1 Siyiex eue, aux viex khawm rhawm tix, khawmuik yaogyaw ka Maix heue. Aux tak plak jhi ceu pa daox am Maix khawmuik heue. 2 Aux tak gaux rhawm ka daux Maix mai aux tak rhax lai yaogyaw ka ceu kaux Maix Siyiex pa ting lhaong heue. 3 Grawh grawng nawh, pui pa koeng ka aux khankix, deeh plak khaix mai goh ti laux leeing sivoe ngai Maix heue. 4 Maix ot plak aux mai hoik prawng ca, Maix ngawm piang dang ngeung ti prawng ca rahsee heue. 5 Maix hoik sivied ti gau ka pui tang ceu khankix mai Maix yieh ti tik ka pui pa caox caig khankix mai preet ti tik ceu kaux kix leeing ju heue. 6 Pui pa koeng khankix hoik laux leeing mai veng dee ot kix kawx, hoik grai grhup pak lawg heue. 7 Siyiex mawh pa kaux cong leeing ju mai Nawh Cao hoik cox dangngeung dee prawng ca. 8 Nawh tak prawng ca ka kawn pui piang haktiex ka daux pa rahsee mai Nawh tak prawng ca rahsee ka kawn pui heue. 9 Siyiex mawh dee deuh rhawm pui pa yaox ti kham geu krax tuktiaktukte mai mawh dee deuh rhawm yam hoek krax khi rhawm heue. 10 Pui pa tawng ka ceu kaux Maix khankix tak yum rhawm ka Maix heue. Grawh grawng nawh, Siyiex eue, Maix ang chix tik vud ka can pui pa sawg ka Maix heue. 11 Rhax lai yaogyaw ka Siyiex, pa ot ka daux veng Zion mai krai grawng pa yuh Nawh Cao ka pui khawmuik awx. 12 Nawh Cao chawk cheng ka pui pa teei ju pui yum khankix mai doh keud ka pui pa hoik yum khankix heue. Nawh Cao ang doh pi awm ka lox pa kok yo pui pa kha rhawm khankix heue. 13 Siyiex eue, caux rhawm mai taoh ti teei ka aux liak. Jhak ka pui pa koeng ka aux mai pa tuktiak tukte kix ka aux liak mai taoh ti teei aux lih khaing krax yum liak. 14 Phan yuh nan, aux tak sang jhi bwanson Maix khawmuik ka sivoe ngai kawn pui pa ot ka daux veng Zion khankix heue. Aux gaux rhawm kheu hoik taoh Maix ti teei aux heue. 15 Pui tang ceu khankix, deeh rau ka daux tiex pa hoik kaong kix mai caong kix deeh krix ka kie pa hoik taong cao kix heue. 16 Siyiex yuh tokaux Nawh sidawng ka daux pa prawng ca tix heue. Pui pa ang rahsee khankix, deeh sivu ka kaing pa hoik yuh tix tiru heue. 17 Pui pa ang rahsee mai can pui pa pi awm ka Siyiex khankix, tak sang grheu kix lih hu ka daux meung yum heue. 18 Nawh Cao ang doh pi awm ka kix, pui pa hot sibhawm mai krax pa krox jun, pui pa kha rhawm khankix ang chix laux leeing, leeing ju heue. 19 Siyiex eue, kaoh heue, paw kieh pui pex mai kieh pui tang ceu kham geu ka krax pa chawk pa cheng sivoe ngai Maix mai prawng ca ka kix liak. 20 Siyiex eue, ghlat ka kix liak mai kieh kix tawng grawng mawh kix pui giex liak.