1 Pa tiiem pui simiang Hezakix pui Yudax ti deuh, ka lox pa raux mox lai lox kab simiang Sawlamon mawh nin heue. 2 Kaing ceu pa ting pa raux mox tix ceuceu, mawh pa khaw mai min plakngai Siyiex, phan mawh simiang, koe min plakngai kheu pa chawk cheng ka see pa ting heue. 3 Raoma mawh pa lhaong, haktiex mawh pa raux mai rhawm simiang chawk cheng kawx, ang pon tix tawng. 4 Phan teei ti tik aing mau khaing daux mau, lih mawh kawk pa mhawm son cao pa yuh mau heue. 5 Phan teei ti tik pui pa ang rahsee khaing simiang, sibrawm nawh tak kaux cong ka daux pa rahsee heue. 6 Paw lai yaogyaw ka tokaux tix sivoe simiang, paw lai cung ka dee ot pui pa ting lhaong. 7 Grawh grawng nawh, pui ah nin ka maix haok tin, nie lheu mhawm khaing kieh maix lih ka dee tiem dee yaox pui sivoe ngai simiang heue.Ref 25:6,7 Luk 14:8-10. 8 Paw brax yuh simah ka paox plawg maix, ha kix kox kieh maix kaig tua maix tom sang yuh ka mawx? 9 Maix kum kawng see ti tau mai paox plawg maix awx. Paw lai krai see pa khaw tix mox, ka pui tang kaux. 10 Phan ang mawh nan, pui pa mhong ka lox maix nawh tak kieh maix kaig tua mai kieh min plakngai maix laux jheung jheung heue. 11 Lox pa jiet khaw, awm plix kawk khri tie pa sau mau joi khri heue. 12 Pui pa chix nghiet mai: pui pa chix sidiex gau lox pa mhawm, awm krim khri mai awm khao kraung khri nawnaw heue. 13 Awm pa lih rawm ciex, kheu pa sikied bawg yam vawg nghox, siliex pa kaux sijax kawx, nawh chix kieh rhawm simiang cao pa ploi nawh lih nyawm rhawm, nhim rhawm, jheung jheung heue. 14 Pui pa yuh plakngai mai hoik ah tix tawx mai ang lai tawx khankix, awm bhaung mai paiawm pa ang viex lhiex heue. 15 Pa lang gun yeung, pon glaw rhawm simiang, dak pa awn, chix kieh si-ang pot heue. 16 Phan maix yaox rawm hia, ih pie khaw pie jiet, phan maix cha nie luan ih tak deeh hao heue. 17 Maix paw lai rheung ot ka daux nyiex paox plawg maix, phan maix rheung ot, nawh meu mai tak koeng ka maix heue. 18 Pui pa kham sakse pa ang mawh ang meh ka paox plawg tix, awm khaox, vaid mai pliah pa lawm heue. 19 Yam yaox maix see, phan maix yum rhawm ka pui pa ang kaux sijax, tak yaox ti kham geu pa pot rhang mai pa kluik jhong si-ang caong heue. 20 Pui pa rhax lai ka pui pa khrup rhawm, awm pui pa peeik kraung ceep bawg yam kwat mai awm teei rawm niex sau ka daux numsu paing heue. 21 Phan pui pa koeng ka maix cai rhawm, tawx nawh sawm. Phan nawh sang nyaux nie rawm, tawx nawh nyaux. 22 Phan yuh nan maix tak pum sau gaox ngu piang kaing nawh heue. Ref 25:21-22 Ro 12:20. Siyiex kawx, tak tawx bwanson ka maix heue. 23 Awm bhaung pa kaoh khaing caong ma laong, viex rawm lhiex hoek, dak pa kieh pui simah kawx, chix vieh plakngai pa song rhawm hoek heue. 24 Pa yaox ti ot ka daog piang praux nyiex, nie lheu mhawm khaing yaox ti ot daux nyiex ting mai bun pa yie simah ka nyiex ting pui hun heue. 25 Lox pa gaux rhawm pa kaoh khaing meung dee singai, awm rawm pa sikied ka son pui pa mie tix nyaux rawm heue. 26 Phan pui rahsee lud sivoe ngai pui pa ang rahsee, awm rawm dung pa sigu mai awm rawm daux pa cux sium heue. 27 Awm pa ang mhawm ka cha nie luan ih rawm hia mai pui pa sawg ka min plakngai tokaux tix, ang koe min plakngai heue. 28 Pui pa ang pon gun rhawm tix, awm veng pa hoik laux guh veng ba la heue.