Nawh mox tix sonsang giex ka pui hot sibhawm mai nawh taing sau rub ka pui hot sibhawm ti sang giex kix hu heue. 10 Pui pa iak riang rao khankix, rau hu ka daux tawm taix pui pa ting sibrawm khankix heue. 11 Nawh keud daux rhawm tix, Siyiex hoik pi awm ka aux, Nawh Cao hoik veeh ngai tix khaing aux mai ang yaox ka aux tix bawg kawx heue. 12 Siyiex eue, kaoh heue, Siyiex eue, yaog taix Maix liak, paw doh pi awm ka pui pa kha rhawm liak. 13 Mawh kheu patix pui pa ang rahsee khankix, nieb yuh pa ang cee ang cag ka Siyiex, ka daux rhawm tix mai ah, “Ang lai jhak ka kix lie?” 14 Viang mawh kawx nan, Maix hoik yaox heue, grawh grawng nawh, Maix mawh Cao pa chix teem ka pui pa kha rhawm khankix mai pui hot sibhawm khankix koe ka daux tawm taix Maix mai Maix mawh cao pa teem ka kawn doe pa ang koe miex keeing khankix heue. 15 Maix raig ti tik ka plawng taix pui pa ang rahsee khankix mai pui pa yuh pa caox pa caig khankix, son ang Maix sang yaox ka pa yuh kix tix bawg kawx heue. 16 Siyiex mawh Simiang leeing ju heue. Pui tang ceu khankix, tak sang grai hu ka daux meung Nawh heue. 17 Siyiex eue, Maix hoik mhong ka lox pa rawg mhaing pui pa kha rhawm khankix mai Maix kieh rhawm kix nhim mai daong yhaok Maix nghiet ka lox pa mhaing kix liak. 18 Maix tak sang nghiet ka lox pui pa kha rhawm mai kawn doe pa ang koe miex keeing khankix mai Maix ot ka plak kix mai prawng ca ka son kix ka pui pa glhat ka kix heue.