9
1 Pingnya teei rong nyiex aliah gawng mai hoik sum nyiex dee ot tix heue.
2 Nawh teei tobrie khankix pah yum mai biiet ka rawm plix siie, hoik cox khre ka pheem sawm heue.
3 Nawh ploi siliex bun khankix, hu ka daux veng mai kok yo pa koe dee lhaong ah nin,
4 “Pui pa ang koe pingnya khankix, kieh laig ka dee in,” mai pui pa ang koe pingnya khankix eue,
5 “Hoek heue mai ih ka blah aux mai nyaux rawm plix siiet pa biiet aux heue.
6 Via hu khaing pui caox mai sonsang pon ti im ju pa nyawm rhawm mai hu ka daux krax pingnya heue.”
7 Pui pa sidiex gau ka pui pa nieb yuh pa ang cee ang cag khankix, yaox ti kham geu krax kaig tua mai pui pa jhi phimap ka pui pa caox khankix tak yaox ti kham geu ka pa salao heue.
8 Paw lai sidiex gau ka pui pa nieb yuh pa ang cee ang cag khankix, ha kix tak koeng ka maix, plak jhi phimap ka pui pa koe pingnya khankix, nawh tak moh ka maix heue.
9 Phan sidiex gau ka pui pa koe pingnya khankix, nawh tak nie lheu koe pingnya mai phan sidiex gau ka pui rahsee khankix, nawh nie lheu ting lhaong pingnya krax tawng yung heue.
10 Ceu pa lhat graung ka Siyiex mawh jaong num pingnyaRef 9:10 Job 28:28; Yaog 111:10; Kab 1:7. heue. Pa tawng ka Siyiex pa singax singeh mawh pingnya krax tawng yung heue.
11 Grawh grawng nawh, pui pa deuh rhawm ka aux, aux tak sang kieh singaix ju, jhong khix mee num nawh ting lhaong heue.
12 Phan maix koe cuyi pingnya, tak pon bwanson, son tokaux maix heue. Phan maix nieb yuh pa ang cee ang cag tokaux maix yaox ti kham phimap tix heue.
13 Bun pa caox khankix, chix ah lox ting lox sinum mai kheu ang koe pingnya mai ang tawng praix heue.
14 Nawh ngawm ka diang siviex nawh mai ngawm dee lhaong pa koe ka daux veng,
15 kok yo ka pui pa lawng krax sivoe nawh khankix ah nin,
16 “Pui pa ang koe pingnya khankix, kieh laig dee in,” mai pui pa ang koe pingnya khankix eue,
17 “Rawm pa briex tix nyaux mawh pa nyawm heue. Blah pa briex tix ih dee glip mawh pa jiet nyawm heue.”
18 Simex an, ang tawng ka simeeig pui yum koe tan mai grawng nyo sinie bun an khankix, ot ka dee raux meung yum heue.