1 Pingnya mai krax tawng yung, kok yo mai ploi lox sinum ang mawh lie? 2 Nawh cung ka dee lhaong dee choek mai praok krax heue. 3 Nawh kok yo praok siviex ting mai diang siviex veng mai ka daux siviex nyiex ah nin,Ref 8:1-3 Kab 1:20-21. 4 “Kawn pui khankix eue, aux kok ka pex mai ploi lox ka kawn pui heue. 5 Pui pa ang koe pingnya khankix eue, gau ka cuyi pingnya awx, pui pa caox khankix eue, kieh rhawm pex keud ka pingnya krax tawng yung awx. 6 Nghiet ha, aux tak krai lox pa ting jum, aux tak sang krai lox rahsee ka jheeh aux. 7 Lox pa kaoh khaing jheeh aux mawh pa dex dawd mai pa rahsee, siyieb jheeh aux seeing brai ka phimap heue. 8 Can lox pa sidiex aux khankix khawmuik mawh pa rahsee mai ang koe lox pa kawk vawk mai rhawm pa tieh feen heue. 9 Son pui pa tawng khankix, hoik sidawng laing laing, pui pa pon ka pingnya khankix, hoik mawh pa khaw caw heue. 10 Rieb ti teei ka lox pa sidiex aux sivoe, khaing mau, sawg pingnya krax tawng yung sivoe, khaing khri. 11 Grawh grawng nawh, pingnya lheu mhawm khaing siang raoh heue. Can kraung khrai pa khaw rhawm khawmuik, ang pon tiag sidu ngawh mai pingnya an heue. 12 Pingnya aux in, ot tau mai pa koe satix mai chix plak jhi ka pingnya krax tawng yung heue. 13 Krax pa lhat graung ka Siyiex mawh ceu pa koeng ka phimap mai pui pa ting rhawm, pui pa map ka pui mai pui pa hu ka krax pa ang mhawm mai pui pa ah lox pa kawk vawk khankix, aux tak koeng kah heue. 14 Pingnya mawh pa ngawh, pa chix tawx krax keud gau pa mhawm, koe ka aux heue. Aux mawh pingnya mai pa ting riang rao grum koe ka daux aux heue. 15 Mawh kheu pingnya aux, simiang khankix pon ti kwang mai simiang haktiex khankix, chix prawng ca rahsee heue. 16 Mawh kheu pingnya aux, kawn simiang ang ah, pui yuh kaing greem simiang ang ah mai cao prawng see khankix ang ah pon ti kwang ka haktiex heue. 17 Aux moh ka pui pa moh ka aux khankix, pui pa coca ti sawg ka aux khankix tak yaox ka aux heue. 18 Sinngao pa mi mai min plakngai koe mai aux, sinngao pa kaux cong mai pa rahsee kawx, koe mai aux heue. 19 Plix bwan son pa tawx aux, lheu mhawm khaing khri, nie lheu mhawm khaing khri nawnaw pa hoik thi heue. Gha sinngao pa pon kheu aux, nie lheu ngawh khaing mau heue. 20 Aux mawh krax rahsee mai hu ka sinax pa prawng ca rahsee heue. 21 Can pui pa moh ka aux khankix, aux tak kieh grum naog ka sinngao, kraung khrai, mau, khri, ka daux nyiex ma kix heue. 22 Sivoe ang Siyiex nyang phan yuh tidtix dix,Ref 8:22 Jhi 3:14. aux (cuyi) hoik mawh cie nawh heue. 23 Sivoe ang haktiex nyang koe, aux hoik dawg koe heue. 24 Sivoe ang rawm sigrit sigra pa raux mai rawm keut khankix ang nyang koe, Nawh hoik kieh aux koe heue. 25 Ka ang gawng ting gawng iak nyang koe, aux hoik dawg koe. 26 Ka ang nyang phan ka haktiex, daux tiagtu mai phawng tiex khankix, Nawh hoik kieh aux keh heue. 27 Yam phan Nawh ka raoma aux ot tau mai Nawh mai yam phan Nawh ka rawm sigrit sigra ang ah mai yam phan ka paiawm pa koe dee lhaong ang ah, 28 yam phan Nawh ka rawm keut pa kaux pa koe dee raux ang ah, 29 yam tawx lox dee ot ka rawm sigrit sigra, son ang lai kheem hu tang dah mai yam jah jaong num haktiex ti koe. 30 Aux ot mai Nawh awm kawn nyawm pa priex Nawh, aux mawh pa gaux rhawm son nawh mai aux gaux rhawm klieh sivoe ngai Nawh jheung jheung heue. 31 Aux gaux rhawm piang haktiex, ka pa phan pa deuh Nawh khawmuik mai aux yuh paox pie gaux rhawm tau mai kawn pui heue. 32 Mawh kheu in, kawn simex aux khankix eue, nghiet ka lox aux awx. Pui pa priex ti hawt krax aux khankix koe bwanson heue. 33 Paw lai tik ka lox pa sidiex gau aux, nghiet mai kieh koe pingnya heue. 34 Pui pa mhong lox aux mai pa pau ka diang siviex aux ku singaix mai pa krox jun ka diang siviex ting khankix koe bwanson heue. 35 Pui pa sawg mai yaox ka aux, yaox ka ju heue. Nawh tak pon bwanson ka Siyiex heue. 36 Pui pa lud ka aux khankix, lud ka ju, khwan tokaux tix heue. Pui pa koeng ka aux khankix moh ka krax yum heue.”