7
1 Kawn simex aux eue, nghiet ka lox aux mai priex lox tawm beenli aux khankix ka daux rhawm maix awx.
2 Priex lox tawm beenli aux khankix mai im ju awx, priex lox tawm aux khankix, awm sok ngai maix awx.
3 Vien ceu an khankix ka giien taix maix mai tiiem ti deuh piang dieb rhawm maix.
4 Deuh pingnya mawh nan tix, kok dong pa mhawm mawh paox grawm tix.
5 Phan yuh nan, tak taoh ti teei maix luan khaing daux taix bun pa laux been mai khaing jheeh bun coh kaux pa chix nyaw chix glaw heue.
6 Yam jhak aux ka daux doh siviex vawng nyiex aux mai aux yaox ceu pa yuh nin,
7 yam jhak aux ka paox simex cub pa iak cuyi pingnya khankix mai aux yaox sinaw pa ang koe pingnya tix kaux,
8 hu lailing dex bun pa ang koe cuyi pingnya pa awm nawh, ka daog krax heue.
9 Plak ponbo yam faik praix, nawh hu krax dee ot bun an heue.
10 Bun an, teei ti ceep kraung bun coh kaux mai hoek ti rieb ka nawh heue.
11 Bun an chix ah lox ting lox sinum, koe rhawm pa kiien, ang ot daux nyiex tix mai ca lailing heue.
12 Tivud ot plak praix nyiex, tivud ot daux krax, chix jiang praok krax kudah dee heue.
13 Yam yaox nawh ka sinaw an, ang koe ngai kaig mai kawm ngheut ka nawh ah nin,
14 “Aux yuh pawie tan, pa ih ka daux singaix hoik naog awm pa ah aux lox mukheu heue.
15 Mawh kheu in, aux tom lih rieb ka maix mai coca ti sawg pakngai maix mai hoik yaox yam in heue.
16 Aux hoik tawm man lai kuceu mai man pa mhawm plang, pa kaoh khaing meung Ejiptux piang ku it aux heue.
17 Aux sau muran mai rawm bee pa sioe baux mai khaox cai hung khankix, piang kraung it aux heue.
18 Hoek heue, ax it tau tom sidah riang praix mai yuh krax phit vao tom fah rhawm heue.
19 Cao nyiex aux ang ot daux nyiex, nawh viex hau mau tix mai hoik hu krax dee singai,
20 Nawh sang deeh hoek ka singaix bak nawh ti deeh hoek heue.”
21 Nawh ah lox nyawm rhawm mai nyaw glaw ka nawh, siyieb jheeh nawh nyaw glaw ka nawh mai yuh ti pex ka nawh heue.
22 Nawh hawt khaix nawh dom mawx dom an, awm hawt mawie ka dee plaux yum ang ah, cak, poh, ka sivoe ang te nyang krox ka tawm nawh, awm hu dee haoh pui hu ang ah.
23 Awm sim pa nied laig ka jhawk pa taong pui mai ang tawng mawh pa som ju tix, sinaw an nied ti hawt khaix bun an dom mawx dom an heue.
24 Mawh kheu in, kawn simex aux eue, nghiet ka lox aux mai deuh ti tawng ka lox pa sidiex aux khankix awx.
25 Paw kieh rhawm maix simie ti hu ka krax dee ot bun yuh nan mai maix paw lud ti hu ka daux krax hu nawh.
26 Grawh grawng nawh, nawh hoik kieh pui naing tom nie goh mai nawh hoik pah pui ting riang rao yum tom nie.
27 Nyiex nawh mawh daux krax hoek meung yum mai laig ka daux mawnarhok heue.